Read Toraja-Sa'dan NEHEMIA 13 Bible Online

NEHEMIA 13 - Toraja-Sa'dan bible

NEHEMIA 13

¹Attu iato dibasa tu sura’na Musa, anna rangii bangsa iato, anna diappa’ disura’ lan, kumua tae’ len nama’din tu to Amon ba’tu to Moab tama kombonganNa Puang Matua,

²belanna tau iato mai tae’ napatammui roti sia uai tu to Israel sia nasaroi tu Bileam la unneai tu to Israel sia la untampakki ropu tu tau iato; apa Napopembali Kapenombanta pa’passakke tu pa’tampak ropu iato.

³Iatonna rangimi tau iato mai tu Sukaran aluk, nasarakkimi tu mintu’ to tang massang Israel lan mai to Israel.

⁴Iato pura lendu’na dio mai attu iate iatu to minaa Elyasib, tu diangka’ ungkampai ba’tu pira-pira bilik lan banuanNa Kapenombanta, tu sisangdadian Tobia,

⁵naparandanammi tau iato tu misa’ bilik kapua, tu dolona dinii umbaa kande dipemalaran, dupa, mintu’ pareanan sia taa sangpulona mintu’ gandung, uai anggoro’ ba’ru sia minna’, taa dipamanassan mintu’ to Lewi, to menani na to ma’kampa babangan, sia pa’durukna mintu’ tominaa.

⁶Apa iatonna dadi tu mintu’ apa iato, tae’ angku dio Yerusalem, belanna iatonna taun ma’tallungpulona ndua kaparentanna Artahsasta, datu Babel, malemo’ umpennoloi datu. Apa iatonna ba’tu sangapa-apamoto, messimanmo’ lako datu la sule.

⁷Iatongku rampomo lako Yerusalem, kuissanmi tu penggauran kadake, tu napogau’ Elyasib, belanna umparandanan bilik Tobia dio to’ tarampak banuanNa Puang Matua.

⁸Lendu’ tongan mapa’dikna penaangku tu dionato, iamoto angku pembuanganni lako salian tu mintu’ pengkaranganna Tobia.

⁹Sia kupesuan anna diseroi tu mai bilik iato, kumane umpatamai sule tu mintu’ pareanan banuanNa Puang Matua sola kande dipemalaran sia dupa.

¹⁰Sia kuissan duka, kumua iatu pa’duruk tae’ nadisorong lako to Lewi, naurungan iatu to Lewi sia to menani, tu umpogau’ kamenomban, pantan naparuku bang sule lako to’ pa’lakna.

¹¹Kusengkeimi tu mintu’ pangulu tu diona apa iato sia ma’kadana’ kukua: Ma’apai misa’bianganni tu banuanNa Puang Matua? Kurampunmi sule tu tau iato sia kupatama pentoeanna sule.

¹²Iatu mintu’ to Yehuda nabaaomo tu taa sangpulona mintu’ gandung, uai anggoro’ ba’ru na minna’ tama bilik pa’palumpunan.

¹³Kuangka’mi tu to umpangului bilik pa’palumpunan, iamotu to minaa Selemya, na Zadok, pandita sura’, na Pedaya dio mai to Lewi; na iatu to untundui iamotu Hanan, anakna Zakur, anakna Matanya. Belanna nasanga tau to manappa’ tu tau iato mai, dipapassannimi la untaa-taai tu apa lako siulu’na.

¹⁴Kilalaina’, o Kapenombangku, tete dio tu mintu’nate sia da Miputtai tu penggauran melo, tu kupogau’ lako banuanNa kapenombangku sia mintu’ atoranna.

¹⁵Attu iato kutiromi tu ba’tu pira-pira tau lan Yehuda tu umparra bua anggoro’ tonna allo katorroan, sia umbaai tu ba’tu pirang-pirang uyun gandung, nateke’ dao keledai, sia ia duka tu uai anggoro’, bua anggoro’, bua ara sia mintu’ apa diteke’, tu nabaa lako Yerusalem tonna allo katorroan. Kuta’tan tu tau iato, tonna umbalukan kande.

¹⁶Iatu to Tirus, tu ma’tondok dio, umbaa bale sia ma’rupa-rupa balukan, tu nabalukan tonna allo katorroan lako to Yehuda sae tama Yerusalem.

¹⁷Attu iato kusengkeimi tu to mala’bi’na to Yehuda tu diona apa iato sia ma’kadana’ kukua: Umbara susitu penggauran kadakemi te mipogau’, belanna tang mipamadatu tu allo katorroan?

¹⁸Tang napogau’raka ambe’mi susite, napobannangi Kapenombanta umparampoiki’ te kamandasan iate sia iate mai kota? Ammi sarrang pole’oi tu kare’dekan ara’ lako to Israel, ke tang umpamadatukomi allo katorroan?

¹⁹Iake kasisalan taumi bongi dio babangan Yerusalem, ke la nalambi’mi allo katorroan, kusuami untutu’i tu babangan sia kupasan kumua da nabungka’i tau, ke tae’pi nalendu’ tu allo katorroan. Sia kusua tu ba’tu pira-pira taungku ungkampai tu babangan iato, da nadibaa tama tu pamaa, ke allo katorroan.

²⁰Ma’bongimi tu mintu’ pa’balili sia to umbalukan ma’rupa-rupa balukan pissan ba’tu penduan dio salian Yerusalem.

²¹Kupakilalami tu tau iato mai kukua: Ma’apai ammi ma’bongi dio salian rinding tembo’ iate? Iake mipogau’pi pissanto, manassa kutingkankomi. Randuk attu iato tae’mo nasae tu tau iato mai, ke allo katorroan.

²²Sia kusua duka usseroi kalena tu mintu’ to Lewi sia la sae ungkampai babangan, kumua anna dipamadatu tu allo katorroan. O Kapenombangku, kilalaina’ belanna diona duka te apa iate sia kamaseina’ sitinaya kakapuanna kamasokanamMi.

²³Iatu attu iato kutiro duka tu ba’tu pira-pira to Yahudi umpobaine to Asdod, to Amon sia to Moab.

²⁴Iatu anakna tau iato mai sangsese ma’basa Asdod, tae’ natandai ma’basa Yahudi, sangadinna pantan unturu’ basana tu bangsa iato.

²⁵Kusengkeimi tu tau iato mai, sia kugatai, sia ba’tu pira-pira kubamba sia kulampi’ beluakna sia kupopassumpa tete dio sanganNa Puang Matua, kumua: Da mipa’benganni tu anakmi baine sibali anakna bangsa iato sia da mialai tu anakna bangsa iato la napobaine anakmi ba’tu kumua la umpobainei.

²⁶Tae’raka nabannang iate nanii Salomo datu Israel, umpogau’ kasalan? Moi nadio lu mintu’ bangsa, tu buda tongan, tae’ misa’ datu tu sangtintinna sia iamo pa’kaboro’Na Kapenombanna, sia Naangka’ Puang Matua la undatui mintu’ to Israel, nabannang dio tu baine bangsa senga’ anna iatu datu umpogau’ kasalan.

²⁷Umba la kukua umperangiikomi, namipogau’mo te kakadakean kapua sia tang maruru’komi langngan Kapenombanta, belanna umpobainekomi bangsa senga’?

²⁸Iatu anakna Yoyada misa’, anakna Elyasib, tominaa kapua, iamo anak minintunna Sanbalat to Horoni. Iamoto angku rambai male.

²⁹O Kapenombangku, kilalai tu tau iato mai, belanna naruttakki tu kaminaan sia basse kaminaan sia to Lewi.

³⁰Kuseroimo tu tau iato mai dio mai mintu’ apa to senga’; sia kupamanassa tu toeanna mintu’ tominaa sia to Lewi, pada dipapatui pengkaranganna;

³¹susi dukato tu to umbaa kayu, ke attu dipamanassanni sia bunga’na bura padang sia patuoan. Kilalaina’, o Kapenombangku, angku pomeloi.