Read Toraja-Sa'dan KATASSURAN 17 Bible Online

KATASSURAN 17 - Toraja-Sa'dan bible

KATASSURAN 17

¹Mangkato, ke’de’mi tu mintu’ kasirampunanna to Israel dio mai padang pangallaran Sin, anna ma’bongi ba’tu pempiran-piran dio lu lalan, susitu parentaNa PUANG, anna torro ma’tenda dio Rafidim, apa inde to dio tae’ uai la nairu’ tu tau iato mai.

²Iatonna attu iato iatu to buda unggaga Musa, nakua: Benkanni uai, angki iru’i! Nakuami Musa lako tau iato mai: Ma’apai ammi gagana’? Ma’apai ammi toba PUANG?

³Indeto dio ma’rang tu to buda la morai unniru’ uai, iamoto anna ma’nuku-nuku lako Musa, nakua: Ma’apai ammi solangkanni tassu’ lan mai tondok Mesir, la mipateirakannika sola mintu’ anakki sia patuoangki, mate ma’rang?

⁴Attu iato meongli’mi tu Musa langngan PUANG, nakua: Apara la kugauranni te bangsa iate? Sattu’mora naleba’na’ batu.

⁵Ma’kadami PUANG lako Musa, Nakua: Doloko dio tingayona tu to buda sia solanni tu to matua-tua to Israel, ammu toei tu tekkenmu, tu mangka musambakan salu Nil, mumale.

⁶Tiromi, la bendanNa’ dio tingayomu dao buntu batu Horeb; la musambakki tu buntu batu iato, anna sun tu uai lan mai, anna iru’i to buda. Napogau’mi Musa susito dio tingayona mintu’ to matua-tua to Israel.

⁷Nasangaimi Masa sia Meriba tu inan iato, belanna kapa’gaganna to Israel sia belanna natoba tau iato mai tu PUANG, nakua: Ba’tu la denni tu PUANG lan tangngata ba’tu tae’i?

⁸Saemi tu to Amalek sirari to Israel dio Rafidim.

⁹Ma’kadami tu Musa lako Yosua, nakua: Tonnorangki’ ba’tu pira-pira muane, ammu tassu’ urrarii to Amalek. Masiang la bendanna’ dao botto tanete iato angku toei tu tekkenNa Puang Matua.

¹⁰Napogau’mi Yosua susitu napasan Musa lako kalena, nararii tu to Amalek. Kendekmi tu Musa sia Harun sola Hur langngan botto tanete.

¹¹Ianna popempala’i tu limanna Musa langngan langi’, patalo tu to Israel, apa ianna parokkoi tu limanna, patalo tu to Amalek.

¹²Mata’ka’mi tu limanna Musa, iamoto naalai sola duai tu batu misa’ napatorro diongna lu, anna unno’ko’ dao; anna tulakki Harun sola Hur tu limanna patomali misa’i dio kairinna, misa’i dio kananna, naurunganni bantang tu limanna sae lako lambunna allo.

¹³Susimoto tu Yosua untalo pa’dangi tu to Amalek sola tu mai surodadunna.

¹⁴Ma’kadami PUANG lako Musa, Nakua: Sura’i te tama misa’ sura’, la dadi misa’ kapengkilalan la dinanna batu silambi’ sia patobangi tama talinga duanna Yosua te kada iate, kumua Aku la umputtai tu mintu’ kapengkilalan diona Amalek lan nasambo langi’.

¹⁵Napabendanni Musa tu misa’ inan pemalaran, anna sangai: PUANGmo tu kupobandera!

¹⁶Nakuami: Sipatu tu lima ma’palulako isungan kapayunganNa PUANG! Iatu rari lu dio mai PUANG la unnea to Amalek landa’ sae lako ampo bati’na.