Read Toraja-Sa'dan ESTER 7 Bible Online

ESTER 7 - Toraja-Sa'dan bible

ESTER 7

¹Tamami tu datu sola Haman la kumande sola Ester lan pa’maruasan.

²Ma’kada dukami tu datu tonna allo ma’penduan tonna marassan unniru’ uai anggoro’ lako Ester nakua: Apara palakummu, e datu baine Ester? Manassa la kupasituru’. Sia apara mukamorai? Moi anna sangsese kadatuan, la kuben dukako.

³Mebalimi tu datu baine Ester nakua: Iake denni kamaturu-turuammi lako kaleku, o datu, sia iake nakalo’i penaanna datu, ke ma’dinni mikamaseanna’ tu sunga’ku diona palakungku sia iatu sunga’na bangsaku sitinaya tu kukamoraianna.

⁴Belanna kami te mangkamokan dibaluk la aku la bangsaku, la disanggangi, dipatei sia disabu’i. Moronganna angki la dibaluk la mendadi kaunan sia kaunan baine, manassa la kappana’, apa iate kamandasan iate tae’ padanna tu mintu’ apa umparugi datu.

⁵Ma’kadami tu datu Ahasweros lako datu baine Ester, nakua: Mindara to sia umbara nanii, tu ponnomo penaanna la umpogau’i tu apa susito?

⁶Ma’kadami tu Ester nakua: Iatu pa’pakario-rio sia uali, iamotu Haman, to kadake iate. Tirambanmi tu Haman untiro lindona datu sia datu baine.

⁷Ke’de’mi tu datu re’dek ara’na, nasoro’i mangiru’ anggoro’, namale tama pa’lak tongkonan layuk; apa iatu Haman torro bendan la umpengkamoyan sunga’na lako datu baine Ester, belanna natandaimo, kumua manassamo tu kasanggangan lako kalena dio mai datu.

⁸Iatonna tibalikmo tu datu lan mai pa’lak tongkonan layuk tama bilik nanii mangiru’ anggoro’, lumbangmi tu Haman rokko bale-bale, tu nanii Ester mamma’-mamma’. Ma’kadami tu datu nakua: La morai dukako unggau’ sala datu baine lan tongkonan layukku! Iatonna tassu’mo te kada iate dio pudukna datu, nabungku’mi tau tu lindona Haman.

⁹Ma’kadami tu Harbona, misa’i to mase’ponna datu tu lan diamanna, nakua: Ondongpi tiro dukai tu lentong mangka nagaragai Haman la napassulai Mordekhai, tu mangka umpokada kameloanna datu bendanmo sikandappi’ banuanna Haman, limangpulo siku langka’na. Ma’kadami datu nakua: Sulai tu Haman dao.

¹⁰Nasulami tau tu Haman dao lentong tu napabendanan Mordekhai. Namane pa’de tu kare’dekan ara’na datu.