Read Toraja-Sa'dan NEHEMIA 4 Bible Online

NEHEMIA 4 - Toraja-Sa'dan bible

NEHEMIA 4

¹Apa iatonna rangimi Sanbalat kumua kibangunmo sule tu rinding tembo’, re’dekmi tu ara’na sia mapa’dik tu penaanna. Natelle-tellemi tu to Yahudi,

²sia ma’kada dio olona siulu’na sia mintu’ surodadu Samaria nakua: Apa todaoia napogau’ tu to Yahudi langga’? Sipaturaka la dipopa’elo’na bang tu tau iato mai? Ma’dinraka la memala’? Ma’dinraka la namangkai allo totemo? Ma’dinraka la napatuo sule tu batu tembo’ ro’pok tu nakandemo api?

³Iatu Tobia, to Amon, bendan dio sa’dena, anna ma’kada nakua: Moi nabangunmi tau iato mai, apa iake denni misa’ sindallung ungkondongi tu batu rinding tembo’na, manassa la natuan. —

⁴O Kapenombangki, perangiimi dikka’ umba nakua tu kadibe’seangki sia pasule langnganni ulunna tau iato mai tu kapalo’bo-lo’boanna sia sorongi tu tau iato mai butung pangrampa tama tondok pa’paliran.

⁵Da Misamboi tu kakadakeanna tau iato mai sia da nadipa’dei tu kasalanna dio oloMi, belanna iatu tau iato mai umpa’dikki penaanna mintu’ tau ma’bangun sule. —

⁶Apa kibangun sule tu rinding tembo’ iato, anna sundunmo tu mintu’ rinding tembo’ sae lako sesena, belanna napa’inaai tu to buda mengkarang.

⁷Iatonna rangimi Sanbalat sia Tobia sia to Arab sia to Amon sia to Asdod kumua mukkunmo dipemeloi tu rinding tembo’ Yerusalem sia mintu’ lo’po’na dilepe’mo, re’dek tonganmi tu ara’na,

⁸sia sipakulu-kulu la ke’de’ ullaoi Yerusalem sia umpamarukkai.

⁹Apa massambayangkan lako Kapenombangki sia belanna iatu ampena tau iato mai kitiromo angki suai tu to ma’ronda’ allo bongi la umpangeaikanni.

¹⁰Ma’kadami tu to Yehuda nakua: Iatu kamatotoranna mintu’ to mamulle langga’mo, nabudapa tu batu tiserang-serang, kiurunganni tang pakullemo la umbangunni tu rinding tembo’.

¹¹Ma’kadami tu ualingki nakua: Tae’ nala unnissanni sia tae’ nala untandai, taurunganni lanmo lu tangnganna tau iato mai, anta patei sia tapatadangi tu pa’diaman.

¹²Apa iatonna saemo ba’tu pira-pira to Yahudi, tu torro sikandappi’ tau iato mai, umpokadangkan pessangpulo tu iannato, dio mai mintu’ tondok tu ma’mirringan lako kaleki,

¹³iamoto kuato’mi tu mintu’ tau diong inan mengkadiongan dio lu padang dio boko’ rinding tembo’, unturu’ pa’rapuanna, sibaa pa’dangna, dokena sia panana.

¹⁴Kutiromi angku ke’de’ sia ma’kada lako tu mai to la’bi’, pangulu sia mintu’ to buda, kukua: Da mikataku’i tu tau iato mai; kilalai tu Puang pasareongan sia dikabangnga’, ammi pararian mintu’ siulu’mi, anakmi muane sia anakmi baine, bainemi sia banuammi.

¹⁵Iatonna rangimi ualingki kumua kiissan nasangmo sia Nadampamo Puang Matua tu tangnga’na, ma’dinmokan sule nasang lako to’ rinding tembo’ pantan lako pa’diamanna.

¹⁶Sia randuk allo iato iatu taungku sesena mengkarang na iatu sesena untoe doke, balulang, pana sia ma’bayu kararran, na iatu mai kamandang bendan dio boko’na mintu’ to Yehuda,

¹⁷tu umbangun rinding tembo’. Iatu to mamulle ungkarang pengkaranganna susite: sangbali limanna mengkarang na iatu sangbalinna sitoe doke.

¹⁸Iatu mai to ma’bangun pantan sitakin pa’dangna, namarassan ma’bangun. Na iatu umpannoninna tarompe’ bendan dio sa’deku.

¹⁹Ma’kadamo’ lako tu mai to la’bi’, pangulu sia lako mintu’ to buda, kukua: Kapua tu pengkarangan iate sia kalua’ sia sisarak-sarakki’ dio mai to’ rinding tembo’ sia pada mambelamoki’ dio mai solata.

²⁰Umba-umba inan minii urrangi oni napiri tanduk, manassa la sirampunkomi lako kaleki. Na Kapenombanta la untunduiki’ parari.

²¹Susimokannito ungkarangi tu pengkarangan iato, na iatu sesena tau untoe doke randuk dio mai berre’na allo sae lako bu’tunna bintoen.

²²Sia attu ia dukato angku pa’peparentanni lako to buda kukua: Manassa la pantan ma’bongikomi sola taummi lan Yerusalem, ammi kampaikan ke bongi sia mengkarang ke allo.

²³Iatu aku sola mintu’ siulu’ku sia taungku sia mintu’ to ma’kampa tu unturu’na’, tae’ len kialai pakeangki. Pantan kitoe bang lima kananki tu dokeki.