Read Toraja-Sa'dan ESTER 8 Bible Online

ESTER 8 - Toraja-Sa'dan bible

ESTER 8

¹Iatonna allo ia bangsiamoto nasorongmi datu Ahasweros lako datu baine Ester tu banuanna Haman, ualinna to Yahudi, na iatu Mordekhai dadimo to marengke’na datu, belanna napa’peissanammo Ester tu diona kasirapuanna.

²Nalossokkimi datu tu sissin peca’, tu mangka naala sule dio mai Haman, anna benni Mordekhai, sia naangka’mo Ester tu Mordekhai ungkampai banuanna Haman.

³Ma’kada pole’omi tu Ester dio olona datu, anna tukku umpenombai diong to’ lentekna, sia mengkamoya tumangi’, kumua nataeranni datu tu tangnga’ kadakena Haman, to Agag dio kasanggangan natangnga’ la ussabu’i to Yahudi.

⁴Naturomi tekken kadatuan bulaan tu Ester. Namane malimbangun tu Ester, nabendan dio olona datu.

⁵Ma’kadami nakua: Iake nakalo’i penaanna datu sia den kamaturu-turuanna datu lako kaleku sia iake nasangai datu tongan sia iake naalana’ penaanna datu, melo ke dipakatui misa’ sura’ tu la untaeranni tu mintu’ sura’ tu nanii pa’tangngaranna Haman, to Agag, anakna Hamedata, tu nasura’ kumua la ussabu’i mintu’ to Yahudi lan mintu’ propinsi tu naparenta datu.

⁶Belanna umbara la kukua ungkullei la untiroi tu kamandasan urrampoi bangsaku sia umbara dikka’ la kukua ungkullei la untiroi tu kasangganganna mintu’ pa’rapuangku?

⁷Ma’kadami tu datu Ahasweros lako datu baine Ester sia lako Mordekhai, tu to Yahudi iato nakua: Manassa iatu banuanna Haman kusorongmo lako Ester na iatu kalena Haman mangkamo disula dao lentong, belanna umpata’pai lima to Yahudi.

⁸Totemo la massura’komi diona to Yahudi tu misanganna melo tete dio sanganna datu, ammi ca’i sissin peca’na datu; belanna misa’ sura’, tu disura’ tete dio sanganna datu sia dica’ sissin peca’na datu tae’mo nama’din diriu’ sule.

⁹Attu ia dukato tonna allo ma’duangpulo ntallu bulan ma’pentallunna — iamotu bulan Siwan — ditambaimi tu to massura’na datu, anna sura’i tu mintu’ apa napa’pepasanan Mordekhai, diparampo lako to Yahudi sia lako tomaraa lompo sia lako tomaraa sia lako arungna propinsi, randuk dio mai India sae lako Etiopia den saratu’ duangpulo mpitu propinsi, pantan simisa’ propinsi disura’ lan passura’na sia simisa’ bangsa disura’ lan basana, susi duka lako to Yahudi lan passura’na sia lan basana.

¹⁰Nasura’mito tete dio sanganna datu Ahasweros sia naca’i sissin peca’na datu, napakatumi tu mintu’ sura’ iato nabaa ba’tu pira-pira to pambaa sura’ malinta’, tu messake, ussakei darang kadatuan, darang pa’songko’,

¹¹kumua napalalo datu tu mintu’ to Yahudi lan lu mintu’ kota la sirampun sia la ungkaritutui sunga’na, sia ussanggangi sia umpatei sia ussabu’i mintu’ to ma’pa’buno dio lu mintu’ bangsa sia propinsi tu sae ullaoi, sisola tu mai bainena sia anakna, anna rampai tu iananna tau iato mai,

¹²lan sangallo lan mintu’ propinsinna datu Ahasweros, iamotu allo ma’pessangpulo tallunna bulan ma’pessangpulo duanna, iamotu bulan Adar.

¹³Iatu pallemba’na sura’ iato la dipaissanan tau lan mintu’ propinsi butung misa’ atoran lako mintu’ bangsa, kumua nama’parandan tu mintu’ to Yahudi allo iato la membala’ lako mintu’ ualinna.

¹⁴Male nasangmi tu mintu’ pambaa sura’ malinta’ ussakei darang kadatuan masia’ tongan lumingka unturu’ parentana datu na iatu atoran iato dipa’peissanan lan kota benteng Susan.

¹⁵Tassu’mi tu Mordekhai ma’pake pakean kadatuan ma’rupa lango-lango sia lenang, ma’tali bulaan sia ma’bayu lamba’ lenang mellong sia lango-lango makaseda. Siarrakammi sia parannu-rannumi tu mintu’ to lan Susan.

¹⁶Ombo’mi kamasiangan dio lu to Yahudi sia kaparannuan sia kasendean sia kadipangkeran.

¹⁷Sia dio duka lu mintu’ propinsi sia kota, umba-umba nii iatu kada sia atoranna datu rampomo, denmi tu kaparannuan sia kasendean sia pa’maruasan sia allo kapua dio lu to Yahudi sia buda tu mai bangsa lan tondok tamamo sangbilangan to Yahudi, belanna narampoimo kamatakuran ungkataku’ to Yahudi.