Read Toraja-Sa'dan KATASSURAN 1 Bible Online

KATASSURAN 1 - Toraja-Sa'dan bible

KATASSURAN 1

¹Inde sia tu sanganna Israel tu male lako Mesir sola Yakub; rampomi lako tu tau iato mai pantan umbaa repokna, iamotu:

²Ruben, Simeon, Lewi na Yehuda.

³Isakhar, Zebulon na Benyamin.

⁴Dan na Naftali, Gad na Asyer.

⁵Iatu mintu’ bati’na Yakub den pitungpulo, apa iatu Yusuf diomo ia Mesir.

⁶Iatonna matemo tu Yusuf sola mintu’ siulu’na sia mintu’ to dadi attu iato,

⁷marapuammi tu to Israel sia satumale’-male’na sia memba’ka’ kalle-kallean sia sakerangngan-rangnganna, naurunganni nasitutu’imo tu tondok.

⁸Ta’kala denmi misa’ datu ba’ru umparenta Mesir, tang untandaimo Yusuf.

⁹Nakuami tu datu iato lako taunna: Iatu bangsa to Israel sabuda-budannamo sia mandu mawatang na kita.

¹⁰Melo tapatamanni tangnga’, tu tau iato mai, da nasakerangngan-rangnganna sia da duka nasama turu’ ualinta urrariiki’, ke parariki’, anna tassu’ lan mai tondok iate.

¹¹Naangka’mi ba’tu pira-pira tu kapala bandoro’ la umpabokkokki pa’diaman tu tau iato mai; napabendanammi Firaun tau iato mai tu kota pa’palumpunan, iamotu Pitom na Raamses.

¹²Apa sanapakario-riona to Mesir tu tau iato mai, sakerangngan-rangnganna sia samemba’ka’-ba’ka’na, naurunganni nakagiang to Mesir tu to Israel.

¹³Napandasa tongan to Mesir nasua mengkarang tu to Israel.

¹⁴Napemaparri’i tu katuoanna tau iato mai nasua mengkarang magasa, iamotu unggaraga pi’da’ litak sia batu tela sia lakoan padang; mintu’ pengkarangan iato nasua ungkarangi napandasa tongan.

¹⁵Sia nakuapa datu Mesir lako to ma’pakianakna to Ibrani, misa’ disanga Sifra na misa’ disanga Pua:

¹⁶Iammi pakianak baine to Ibrani, tiro meloi ke kianakmi: iake pia muane tu anakna la mipatei, apa iake pia baine, da’ito natuo.

¹⁷Apa mataku’ tu to ma’pakianak iato lako Puang Matua sia tae’ naturu’i tu kadanna datu Mesir, sangadinna napatuo tu mintu’ pia muane.

¹⁸Napopetambaimi datu Mesir tu to ma’pakianak iato, nama’kada lako nakua: Ma’apai mima’gau’ susito, ammi patuoi tu mintu’ pia muane?

¹⁹Ma’kadami tu to ma’pakianak lako Firaun, nakua: Iatu baine Ibrani tae’ nasusi baine Mesir, matoto’ ia tu tau iato mai; tae’pa narampo lako tu to ma’pakianak na inang kianakmo.

²⁰Iamoto Napogau’i Puang Matua tu kameloan lako to ma’pakianak iato; sakerangngan-rangngannami tu bangsa iato sia memba’ka’ kalle-kallean.

²¹Belanna nakataku’ to ma’pakianak iato tu Puang Matua, iamoto Napamasakke-sakkei tu tananan dapo’na.

²²Mesuami tu Firaun lako mintu’ taunna, nakua: Mintu’ tu pia muane la dadi, tae’ mitang la umpembuanganni rokko salu Nil, apa iatu mintu’ pia baine patuoi.