Read Toraja-Sa'dan KATASSURAN 11 Bible Online

KATASSURAN 11 - Toraja-Sa'dan bible

KATASSURAN 11

¹Mangkamo tu PUANG ma’kada lako Musa, Nakua: Misa’mora tu kamandasan la Kuparampo lako Firaun sia lako tondok Mesir, namane unnelorangkomi sola nasang male; iake naelorammokomi male la naparukumokomi mallai madomi’.

²Totemo pokadanni to buda, kumua: Simisa’-misa’ muane sia baine la umpalakui lako sangbanuanna tu parea salaka sia bulaan.

³Tete dio pa’poraianNa PUANG anna kasokanni to Mesir tu to Israel, ondongpi iatu Musa to paa lan tondok Mesir, nakasiri’ mintu’ to mase’ponna Firaun sia mintu’ to Mesir.

⁴Sia nakuapa Musa: Nakua kadanNa PUANG: Agi-agi ma’tangnga bongi, angKu salongi te tondok Mesir.

⁵Mintu’ anak pa’bunga’ lan tondok Mesir la mate, randuk dio mai anak pa’bunga’na Firaun tu la unnisung dao isungan kapayunganna sae lako anak pa’bunga’na kaunan baine dio boko’na pa’ta’pungan sia anak bunga’na mintu’ patuoan.

⁶La sianglean tu tau lan lili’na mintu’ tondok Mesir, tu tae’pa nadadi len sia tae’mo na la dadi len.

⁷Apa dio lu to Israel, moi misa’ asu tae’ pandiu umburoroi sia la ungkeke’i tu to lino ba’tu patuoan, dikua ammi issanni, kumua iatu PUANG umpasilaenan to Mesir na to Israel.

⁸Attu iato mintu’ te to mase’ponmi la mengkalao anna rampo umpellambi’ina’ sia tukku dio tingayoku, nakua: Malemokomi sola tu mai to unturu’ bate lalanmi; attu iamoto angku male. Soro’mi tu Musa dio mai olona Firaun, nakabu’ liu kasengkeanna.

⁹Ma’kadami tu PUANG lako Musa, Nakua: Iatu Firaun tae’ naturu’i tu kadammi, dikua anna iatu mintu’ tanda kalle-kalleangKu dipabuda lan tondok Mesir.

¹⁰Mintu’ tanda kalle-kallean iate napogau’ Musa sia Harun dio olona Firaun. Apa iatu penaanna Firaun Napamakarra’ PUANG, naurungan tang naeloran tu to Israel tassu’ lan mai tondokna.