Read Toraja-Sa'dan KATASSURAN 21 Bible Online

KATASSURAN 21 - Toraja-Sa'dan bible

KATASSURAN 21

¹Ia nasangmote tu mintu’ atoran, tu la muparampo lako tau iato mai.

²Iake unnallikomi misa’ kaunan to Ibrani, annanri taunna la dipopa’kurinan, apa iake taun ma’pempitu, manassa la mentorro to makakamo sule, apa tae’ nama’talla’.

³Iake misa-misai tama, sipatu duka ia la misa-misari tassu’; iake tamai sola bainena, sipatu la tassu’ sola.

⁴Iake napakebainei puangna na iatu baine iato umpadadianni muane ba’tu baine, iatu baine iato sola anakna la torro napotau puangna, anna sun tu muanena misa-misa.

⁵Apa iake napamanassai ma’kada, kumua: Kukamali’ tu puangku sia repokku, manokana’ la tassu’ mentorro to makaka,

⁶la napopengkareke’ puangna lako oloNa Kapenomban, mangkato nabaai lako to’ ba’ba banuanna ba’tu to’ ampang ba’bana, anna tossokki panusuk puangna tu talinganna, anna dadi pa’kurinanna angge tuona.

⁷Iake nabalukanni tau tu anakna baine dadi kaunan, tae’ ia na la tassu’ susi mintu’ kaunan muane.

⁸Ianna tae’ nakalo’i penaanna puangna, moi nadipamanassamo, sipatu naeloran dila’bak, tae’ nama’din nabaluk lako bangsa senga’, belanna tang nakaruru’i.

⁹Ianna pamanassai lako anakna, sipatu napalalo lako tu atoran pia baine.

¹⁰Ianna umpobaine pole’ to senga’, tae’ nama’din napasosso’ tu kandena sia pakeanna sia ada’ kasisangamparan.

¹¹Ianna tae’ napogau’i te tallu kara-kara iate, ma’din tassu’ tang mamaya’ doi’.

¹²Minda-minda ungkambei tau namate, manassa dipatei duka.

¹³Apa iake tae’ naangga’i tu kamateanna, sangadinna pangeloranNa Puang Matua naruai limanna. Aku la umpadulluangko tu inan ma’din la nanii lussu’ lako.

¹⁴Apa iake denni tau umpogau’ kadake la ussanggangi padanna ma’rupa tau sia natangnga’ la umpatei, sipatu la miala moi nadio mai to’ pemalarangKu, anna dipatei.

¹⁵Minda-minda ungkambei ambe’na ba’tu indo’na, manassa la dipatei.

¹⁶Minda-minda umboko tau, ba’tu mangkami nabalukan, ba’tu lan siapa limanna, manassa la dipatei.

¹⁷Sia minda-minda unggantan ambe’na ba’tu indo’na, manassa la dipatei.

¹⁸Iake denni tau sigaga, anna sileba’ batu ba’tu sitambusuk, apa tae’ sia namate, sangadinna masakiri dao inan mamma’na;

¹⁹ianna ke’de’mo sule sia ma’tekken lako salian, iatu to ungkambei tae’ nadiukung, sangadinna la nasondai bangri tu ruginna, belanna tang leto tu pengkaranganna sia napa’pedampian samondona.

²⁰Sia iake den tau ullonga’ kayu kaunanna muane ba’tu baine, anna ta’pa mate, tae’ na la tang dipabala’i.

²¹Apa iake tuo siapi sangallo ba’tu duang allo, tae’ nadipabala’i belanna apanna.

²²Na iake denni tau sikambean sia denni misa’ untambusuk baine ma’tambuk naurungan kanaoan, apa tae’ sia napomatumbai, manassa didosa pada natuntunna muanena, anna baya’i pada tu nasituru’ina to ma’paolai salu.

²³Apa iake napomatumba-tumbai, manassa iake papateanni la dipatei duka,

²⁴pabutanni la dibutai duka, pasimpoanni la disimpoi duka, pata’takan limai la dita’takki duka tu limanna, pale’toan lentekki la dile’to duka tu lentekna,

²⁵kama’la’poan ussonda kama’la’poan, bangke ussonda bangke, lonto’ ussonda lonto’.

²⁶Sia iake denni tau ussala’pa kaunanna muane ba’tu baine, naurunganni nabutai sangbali tu matanna, manassa la napopentorro to makaka belanna matanna.

²⁷Sia iake nasala’pai tu kaunanna muane ba’tu baine, naurungan simpo misa’ tu isinna, manassa la napopentorro to makaka.

²⁸Iake denni muane ba’tu baine nalaga sapi namate, manassa la ditumbui batu samatena tu sapi iato, na iatu duku’na tae’ nama’din dikande, apa iatu puangna tae’ nadipasala.

²⁹Apa iake pa’burrusan tempon dioi mai tu sapi iato sia dipokadammo puangna tu iannato, apa tae’ nakampai, anna iake umpatei muane ba’tu baine tu sapi iato, manassa la ditumbui batu samatena, na iatu puangna diukung mate.

³⁰Iake dipa’tuntunni doi’ pa’dosa, manassa la nabengan tu mintu’ apa dituntun lako kalena nala’bakan sunga’na.

³¹Ba’tu iake umburru’i misa’ pia muane ba’tu pia baine, manassa la susi duka a’gan ukunganna to.

³²Iake naburru’i sapi tu misa’ kaunan muane ba’tu baine, manassa la diben doi’ salaka tallungpulo sikele’,[2] tu puangna tau iato sia ditumbui batu tu sapi iato samatena.

³³Iake denni misa’ bubun tae’ naditutu’i, ba’tu tau umbo’bok bubun, natae’ natutu’i, anna tobang misa’ sapi ba’tu keledai tama,

³⁴manassa la nasonda puangna bubun tu karugian nabaya’i tu allinna lako puangna patuoan iato, apa iatu duku’ patuoan iato ia unnalai.

³⁵Iake denni sapinna tau ullaga solana napomatei, manassa iatu sapi tuo dibalukan na iatu doi’ allinna dipa’dua, susi dukato tu matena la disese.

³⁶Apa iake manassai, kumua pa’burrusan tempon dio mai tu sapi iato natae’ nakampai puangna, manassa la nasonda mintu’ tu sapi iato, apa iatu duku’ sapi iato ia unnalai.