Read Toraja-Sa'dan NEHEMIA 10 Bible Online

NEHEMIA 10 - Toraja-Sa'dan bible

NEHEMIA 10

¹Iatu mintu’ to ma’ca’ iamotu Nehemia, to maraa lompo, anakna Hakhalya sia Zedekia,

²Seraya, Azarya, Yeremia,

³Pasyhur, Amarya, Malkia,

⁴Hatus, Sebanya, Malukh,

⁵Harim, Meremot, Obaja,

⁶Daniel, Gineton, Barukh,

⁷Mesulam, Abia, Miyamin,

⁸Maazya, Bilgai, na Semaya, mintu’i te tominaa nasang.

⁹Iatu to Lewi iamotu Yesua, anakna Azanya na Binui. Iatu bati’na Henadad, iamotu Kadmiel.

¹⁰Na iatu mintu’ siulu’na tau iato mai, iamotu Sebanya, Hodia, Kelita, Pelaya, Hanan,

¹¹Mikha, Rehob, Hasabya,

¹²Zakur, Serebya, Sebanya,

¹³Hodia, Bani na Beninu.

¹⁴Iatu pangulunna to buda, iamotu Paros, Pahat-Moab, Elam, Zatu, Bani,

¹⁵Buni, Azgad, Bebai,

¹⁶Adonia, Bigwai, Adin,

¹⁷Ater, Hizkia, Azur,

¹⁸Hodia, Hasum, Bezai,

¹⁹Harif, Anatot, Nebai,

²⁰Magpias, Mesulam, Hezir,

²¹Mesezabeel, Zadok, Yadua,

²²Pelaca, Hanan, Anaya,

²³Hosea, Hananya, Hasub,

²⁴Halohesh, Pilha, Sobek,

²⁵Rehum, Hasabna, Maaseya,

²⁶Ahia, Hanan, Anan,

²⁷Malukh, Harim na Baana.

²⁸Iatu mintu’ to senga’, tominaa, to Lewi, to ma’kampa babangan, tomenani, to pabali-balian lan Banua Kabusungan sia minda-minda tu ussarakki kalena dio mai tu mai bangsa lan tondok iato la ungkaritutui Sukaran alukNa Puang Matua sia iatu bainena tau iato mai sia anakna muane sia anakna baine, minda-minda tu paissannamo,

²⁹nasituru’i mintu’ siulu’na, iamotu to mala’bi’na, anna takoi passanan tengkona menggata sia umpalao sumpa la lolang unturu’ Sukaran alukNa Puang Matua tu Napa’bengan Puang Matua nalopian Musa, taunNa Puang Matua sia la birisan ungkaritutui tu mintu’ pepasan, atoran sia apa Napondok PUANG, Puangta.

³⁰Ondongpi mangakumoki’, kumua tae’mo tala umbenni tu anakta baine lako bangsa lan tondok iate sia iatu anakna baine tau iato mai tae’mo tala unnalanni anakta muane napobaine.

³¹Sia iake saei umbaa balukanna tu bangsa lan tondok iate sia ma’rupa-rupa gandung lan allo katorroan la umbalukki, tae’ tala unnallii, ke allo katorroan ba’tu sala umbanna misa’ allo maindan, sia lan taun ma’pempitu iatu mai padang la tapopa’elo’na talo sia iatu mai pa’peindan moi misa’ tae’ tala untungkai.

³²Sia tapatakoi kaleta la ussorong taa tallunna sikele’ ke sangtaunoi, lako kamenomban lan banuanNa Kapenombanta:

³³iamotu roti dipennoloan, kande dipemalaran kiallo-kiallo sia pemala’ ditunu pu’pu’ kiallo-kiallo, pemala’ allo katorroan, pemala’ bulan ba’ru, pemala’ pa’gauran sia pamengan maindan, suru’ pengkalossoran la umbasei kasalanna to Israel, sia ma’rupa-rupa kamenomban lan banuanNa Kapenombanta.

³⁴Sia taloterei duka, tu mai tominaa, to Lewi sia to buda tu la nenne’ umpatama kayu tama banuanNa Kapenombanta situru’ rapunta lan attu dipamanassa ke taunoi, la ditutung dao inan pemalaranNa PUANG, Kapenombanta, susitu disura’ lan Sukaran aluk.

³⁵Sia mangaku dukamoki’ la umbaai lako banuanNa PUANG tu bunga’ bura padangta sia mintu’ bunga’ bua kayu, ke taunoi;

³⁶susi dukato tu anak muane pa’bunga’ta sia patuoanta, susi tu disura’ lan sukaran aluk: anta baai tu anak bunga’ sapinta sia anak bunga’ dombata sia bembe’ta lako banuanNa Kapenombanta, iamotu lako tominaa, tu umpogau’ kamenomban lan banuanNa Kapenombanta.

³⁷Sia la tabaa tu bunga’ ta’pung dalle sisikan — iamotu pa’durukta — sia mintu’ bunga’ bua kayu, uai anggoro’ ba’ru sia minna’ lako tominaa, dipatama bilik dio banua Kapenombanta sia taa sangpulona tu bura padangta la tabaa lako to Lewi, na tau iato mai, iamotu to Lewi, la urrampunni tu taa sangpulona lan lu mintu’ kotana to ma’lakoan padang.

³⁸Sia la den misa’ tominaa, bati’na Harun, la male sola tu mai to Lewi, ke attunnai tu to Lewi unduruk taa sangpulona, sia la naala to Lewi taa sangpulona dio mai tu taa sangpulona nabaai lako banuanNa Kapenombanta, tama bilik pa’palumpunan.

³⁹Belanna tama bilik iato sipatu tu to Israel sia to Lewi la umbaai tu gandung pa’duruk, uai anggoro’ ba’ru sia minna’; inde to dio nanii tu mintu’ pareanan maindan sia nanii tominaa umpogau’ kamenomban sia to ma’kampa babangan sia tomenani. Iatu banuanNa Kapenombanta tae’ tala umpopa’elo’nai.