Read Toraja-Sa'dan KATASSURAN 13 Bible Online

KATASSURAN 13 - Toraja-Sa'dan bible

KATASSURAN 13

¹Ma’kadami PUANG lako Musa Nakua:

²Pamarimbanganni lako Kaleku tu mintu’ pa’bunga’, tu bunga’na urrubak pa’tambukan dio lu to Israel la to lino la patuoan; Aku tu Puangna.

³Ma’kadami Musa lako tu to buda, nakua: Kilalai te allo iate, iamotu allo katassurammi lan mai tondok Mesir, lan mai banua minii dipokaunan, belanna tete dio lima mawatang anNa solangkomi PUANG tassu’ indete. Iamo bannangna to na iatu keraginna tae’ mima’din ungkandei.

⁴Allo ia duka te ammi tassu’, iamotu bulan Abib.

⁵Iake Nasolammoko PUANG tama tondokna to Kanaan sia Het sia Amori sia Hewi na Yebus, tu Naalluran nene’ to dolomu umpalao sumpa, la Nakamaseangko, iamotu misa’ tondok sebo pangandu’ sia tani’ enoan, manassa la mukaritutui te atoran kamenomban lan bulan iate.

⁶Pitung allo munii ungkande roti tang diragii, na iatu allo ma’pempitu la dadi misa’ allo kapua dipakarayan PUANG.

⁷Lan to pitung allo roti tang diragii manna la dikande, da nakaanan lako kalemu tu keraginna, ondongpi, da nakaanan tu ragi dio lu kalemu lan mintu’ lili’na tondokmu.

⁸Attu iato la mupokadan mintu’ anakmu, kumua: Iamote tu bannangna apa Napogau’ PUANG lako kaleku, tongku tassu’ lan mai tondok Mesir.

⁹Iate iannate la butung misa’ tanda dio limammu sia misa’ kapengkilalan dio kasitammuan matammu, kumua na iatu atoranNa PUANG dio randan pudukmu, belanna Nasolammoko PUANG tassu’ lan mai tondok Mesir tete dio lima mawatang.

¹⁰Toe manda’i te aluk tipondok iate lan attu dipamanassa, ke taunnoi.

¹¹Sia iake Nasolammoko PUANG tama tondokna to Kanaan, susitu mangka umpalao sumpa unnallu’i lako nene’ to dolomu, sia ke Nakamaseangko tu tondok iato,

¹²manassa la mupamarimbangan lako PUANG tu mintu’ pia pa’bunga’ urrubak pa’tambukan sia anak pa’bunga’na mintu’ patuoan tu dio kalemu, tu lakinna iamo apanNa PUANG.

¹³Apa mintu’ anak bunga’na keledai la mula’bak misa’ domba ba’tu bembe’, na iake tae’i mula’bakki manassa la mutoto sokkongna, apa mintu’ tu anak pa’bunga’na tolino, iamotu mai anakmu muane la mula’bak.

¹⁴Iake nakutanaiko anakmu muane undinna, kumua: Apara te?, la mukua lako: Nasolammokan PUANG tete dio lima mawatang sun lan mai tondok Mesir, lan mai banua dinii umpokaunankan.

¹⁵Belanna iatonna pamakarra’i Firaun tu penaanna, tae’ naelorangkan male, Napatei PUANG tu mintu’ anak pa’bunga’ lan tondok Mesir, randuk dio mai pa’bunga’na tolino sae lako anak bunga’na patuoan, iamo bannangna to angku pemalaranni lako PUANG tu mintu’ lakinna, tu bunga’na urrubak pa’tambukan, apa iatu mintu’ anakku muane tu pa’bunga’ kula’bak.

¹⁶Iate iannate la butung misa’ tanda dio limammu sia misa’ toding pa’patudu dio kasitammuan matammu, belanna Nasolammokan PUANG tassu’ lan mai tondok Mesir tete dio lima mawatang.

¹⁷Iatonna elorammi Firaun tu to buda male, Nasolan Puang Matua tu tau iato mai tae’ naturu’i tu lalan ma’palulako tondok Filistin moi anna mandappi’, belanna Nakua Puang Matua: Menassan manii tu to buda ke untiroi rari, anna sule lako Mesir.

¹⁸Sangadinna Napasepang Puang Matua, tu tau iato mai, unnola lalan ma’palulako padang pangallaran tasik Teberau. Ke’de’mi tu to Israel tassu’ lan mai tondok Mesir, sakka’ pa’bunona.

¹⁹Nabaami Musa tu mintu’ bukunna Yusuf, belanna napa’pakare’nan Yusuf lako to Israel, napalaoi sumpa kapua, nakua: Inang la Nato’longikomi Puang Matua, na attu iato la mibaa nasang male tu mintu’ bukungku indete.

²⁰Ke’de’mi tu tau iato mai dio mai Sukot anna ma’tenda dio Etam, dio biring padang pangallaran.

²¹Malemi tu PUANG undoloanni, iake masiang lan misa’ lentong gaun, la unnanta’i tu tau iato mai dio lu lalan, na iake bonginna lan lentong api, la unnarrangi tu tau iato mai, kumua anna ma’din lumingka la masiangna, la bonginna.

²²Tae’ natoyang dio mai tau iato mai tu lentong gaun, ke masiangnai sia iatu lentong api, ke bonginnai.