Read Toraja-Sa'dan KATASSURAN 16 Bible Online

KATASSURAN 16 - Toraja-Sa'dan bible

KATASSURAN 16

¹Iatonna ke’de’ nasangmo tu tau iato dio mai Elim, rampomi tu mintu’ kombonganna to Israel tama padang pangallaran Sin, tu naparitangnga Elim na Sinai, tonna allo ma’sangpulo lima bulan ma’penduan randukna tassu’ lan mai tondok Mesir.

²Mintu’ tu kombonganna to Israel sipa’nuku-nukuan lako Musa sia Harun lan padang pangallaran.

³Ma’kadami tu to Israel lako sola duai, nakua: A’a melo kengki mate Napata’paiora limanNa PUANG dio Mesir tongki untingayoipa kurin nanii duku’ sia ungkande roti sadia’ki, apa misolammokan tama te padang pangallaran la umpamate tangdia’i te kombongan iate.

⁴Ma’kadami tu PUANG lako Musa, Nakua: Tiromi, angKu paurannikomi roti dao mai langi’, anna tassu’ tu to buda urrampunni tu silasanna keallo-keallo, kumua angKu tobai ba’tu la naturu’ siai tu Sukaran alukKu, ba’tu tae’i.

⁵Iake allo ma’pennannanni la napasakka’ tu apa la nabaa tama, iatu iannato la penduan pada tu narampunna keallo-keallo.

⁶Ma’kadami tu Musa sola Harun lako mintu’ to Israel: Makaroen iate la miissan, kumua PUANGmo tu mangka ussolangkomi sun lan mai tondok Mesir.

⁷Sia masiang melambi’, ammi tiroi tu kamala’biranNa PUANG, belanna iatu pa’nuku-nukummi ussayu PUANG Narangimo. Apa tau aparakan te sola dua, ammi ma’nuku-nukura lako kaleki?

⁸Sia nakuapa Musa: Iake Napakandekomi duku’ PUANG te makaroen iate sia masiang melambi’ roti sadia’mi, iamotu belanna Narangimo PUANG tu pa’nuku-nukummi, tu mipa’nuku-nukuan lako Kalena. Apa tau aparakanni te? Iate pa’nuku-nukummi tae’ nalulako kaleki, sangadinna lu lako PUANG.

⁹Mangkato ma’kadami Musa lako Harun, nakua: Pokadanni mintu’ kasirampunanna to Israel: Mentireke’komi dio oloNa PUANG, belanna Narangimo tu pa’nuku-nukummi.

¹⁰Iatonna marassan tu Harun ma’kada-kada lako mintu’ kombonganna to Israel, anna messaile tu tau iato mai lako padang pangallaran, ta’kala paanmi tu kamala’biranNa PUANG lan gaun.

¹¹Attu iato ma’kadami tu PUANG lako Musa, Nakua:

¹²Kurangimo tu pa’nuku-nukunna to Israel; pokadanni, kumua iate makaroen iate la ungkandekomi duku’, anna masiang melambi’ la dipedia’ikomi roti, ammi issanni, kumua Akumo tu PUANG, Kapenombammi.

¹³Makaroen ia dukato, saemi ba’tu sangapa budanna puyo, naurungan ussitutu’i tu mintu’ to’ tenda iato, sia iatonna melambi’mo denmi ambun ussitutu’i tiku lao tu to’ tenda iato.

¹⁴Iatonna kendekmo tu ambun iato, pakalan, dao lu kuli’na padang pangallaran iato, den apa sibarinni’ sia messissik, barinni’ susi damo’dio lu padang.

¹⁵Iatonna tiromi to Israel sipa’kada-kadami: Apara te? belanna tae’ natandai. Nakuami Musa lako tau iato mai: Iamote tu roti Nabenkomi PUANG la mipokande.

¹⁶Iamote tu kada Napepasanan PUANG, Nakua: Rampunni dio mai tu silasanna mikande simisa’-misa’komi, la simisa’-misa’komi urrampunanni tu mintu’ to lan tendami sanggome’,[1] ke misa’oi tau situru’ tu bilanganna.

¹⁷Napogau’mi to Israel susito; pantan narampun, den buda, den sidi’.

¹⁸Apa iatonna suka’i, iatu to urrampunni buda, tae’ nala’bi, sia iatu to urrampunni sidi’, tae’ nakurang, pantan narampunmo silasanna nakande.

¹⁹Nakuami Musa lako tau iato mai: Moi misa’ tau tae’ nama’din umpatorroi tu sesanna sae lako melambi’na.

²⁰Apa den tu tau pira tae’ naturu’i tu kadanna Musa sia unnannai tu sesanna sae lako melambi’, anna ulliran sia bubosi. Iamoto anna mandu sengke tu Musa lako tau iato mai.

²¹Pada narampunmi tau iato mai, ke melambi’oi tu silasanna nakande, belanna iake mapana’mi allo, lollo’mi tu manna.

²²Iatonna allo ma’pennannanna narampunmi tau iato mai tu roti manglokkon penduan, iamotu siduang gome’ misa’oi, anna male tu pangulunna kasirampunan umpokadanni Musa tu apa iato.

²³Ma’kadami Musa lako tau iato mai nakua: Inde sia tu Napokada PUANG: Masiangmo tu allo katorroan, iamotu allo katorroan dipamaindanan PUANG; iamoto gorengmi totemo tu apa la migoreng sia nasumi tu apa la minasu na iatu la’binna patorroi sia nannai sae lako masiang melambi’.

²⁴Nanannami sae lako masiangna susitu napa’parentan Musa, anna tae’ nabubosi sia tae’ duka naulliran.

²⁵Nakuami Musa: Kandemi te allo iate; allo iamote tu allo katorroanNa PUANG; allo iate tae’ mila unnappa’i dio lu padang.

²⁶Annan allona la minii urrampunni, apa allo ma’pempitu, iamo allo katorroan, allo iato tae’ na la den.

²⁷Iatonna allo ma’pempitu denmi ba’tu pirai tu tau iato tassu’ la urrampunni, apa moi misa’ tae’ naappa’.

²⁸Attu iato ma’kadami PUANG lako Musa, Nakua: Sangapapakomi mengkailing la ungkaritutui tu mintu’ pepasanKu sia Sukaran alukKu?

²⁹Pengkilalai, kumua Napa’kamaseanmo PUANG tu allo katorroan lako kalemi; iamoto anna lan allo ma’pennannan Nabenkomi tu roti silasa lan to duang allo. Iamoto ammi pantan mari’pi bang dio to’ inanmi; moi misa’ tau tae’ nama’din tassu’ lan mai to’ inanna, to ke allo ma’pempitu.

³⁰Susimoto tu tau iato mai untorroi mengkarang tonna allo ma’pempitu.

³¹Nasangaimi to Israel manna; iatu apa iato mabusa susi lise’ katumba’ na kandeanna susito deppa sirau uai tani’.

³²Ma’kadami Musa nakua: Inde sia tu Napepasanan PUANG: Ponnoi sanggome’ tu apa iato, ammi nannanni mintu’ ampo bati’mi, anna tiroi tu roti Kupakandeangkomi lan padang pangallaran iate tongKu solangkomi tassu’ lan mai tondok Mesir.

³³Sia nakuapa Musa lako Harun: Alako misa’ busso, patamai manna sanggome’, ammu patorroi dio oloNa PUANG, la dinannan mintu’ ampo bati’mi.

³⁴Susitu pepasanNa PUANG lako Musa, napatorromi Harun dio tingo Kasa’bian, la dinanna.

³⁵Iatu to Israel ungkande manna patangpulo taunna sae lako tamanna tondokna tau, manna bang nakande tu tau iato mai sae lako rampona dio angge lili’na tondok Kanaan.

³⁶Iatu sanggome’ iamotu taan pesangpulona misa’ epa.