Read Toraja-Sa'dan KATASSURAN 10 Bible Online

KATASSURAN 10 - Toraja-Sa'dan bible

KATASSURAN 10

¹Ma’kadaomi tu PUANG lako Musa, Nakua: Malemoko umpennoloi Firaun, belanna Kupabattukmo tu penaanna sia penaanna mintu’ to mase’ponna, kumua angKu paden mintu’ tanda mangngaKu dio lu tau iato mai.

²Sia ammu potuleranni lako mintu’ ampo bati’mu tu apa Kuparampo untelle to Mesir sia mintu’ tanda mangnga tu Kupaden dio lu tau iato mai, ammi issanni, kumua Akumo tu PUANG.

³Malemi tu Musa sola Harun umpennoloi Firaun, anna kuai lako: Nakua kadanNa PUANG, tu Kapenombanna to Ibrani: Sangapapoko manoka la tunduk dio oloKu? Eloranni tu taungKu male anna menomba lako Kaleku!

⁴Belanna iake manokako unneloranni tu taungKu male, manassa masiang angKu pasae batik lan mintu’ lili’na tondokmu.

⁵Batik iamoto la ussitutu’i te padang iate, naurunganni tae’mo paan tu padang; iamo la umpepurai nakande tu mintu’ tananan, tu torronapa, tu denna siapa, nara’dakangkomi uran batu, sia iamo la umpepurai nakande tu kayu tuo dio lu padangmi.

⁶Batik iamoto la ussamboi tu tongkonan layukmu sia banuanna mintu’ to mase’ponmu sia mintu’ banuanna to Mesir; iatu iannato tae’ bangpa natiroi ambe’mu ba’tu nene’ to dolomu dio mai randukna tau iato mai lolang lan lino sae lako allo iate. Memboko’mi tu Musa, anna sere dio mai olona Firaun.

⁷Ma’kadami tu mintu’ to mase’ponna Firaun lako Firaun, nakua: Sangapapara te tau iate la butung poya lako kaleta? Eloranni tu muane iato mai male menomba lako PUANG, Kapenombanna. Tae’paraka miissanni, kumua iatu tondok Mesir la sabu’mo?

⁸Nasolammi tau tu Musa sola Harun sule umpennoloi Firaun, nakuami Firaun ungkuanni: Malemokomi menomba lako PUANG, Kapenombammi! Minda siara tu la male to?

⁹Ma’kadami tu Musa nakua: Mintu’kanni la male la matua, la mangura sia mintu’ anakki muane sia baine sia la ungkaloli’kanni mintu’ sapingki sia dombaki belanna diomo kaleki tu misa’ pa’gauran lako PUANG.

¹⁰Nakuami Firaun ungkuanni sola duai: Na PUANGmora urrondongkomi, ke la susinna kupalalokomi male sola tu mai anakmi! Kanandaimi, dako’pa naruakomi kasanggangan.

¹¹Tae’ ia nasusito, sangadinna kamu manna tu muane, malemokomi menomba lako PUANG, belanna susimoto tu palakummi. Narambaimi tu tau sola duai dio mai olona Firaun.

¹²Ma’kadami tu PUANG lako Musa, Nakua: Angka’i tu limammu, mupapatui tu tondok Mesir, anna kendek tu batik ussamboi tondok Mesir, la umpepurai nakande tu mintu’ tananan dio lu padang, tu mintu’ nara’dakna siapa uran batu.

¹³Naangka’mi Musa tu tekkenna umpapatui tondok Mesir, pakalan Napasaemi PUANG tu angin lu dio mai rampe matallo tama tondok iato sangallo sangbongi, na iatonna masiang ta’pa napakendekmi angin matallo tu mintu’ batik.

¹⁴Kendekmi tu batik dio lu tondok Mesir, nasitutu’i tu mintu’ lili’na, lendu’ budanna; tu dolona tae’ bangpa batik buda susito, sia undinna tae’ duka la susito.

¹⁵Batik iato ussitutu’imo mintu’ padang, naurungan pi’tuk tu tondok; na iatu mintu’ tananan dio lu padang sia mintu’ bua kayu tu nara’dakna siapa uran batu, tappu’ nasang nakande batik; na iatu malunanna dio lu kayu sia dio lu mintu’ tananan lan nalili’ tondok Mesir tae’ bangmo narantang.

¹⁶Attu iato natikaraimi Firaun umpopetambai tu Musa sola Harun, nakuami: Kasalammo’ lako PUANG, Kapenombammi, sia lako duka kamu.

¹⁷Totemo te pagarri’pi tu kasalangku, ammi mengkamoya langngan PUANG, Kapenombammi, anNa pasoro’i dio mai kaleku te kamandasan mepatei.

¹⁸Soro’mi tu Musa dio mai olona Firaun, anna mengkamoya langngan PUANG.

¹⁹Napasaeammi PUANG angin matampu’ lendu’ ma’pamumbukna, anna iatu mintu’ batik napettiaran, napoli’i tama tasik Teberau; moi misa’ batik tae’mo torro lan mintu’ lili’na tondok Mesir.

²⁰Apa iatu penaanna Firaun Napamakarra’ duka PUANG, naurungan tae’ naeloranni tu to Israel male.

²¹Ma’kadami tu PUANG lako Musa, Nakua: Angka’i tu limammu langngan langi’, anna dadi kapi’tukan lan tondok Mesir, naurunganni ma’din nakaka’ tau.

²²Iatonna angka’mi Musa tu limanna langngan langi’, saemi tu kapi’tukan lendu’ mapattangna ussamboi tondok Mesir lan tallung allo.

²³Moi misa’ tau tae’ nasipebayo len sia moi misa’ tau tae’ napandiu dio inanna lan to tallung allo, sangadi lako manna to Israel nanii masero lan mintu’ inan napa’tondokki.

²⁴Attu iato napopetambaimi Firaun tu Musa, anna kuanni, kumua: Malemokomi, ammi menomba langngan PUANG, iatu mintu’ sapimmi sia dombami da’ito natorro bangmo, apa iatu mintu’ anakmi ma’dinmo misolan.

²⁵Apa nakua Musa lako: Inang la mibenkan tu sapi sia domba, la kipopemala’ pangrere’ sia la kipopemala’ ditunu pu’pu’, sia la kiparandanan PUANG, Kapenombangki.

²⁶Iatu mintu’ patuoangki la kibaa, moi misa’ kalungkungna tae’ angki la umpatorroi, belanna dio mai mintu’nato la kinii unnalai, tu la Kipenombanna langngan PUANG, Kapenombangki; belanna iake tae’pi kirampo lako, tae’pa kiissanni umbanna tu sipatu la kipenomban langngan PUANG.

²⁷Apa iatu penaanna Firaun Napamakarra’ PUANG, naurungan tang unneloranni tu tau iato mai male.

²⁸Ma’kadami tu Firaun lako Musa, nakua: Pallaiko dio mai oloku! Kanandai tongan-tonganni, da mutiro polei tu lindoku, belanna iake mutiroi tu lindoku, manassa la dipateiko.

²⁹Nakuami Musa: Tonganmo te kadammi; moi pissan tae’mo kula untiro lindomi.