Read Toraja-Sa'dan KATASSURAN 24 Bible Online

KATASSURAN 24 - Toraja-Sa'dan bible

KATASSURAN 24

¹Mangkato ma’kadami tu Puang lako Musa Nakua: Kendekkomi umpennoloi PUANG la iko sia Harun sia Nadab sia Abihu sia pitungpulo to matua-tua to Israel, ammi tukku mambela.

²Musa manna misa-misai tu la mentireke’ lako PUANG, apa iatu tau iato mai tae’ nama’din mentireke’ sia tae’ duka na la kendek tu to buda nasisolan.

³Saemi tu Musa umpokadai tu mintu’ kadanNa PUANG sia atoran lako to buda, anna mebali tu to buda susito misari gamara nakua: Mintu’ te kada iate tu Napokada PUANG, la kituru’.

⁴Napatamami sura’ Musa tu mintu’ kadanNa PUANG, anna pelambi’i nagaragai tu misa’ inan pemalaran sia naosok tu batu sangpulo dua situru’ bilanganna sangpulo dua suku to Israel.

⁵Nasuami tu ba’tu pira to mangura to Israel, umposara’i tu pemala’ ditunu pu’pu sia umpemalaran sapi laki napopemala’ kasalamaran lako PUANG.

⁶Napa’duami Musa tu rarana naparokkoi pindan, napa’pi’pikanni inan pemalaran tu torrona.

⁷Anna alai tu sura’ pangallu’ iato, nabasanni tu tau iato mai; ma’kadami tu tau iato mai: Mintu’ te kadanNa PUANG la kipogau’ sia la kituru’.

⁸Naalami Musa tu rara iato, napi’pikanni tu tau iato mai, anna ma’kada nakua: Tonganna iamote tu rara basse, tu Natanan PUANG misibassei tu menggaronto’ lan mintu’ kada iate.

⁹Kendekmi tu Musa sola Harun sia Nadab sia Abihu na pitungpulo to matua-tua to Israel.

¹⁰Natiromi tau iato mai tu Kapenombanna to Israel, na diong to’ lette’Na den susi sali batu parimata lasuri’, na iatu parrangna butung to langi’ maserrong.

¹¹Apa tae’ Naparumbui limanNa lako tu to kapua to Israel, sangadinna tonna tiromi tu Puang Matua, maneri kumande sia mangiru’ tu tau iato mai.

¹²Ma’kadami tu PUANG lako Musa Nakua: Kendekko langngan buntu mennolo lako Kaleku sia torroko inde to, angKu benko papan batu, iamo sukaran aluk sia pepasan Kusura’ la unnada’i tu tau iato mai.

¹³Ke’de’mi tu Musa sia Yosua, taunna anna kendek tu Musa langngan buntunNa Puang Matua.

¹⁴Ma’kadami lako mintu’ pekaamberan iato nakua: Torromokomi inde te ungkampaikanni sasuleki lako kalemi; iatu Harun sola Hur la torrokomi sola; minda-minda den kara-karana la nabaa lako kalena sola duai.

¹⁵Mangkato kendekmi tu Musa langngan buntu, anna samboi gaun tu buntu iato.

¹⁶Unnisungmi tu kamala’biranNa PUANG dao buntu Sinai nasamboi gaun annan allona; na iatonna allo ma’pempitu metambami tu PUANG lan mai gaun lako Musa.

¹⁷Iatu rupa kamala’biranNa PUANG dio pentirona mintu’ to Israel butung to api ma’kande dao potok buntu iato.

¹⁸Malemi tu Musa tama gaun iato, nakendek langngan buntu; anna torro dao buntu iato patangpulo allona patangpulo bonginna.