Read Toraja-Sa'dan KATASSURAN 22 Bible Online

KATASSURAN 22 - Toraja-Sa'dan bible

KATASSURAN 22

¹Ianna den tau umboko misa’ sapi ba’tu domba ba’tu bembe’, anna tunui ba’tu nabaluk, manassa la nasonda lima sapi tu misa’ sapi sia misa’ domba ba’tu misa’ bembe’ la nasondai a’pa domba, ba’tu a’pa’ bembe’.

²Iake den misa’ to boko diapparan marassan ma’kakei anna dilonga’ samatena, tae’ nadituntun tu rarana lako to umpatei.

³Ianna bu’tuimi allo, la dituntun tu rarana lako to umpatei. Na iatu to boko la ussonda nasangi; iake tae’mi dio kalena, ia la dibalukan belanna bokona.

⁴Iake tandanni tu apa naboko dilolongan tuopa dio kalena, la sapi la keledai, la domba sola bembe’, manassa la nasonda manglokkon penduan.

⁵Iake denni tau ompopa’elo’nai tu sapinna, ba’tu dombana umpepurai bela’na ba’tu pa’lak anggoro’na to senga’, belanna napangrambai tama, anna pepurai tu bela’ iato, manassa la napa’bengan tu bura pa’tonno’ dio mai bela’na sia dio mai pa’lak anggoro’na la nasondanni.

⁶Iake denni tau mamalla anna mellepa’ tu api ungkande duri, naurungan ussappii patuku gandung ba’tu gandung tuo ba’tu mintu’ pa’lak, manassa la nasonda mintu’, to mamalla iato.

⁷Iake denni tau umpa’penannan doi’na ba’tu apa-apanna lako solana, anna diboko lan banuanna tau iato, ianna dilambiran tu to boko, manassa la nasonda manglokkon penduan.

⁸Iake tae’i nadiapparan tu to boko, iatu to ma’banua la mengkareke’ lako oloNa Puang Matua, anna umpalao sumpa kumua tae’ narumbui limanna tu apanna solana.

⁹Iatu mintu’ kasite’geran diona apa disanga diboko la bannang dio misa’ sapi, ba’tu misa’ keledai, ba’tu misa’ domba sola bembe’, ba’tu sanglamba’ pakean, ba’tu mintu’ apa pa’de, tu nasanga tau apanna, la napopennolo lako Puang Matua tu kara-karana tau iato sola duai. Minda-minda tu napasala to ma’paolai salu, manassa la nasonda lako solana penduan manglokkon.

¹⁰Iake den tau umpa’pekambiran misa’ keledai ba’tu sapi ba’tu domba sola bembe’ ba’tu mintu’ patuoan senga’ lako solana anna mate, ba’tu bangke, ba’tu labu’, anna tae’ misa’ tau untiroi,

¹¹manassa umpalao sumpa ussa’bu’ sanganNa PUANG la umpaolai salu sola duai, kumua narumburaka limanna tu apanna solana, tae’raka, manassa la natarima puangna tu iannato, natae’ nama’kasonda tu senga’na.

¹²Apa iake manassai diboko dio mai kalena, sipatu la nasonda lako puangna.

¹³Iake tisepak-sepakki, la nabaa napotanda sa’bi, na iatu tisepakna tae’mo na la ussondai.

¹⁴Iake denni tau mangindan lako solana, anna sanggang, ba’tu matei, anna tae’ nadioren tu puangna, manassa la nasonda nasang.

¹⁵Ianna dio ren tu puangna, tae’ nasondai. Ianna sewai, iatu karugianna dipasireken sewana.

¹⁶Iake denni tau unnaran-naran misa’ anak dara, tu tae’pa nasikampan, anna sangampa’ sola, manassa la nabaya’ mintu’ tu sombana, anna pobainei.

¹⁷Iake manokai tu ambe’na umbenni, inang la natimbangan salaka tu tau iato sama budanna somba anak dara.

¹⁸Da mupatuoi tu baine balik mata.

¹⁹Minda-minda ungkaromok olo’-olo’, manassa la dipatei.

²⁰Minda-minda memala’ lako deata, natae’ na lako manna PUANG, manassa la disabu’i.

²¹Da mupakario-rioi tu to sae ba’tu mupandasai, belanna mangkamokomi to sae dio tondok Mesir.

²²Da mipakario-rioi tu baine balu ba’tu pia biung.

²³Apa iake mupakario-rio bangi susito, anna meongli’ lako Kaleku, manassa la Kuperangii tu peongli’na,

²⁴la re’dek tu ara’Ku, angKu pateikomi pa’dang sia mintu’ bainemi la balu sia anakmi la biung.

²⁵Iake mupaindanni doi’ tu taungKu, iamotu mai to bongko musisolan, da mubutung to pa’tungka maparrang lako kalena sia da mutuntunni tu uainna.

²⁶Iake unnala pentoeko bayu lamba’na solamu, manassa la mupasulean dolo, namane lambun allo.

²⁷Belanna iamannato tu perampangna, tu narampangan kuli’na; apa pole’pa senga’na tu la napennammu’ mamma’? Tonganna ianna meongli’ lako Kaleku, manassa la Kuperangi tu peongli’na, belanna Aku te maturu-turuNa’.

²⁸Da mugantanni tu Puang Matua sia da mutangdoi tu mai arungmu.

²⁹Da mupatadangi tu bunga’ bura padangmu sia uai anggoro’mu lako Kaleku. Manassa la mubenNa’ tu pa’bunga’na dio mai mintu’ anakmu muane.

³⁰Susi dukato la mugauranni tu mintu’ sapimmu sia mintu’ bembe’ sola dombamu: pitung allori la mupasibaa indo’na, apa ianna allo ma’pengkaruamo sipatu la mupenomban lako Kaleku.

³¹La dadikomi to masero lako Kaleku, iamoto da mikande duku’ tisepak-sepak dio lu padang; sipatu la mibuangan asu.