Read Toraja-Sa'dan KATASSURAN 2 Bible Online

KATASSURAN 2 - Toraja-Sa'dan bible

KATASSURAN 2

¹Denmi misa’ to dio mai sukunna Lewi, male umpobaine bati’na Lewi.

²Ma’tambukmi tu baine iato anna dadian pia muane. Iatonna tiroi kumua melo rupanna, nabunimi tallung bulan.

³Apa belanna tang naissanmo la umbunii, naalammi misa’ toban tille, napi’da’i aspala’ sia gala-gala, napamamma’i lan tu pia’-pia’ iato, anna patorroi lan to’ marrang, dio biring salu Nil.

⁴Iatu kakanna te pia’-pia’ bendan mambela la umpenniroi kumua ba’tu apamo la dadi lako kalena.

⁵Mengkalaomi tu anakna Firaun la mendio’ diong salu; na iatu mai baananna baine sumalong lu lako lu dio mai dio biring salu Nil; ta’kala natiromi tu toban tille lan to’ marrang, anna suai tu baananna male unnalai.

⁶Iatonna bungka’i natiromi tu pia iato; mangngami, belanna tumangi’ tinde pia muane, iamoto namasse tu penaanna, anna ma’kada nakua: Iamote tu misa’ anak to Ibrani.

⁷Ma’kadami tu kakanna baine pia iato lako anakna baine datu Firaun nakua: Ma’dinra’ka lao untamban puang misa’ to ma’ pasusu dio mai to Ibrani, anna pasusuanni puang tu pia iato?

⁸Nakuami tu anakna baine datu Firaun lako: Malemoko. Malemi tinde pia baine untambai tu indo’na pia iato.

⁹Ma’kadami tu anakna baine datu Firaun lako, nakua: Solanni te pia mupasusuanna’, angku benko saromu. Nabaami tinde baine tu pia iato anna pasusui.

¹⁰Iatonna kapuamo tu pia iato nasolammi lako anakna baine datu Firaun, naala anakki, nasangai Musa, nakua: Belanna kuangkaran diong mai to’ uai.

¹¹Den sangallo tonna kapuamo tu Musa, tassu’mi namale lako mintu’ sangsiuluranna, natiroi tu mintu’ pa’diamanna tau iato mai; natiromi tu misa’ to Ibrani dio mai mintu’ sangsiuluranna nabamba misa’ to Mesir.

¹²Messailemi tu Musa lu lako lu dio mai; iatonna tiroi tae’ sia tau, napateimi tu to Mesir iato, nabunii tu batang rabukna diong to’ bungin.

¹³Iatonna masiang tassu’ pole’omi, natiroi tu da’dua to Ibrani marassan sikambean nakuammi tu solana: Ma’apai ammu kambei tu sangsiulurammu?

¹⁴Mebalimi nakua: Mindara unnangka’ko arungki sia to ma’paolaingki salu? Lanomoraka penaammi la umpateina’ susitu to Mesir mipatei? Mataku’mi tu Musa, belanna natangnga’mo lan penaanna, kumua: Kaissanammo te kara-kara iate.

¹⁵Iatonna rangimi Firaun te kara-kara iate, undaka’mi lalan la umpatei tu Musa, apa mallai tu Musa dio mai Firaun undaka’ inan dio lu tondok Midian, anna torro sikandappi’ misa’ bubun.

¹⁶Iatu to minaa dio Midian pitu tu anakna baine; saemi tu tau iato mai la untimba uai unnissii pa’pairusan, la napairusan bembe’na sia dombana ambe’na.

¹⁷Saemi ba’tu pira-pira to manglaa muane unnula’i tu baine iato, apa ke’de’ tu Musa untundui anna pairu’i tu bembe’na sia dombana.

¹⁸Iatonna rampomo tu tau iato mai lako Rehuel ambe’na, nakuami ambe’na: Ma’apari te allo iate ammi sule kale’ra?

¹⁹Mebalimi tu tau iato mai, nakua: Den misa’ to Mesir untunduikanni unneai tu to manglaa sia natimbangkan uai salempanna sia napairu’ duka tu bembe’ sia domba.

²⁰Nakuami lako anakna: Umbara nanii? Ma’apai mitampei dio? Tambai anta kumande sola.

²¹Natarimami Musa tu palakunna tau iato, anna torro tu Musa lan banuanna anna benni tu anakna napobaine Musa, disanga: Zipora.

²²Undadiammi misa’ pia muane, nasangaimi Musa tu pia iato Gersom, nakua: Belanna to saena’ dio lu tondokna tau.

²³Masaipa alla’na to namane mate tu datu Mesir; iatu to Israel tontong bang sumarro belanna magasa pa’diamanna sia silallakan, naurunganni iatu pengkamoyana diona pa’diamanna rampomo lako oloNa Puang Matua.

²⁴Naperangiimi Puang Matua tu sarrona tau iato mai, sia Nakilalaimo tu basseNa sola Abraham, Ishak na Yakub.

²⁵Natiromi Puang Matua tu to Israel sia Nakilalai.