Read Toraja-Sa'dan KATASSURAN 12 Bible Online

KATASSURAN 12 - Toraja-Sa'dan bible

KATASSURAN 12

¹Ma’kadami tu PUANG lako Musa sia Harun dio tondok Mesir, Nakua:

²Bulan iamote tu la mipobulan pamulanna mintu’ bulan, iamo la mipobunga’na mintu’ bulan lan sangtaun.

³Pokadami lako mintu’ kasirampunan to Israel susite: Iake allo ma’pessangpulonami bulan iate, pantankomi la unnalan kalemi misa’ anak domba sitinaya rapummi, iamotu misa’ anak domba, ke sangdapo’oi.

⁴Iake makurangi tu pangala banua ke sangdapo’oi la naalan kalena misa’ domba, melo ke sisolai sangbanuanna, tu nasiruranan unturu’ bilanganna pangala banua; la miagian sia la mipasipatuan kalemi tu anak domba iato.

⁵La muala tu misa’ anak domba laki tang tattan, tu sangtaunnamo; iamotu dio lu mintu’ domba ba’tu bembe’ la minii unnalai.

⁶La miparandanmo sae lako allo ma’ pessangpulo a’pa’na bulan iate, anna mintu’ kasirampunan, iamotu kombonganna to Israel pantan la urrere’i ke makaroenmi.

⁷Iatu rarana la naala, anna todingi tu da’dua patongkon ba’ba sia ampang daona lu ba’ba banua, tu inan nanii tau ungkandei.

⁸Bongi ia dukamoto, anna kandei tau iato mai tu duku’na, tu dirarangna sia roti tang diragii, anna pasikandei utan mapai’.

⁹Da mikande mamatai ba’tu iake ditollo’i, sangadipi ke dirarangi sola tu mai ulunna, pupunna sia tambuk barinni’na.

¹⁰Sia da mipatorroi tu misesanna sae lako masiangna; ianna denpa misesanna sae lako melambi’, la mitunu pu’pu’.

¹¹Susimo a’gannato la minii ungkandei, la ma’tambeke’komi, sia la massepatukomi, ammi toe tekken; ammi sarra’i ungkandei; iamoto tu Pa’pasa dipakarayan PUANG.

¹²Bongi ia dukamote angKu la ussalongi tondok Mesir sia la umpata’pai lima tu mintu’ anak pa’bunga’ lan Mesir, la to lino sia olo’-olo’; sia la Kupaolai salunna tu mintu’ deatanna to Mesir, tonganna Akumo tu PUANG.

¹³Iatu rara iamo la dadi misa’ tanda lako kalemi dio lu banua minii; iangKu tiromi tu rara iato la Kulendu’imokomi, naurungan tae’ kamandasan mesanggangan dio lu kalemi, ke Kupata’paimi lima tu tondok Mesir.

¹⁴Allo iate la dadi misa’ allo kapengkilalaiammi; allo iato la mipakaraya iamo pa’gauran dinii umpakala’bi’ PUANG; ammi siosso’i umpakarayai butung aluk matontongan.

¹⁵La ungkandekomi roti tang diragii pitung allo, apa ia bangsiamo tu allo bunga’na la minii untibei tu mintu’ ragi lan mai banuammi, belanna minda-minda ungkande apa-apa diragii randuk allo tipamulanna sae lako allo ma’pempitu, la disabu’i lan mai to Israel.

¹⁶Iato allo tipamulanna na allo ma’pempitunna la den kasirampunan masallo’, allo iato tae’ nama’din tau mengkarang, sangadinna ia manna tu la mikandena simisa’-misa’ ma’din mipasakka’.

¹⁷Karitutuimi tu aluk ungkande roti tang diragii, belanna allo ia dukamote Kusolangkomi tassu’ lan mai tondok Mesir. Iamoto karitutui te allo iate misiosso’i umpoaluk matontonganni.

¹⁸Lan to bulan pamulanna, allo ma’pessangpulo a’pa’na, makaroen la mikande tu roti tang diragii sae lako allo ma’penduangpulona mmisa bulan iato, ke makaroenmi.

¹⁹Lan to pitung allo, tae’ mila unnanna ragi lan banuammi, belanna minda-minda ungkande apa diragii, iamo la disabu’i lan mai kasirampunanna to Israel la to sae la pa’tondokan.

²⁰Moi misa’ tae’ mima’din ungkandei tu apa diragii, sangadinna mintu’komi la ungkande roti tang diragii lan tondokmi.

²¹Natambaimi Musa tu mintu’ to matua-tua to Israel la sirampun, anna kuanni: Malemokomi ammi alanni anak domba tu mintu rapummi, ammi rere’i tu Pa’pasa.

²²Alami tu supa sangpori, otonni tama to’ rara lan pindan, tedokki tu rara iato lan mai pindan lako ampang daona lu sia lako to da’dua patongkon ba’ba, na iatu kamunna, moi misa’ da mitassu’ len lan mai ba’ba banuammi sae lako masiangna.

²³Iake sumalongmi tu PUANG lan tondok la umpata’pai lima to Mesir, Natiroi tu rara iato dio ampang ba’ba daona lu sia dio to da’dua patongkon ba’ba, la Nalendu’i PUANG tu ba’ba iato, tae’ Naeloranni tu to pasanggang la tama banuammi la ma’kasolang-solang.

²⁴Karitutuimi te pepasan iate; padadii aluk tipondok matontongan lako kalemi sia lako mintu’ tarukmi.

²⁵Ke tamakomi tondok tu la Nakamaseangkomi PUANG, susitu Napokadanna, la mikaritutui te kamenomban iate.

²⁶Sia iake nakutanaikomi anakmi, kumua: Kamenomban apara tu mipogau’?

²⁷La mikua mebali: Iamote tu pemala’ Pa’pasa dipemalaran lako PUANG, tu lendu’ mana’pa dio mintu’ banuanna to Israel dio tondok Mesir tonna dipata’pai lima tu to Mesir, Nakatirinnai tu mintu’ banuanta. Sangtukkuammi tu to buda, anna menomba:

²⁸Malemi tu to Israel umpogau’i susitu Napasanna PUANG lako Musa sia Harun, susimo napogau’ to.

²⁹Iatonna ma’tangngamo bongi Napata’paimi lima PUANG tu mintu’ anak pa’bunga’ lan tondok Mesir randuk dio mai anak pa’bunga’na Firaun, tu la unnisung dao isungan kapayunganna sae lako anak pa’bunga’na to dipattang lan pa’tarungkuan sia anak patuoan.

³⁰Bongi ia dukato millikmi tu Firaun sola mintu’ to mase’ponna sia mintu’ to Mesir, siangleammi tu tau lan tondok Mesir, belanna misa’oi banua tae’ tang nanii tau mate lan.

³¹Bongi ia dukato natambaimi Firaun tu Musa sola Harun, nakuanni: Ke’de’mokomi, tassu’mokomi lan mai mintu’ taungku, la kamu la to Israel; malemokomi ammi menomba lako PUANG, susitu kadammi.

³²Sia mintu’ dombami sia bembe’mi sia sapimmi la mibaa duka, susitu mipokada. Malemokomi ammi palakuan dukana’ kasalamaran.

³³Naparuku-rukumi to Mesir tu to Israel, anna madomi’ tassu’ lan mai tondokna, belanna nakua: mate nasangkan manii!

³⁴Naangka’mi tau iato mai tu ta’pung panglemongna, tu tang diragiipa, sola palungan roti napasibungku’i pakeanna, napadaoi palempengna.

³⁵Napogau’mi to Israel susitu napepasanan Musa, napalakui lako to Mesir tu parea salaka sia bulaan sia pakean.

³⁶Tete dio pa’poraianNa PUANG anna kasokanni to Mesir tu to Israel, naurungan unturu’i tu palakunna. Susimoto nanii unnalai tu ianan to Mesir.

³⁷Ke’de’mi tu to Israel, dio mai Raamses lako Sukot, agi-agi annan ratu’ sa’bunna muane, senga’pi tu mintu’ pia.

³⁸Sia buda tau dio mai ma’rupa-rupa bangsa male sola tau iato mai, sia bembe’ sia domba sia sapi lendu’ budanna patuoan.

³⁹Iatu ta’pung panglemong tu nabaa dio mai tondok Mesir, natunu pa’ranggina tang diragii, belanna tae’pa nadiragii, apa dipasassa’ lan mai tondok Mesir, naurungan tang pakala ma’parandan sia umpasakkaran kinallo kalena.

⁴⁰Iatu to Israel a’pa’ratu’ ntallungpulo taun masainna torro dio tondok Mesir.

⁴¹Iatonna ma’katampakannamo a’pa’ratu’ ntallungpulo taunna, allo ia duka bangsiamoto, natassu’ tu kaponanna taunNa PUANG lan mai tondok Mesir.

⁴²Bongi iato Nanii PUANG ma’kampa, la umpatassu’ tau iato mai lan mai tondok Mesir. Bongi iato iamo bongi nanii ma’kampa umpakaraya PUANG, tu sipatu napakala’bi’ tongan la nasiosso’i mintu’ to Israel.

⁴³Ma’kadami PUANG lako Musa sia Harun, Nakua: Inde sia tu apa dipondok diona Pa’pasa: iatu to sae moi misa’ duka da nakandei.

⁴⁴Apa iatu mintu’ ruranammu, tu mualli doi’, ke mangkami musunna’i ma’dinmo ungkandei.

⁴⁵Apa iatu to tama sae ba’tu to sumaro, da nakandei.

⁴⁶Manassa la dikande lan misa’ri banua. Da mubaai tu duku’ iato sun lan mai sia moi misa’ bukunna da mile’toi.

⁴⁷Mintu’ kombongan to Israel la umpogau’i to.

⁴⁸Iake denni misa’ to sae musolan torro, anna la umpogau’i tu Pa’pasa umpakaraya PUANG, manassa mintu’ taunna muane la disunna’ dolo, namane ma’din sae mentireke’ la umpogau’i, anna dipapada pa’tondokan, apa iatu tang disunna’na, inang tae’ nama’din la ungkandei.

⁴⁹Misa’ri atoranna tu pa’tondokan sia to sae.

⁵⁰Napogau’mi mintu’ to Israel susitu kadanNa PUANG lako Musa sia lako Harun, susi dukamo napogau’.

⁵¹Iatonna allo ia bangsiamoto Nasolanni PUANG tu mintu’ to Israel lan mai tondok Mesir unturu’ mintu’ kaponanna.