Read Toraja-Sa'dan NEHEMIA 12 Bible Online

NEHEMIA 12 - Toraja-Sa'dan bible

NEHEMIA 12

¹Inde sia tu mintu’ to minaa sia to Lewi, tu ke’de’ sola Zerubabel, anakna Sealtiel sia Yesua, iamotu Seraya, Yeremia, Ezra.

²Amarya, Malukh, Hatus,

³Sekhanya, Rehum, Meremot,

⁴Ido, Ginetoi, Abia,

⁵Miyamin, Maaja, Bilga,

⁶Semaya, Yoyarib, Yedaya,

⁷Salu, Amok, Hilkia na Yedaya, mintu’nate iamo pangulu tominaa sia mintu’ siulu’na tonna linona Yesua.

⁸Na iatu to Lewi, iamotu Yesua, Binui, Kadmiel, Serebya, Yehuda na Matanya. Tau iamote sola mintu’ siulu’na ullopian torroan to menani.

⁹Iatu Bakbukya na Uni, siulu’na tau iato mai bendan sitingoan menani lan kamenomban.

¹⁰Iatu Yesua undadian Yoyakim; Yoyakim undadian Elyasib; Elyasib undadian Yoyada;

¹¹Yoyada undadian Yonatan; Yonatan undadian Yadua.

¹²Iatonna linona Yoyakim iami to minaa, tu pangulunna rapu: dio rapunna Seraya, iamotu Meraya; dio mai Yeremia, iamotu Hananya,

¹³dio mai Ezra, iamotu Mesulam; dio mai Amarya, iamotu Yohanan;

¹⁴dio mai Melikhu, iamotu Yonatan; dio mai Sebanya, iamotu Yusuf;

¹⁵dio mai Harim iamotu Adna; dio mai Merayot, iamotu Helkai;

¹⁶dio mai Ido, iamotu Zakharia; dio mai Gineton, iamotu Mesulam;

¹⁷dio mai Abia, iamotu Zikhri; dio mai Minyamin, dio mai Moaja, iamotu Piltai;

¹⁸dio mai Bilga; iamotu Samua; dio mai Semaya, iamotu Yonatan;

¹⁹dio mai Yoyarib, iamotu Matnai; dio mai Yedaya, iamotu Uzi;

²⁰dio mai Salai, iamotu Kalai; dio mai Amok, iamotu Heber;

²¹dio mai Hilkia, iamotu Hasabya; dio mai Yedaya, iamotu Netaneel.

²²Iatu to Lewi tonna linona Elyasib, Yoyada, Yohanan na Yadua, disura’ tu pangulu rapunna; na mintu’ to minaa tonna kadatuanna Darius, to Persia.

²³Iatu bati’na Lewi, iamotu mintu’ pangulu rapu disura’mo lan sura’ ossoran, sae lako linona Yohanan, anakna Elyasib.

²⁴Iatu pangulunna mintu’ to Lewi, iamo Hasabya, Serebya, na Yesua, anakna Kadmiel; iatu mintu’ siulu’na, tu bendan sitingoan, ma’dandanan siamping sisanglaoan, la umpakendek pa’pudi-pudian sia nanian pa’tendeng, situru’ tu pepasanna Daud, taunNa Puang Matua,

²⁵iamotu Matanya, Bakbukya na Obaja. Iatu to ma’kampa babangan, iamotu Mesulam, Talmon na Akub, tu ungkampai bilik pa’palumpunan lan babangan.

²⁶Mintu’nate sangbara’ linona Yoyakim, anakna Yesua, anakna Yozadak sia Nehemia, to maraa, sia Ezra, tominaa sia pandita sura’.

²⁷Iatonna dirara tu rinding tembo’ Yerusalem ditambaimi tu mintu’ to Lewi dio mai mintu’ inanna male lako Yerusalem, anna pogau’ pa’gauran mangrara sia umpopenani pa’pudi-pudian sia penanian napasiala taa’-taa’, dandi na katapi.

²⁸Sirampunmi tu mintu’ to menani la dio mai lili’na Yerusalem, la dio mai mintu’ kampongna to Netofa,

²⁹sia dio mai Bet-Gilgal sia padang nalili’ Geba sia Asmawet, belanna mintu’ to menani ma’tondokmo untikui Yerusalem.

³⁰Usseroimi kalena tu mintu’ tominaa sia to Lewi, namane usseroi tu to buda, sia mintu’ babangan sia rinding tembo’.

³¹Mangkato kusuami tu mintu’ pangulu to Yehuda kendek langngan rinding tembo’ sia kupaduang torroan tu to menani, sia kusua male sumonglo’; sangtorroan ma’palulako kanan unnola tembo’, lu lako babangan Au.

³²Undimi naturu’ Hosaya sia sesena pangulu to Yehuda;

³³sia Azarya, Ezra na Mesulam;

³⁴Yehuda, Benyamin, Semaya na Yeremia.

³⁵Ba’tu pira-pira passikola to minaa tu umbaa tarompe’, iamotu Zakharia, anakna Yonatan, anakna Semaya, anakna Matanya, anakna Mikha, anakna Zakur, anakna Asaf;

³⁶sia mintu’ siulu’na, iamotu Semaya, Azareel, Milalai, Gilalai, Maai, Netaneel, Yehuda na Hanani, umbaa oni-onianna Daud, taunNa Puang Matua. Na iatu Ezra, pandita sura’, male undoloanni.

³⁷Iatonna lendu’mo dio to’ babangan Kalimbuang, kendekmi langngan unnola eran kotana Daud dio tingayona, tu nanii rinding tembo’ ma’palulangngan, ullendu’i tongkonan layukna Daud, nake’de’ tu tau iato mai sae lako babangan Uai dio rampe matallo.

³⁸Iatu sangtorroan to menani tu ma’penduanna, tu male senga’ sitingoan tu misa’na sia undi kuturu’ sola tu sesena to buda, unnola rinding tembo’ ullendu’i menara Panglallangan sae lako rinding tembo’ kalua’;

³⁹ullendu’i babangan Efraim, babangan Tua na babangan Bale sia ullendu’i menara Hananeel sia menara Mea sae lako babangan Domba; tadangmi tu tau iato mai dio babangan Tarungku.

⁴⁰Iatu to menani duang torroan bendan lan banuanNa Puang Matua; ia duka tu aku sia sesena pangulu kusisolan,

⁴¹sia tominaa Elyakim, Maaseya, Minyamin, Mikhaya, Elyoënai, Zakharia, na Hananya umba tarompe’;

⁴²sia iatu Maaseya, Semaya, Eleazar, Uzi, Yohanan, Malkia, Elam na Ezer. Iatu to menani umpa’perangian gamaranna naindoran Yizrahya.

⁴³Allo iato napemalaran tau iato mai tu pemala’ buda; anna siparannu-rannuan, belanna Napaparannu tongan Puang Matua tu penaanna; ia duka tu mai baine sia iatu mai pia parannu-rannu, naurunganni iatu kaparannuanna tau lan Yerusalem mambela nanii karangian.

⁴⁴Allo iato dipamanassami tu ba’tu pira-pira to ungkapalai bilik pa’palumpunan, tu nanii apa dirampun, iamotu pa’duruk, bunga’na bura padang sia patuoan na taa sangpulona mintu’ apa; na inde to dinii umpasirampunni tu pa’duruk dipamanassamo lan sukaran aluk, nadisorong lako to minaa sia to Lewi, sitinaya kakapuanna pa’lak sikandappi’ kota, belanna iatu to Yehuda umpoparannui tu to minaa sia to Lewi, tu umpogau’ kamenomban.

⁴⁵Belanna nakaritutui tongan tu kapengkaolanna lako Kapenombanna sia kausseroianna mintu’ tau sia mintu’ barang apa; susi dukato tu to menani sia to ma’kampa babangan unturu’ pepasanna Daud sia Salomo, anakna muane.

⁴⁶Belanna tempon diopa mai linona Daud sia Asaf naranduk den tu to menani sia nanian umpudi sia untendeng Puang Matua.

⁴⁷Iatonna linona Zerubabel sia linona Nehemia iatu mintu’ to Israel ussorong pa’duruk lako to menani sia to ma’kampa babangan, pada tu parallunna kiallo-kiallo; sia nasorong tu pamengan maindan lako to Lewi, anna to Lewi ussorongi lako bati’na Harun.