Read Toraja-Sa'dan KATASSURAN 25 Bible Online

KATASSURAN 25 - Toraja-Sa'dan bible

KATASSURAN 25

¹Ma’kadami tu PUANG lako Musa Nakua:

²Suai tu mintu’ to Israel urrampunanNa’ pa’duruk; dio mai tu mintu’ to masorok penaanna, la mirampunanNa’ pamengan.

³Iamote tu pamengan la miduruk dio mai tau iato mai: bulaan sia salaka sia tambaga;

⁴sia parada lango-lango sia lango-lango makaseda sia karamisi sia lenan melo sia bulu bembe’;

⁵sia kuli’ domba laki pa’damorro’ mararang sia kuli’ taka’ sia kayu simmin;

⁶sia minna’ la ma’pamasiang sia pebangki’ la dirauan minna’ dipa’minnakan sia dipa’tokkoan sia la dipodupa;

⁷sia ake’ ido sia parimata la dimatan epo’ sia pesambo ara’.

⁸Ia nagaraganNa’ tau iato mai tu inan maindan, angKu unnisung lan lu tangngana tau iato mai.

⁹Susitu mintu’ la Kupadulluangko, susitu pandirinna kema iato sia susitu pandirinna mintu’ pareananna, susi dukamoto la mugaragai.

¹⁰La nagaraga tau iato mai tu misa’ patti, kayu simmin digaraga, duang siku ssangtangnga landona sia babana sangsiku sia langka’na sangsiku ssangtangnga.

¹¹Iatu patti iato la mukallasa’ bulaan massang tongan; kallasa’i tu lanna lu sia salianna, sia la mugaragan sa’pi’ bulaan daona lu tiku lao.

¹²Sia pati’noranni komba a’pa’, pale’ke’i dio to a’pa’ lette’na, da’dua dio sesena na da’dua pole’o dio sangsesena.

¹³Sia iatu pebullena kayu simmin, ammu kallasa’i bulaan.

¹⁴La muulu tu pebulle tama komba iato dio sa’dena patomali, anna ia dibulleanni tu patti iato.

¹⁵La manda’ bang tu pebullena lan komba iato, tae’ nadialai.

¹⁶La mupatama patti iato tu kasa’bian tu la Kubenko.

¹⁷Sia garagai misa’ tutu’ pebase kasalan bulaan massang tongan, duang siku ssangtangnga landona sia babana sangsiku ssangtangnga.

¹⁸La mugaraga tu da’dua karubion bulaan, iamotu bulaan pa’kombong la mugaragai, dao tampakna patomali tu tutu’ pebase kasalan.

¹⁹Garagaiko misa’ karubion dao tampak sangsesena, na misa’ pole’o dao tampak sangsesena; iato tutu’ pebase kasalan sola tu karubion dao tampakna patomali la mupasikande mitampa.

²⁰La umballa’ pani’na patomali langngan tu karubion iato, anna samboi pani’na tu tutu’ pebase kasalan sia la sitingoan tu lindona; namentiro rokko tutu’ pebase kasalan tu matanna.

²¹La mupatorro tu tutu’ pebase kasalan dao pattinna, ammu palanni patti iato tu kasa’bian tu la Kubenko.

²²Indemoto tu la Kunii ussitammuangko sia ussipa’kadangko dao mai tutu’ pebase kasalan lan mai alla’na da’dua karubion, tu dao patti kasa’bian, diona tu mintu’ apa Kubenko la muparampo lako to Israel.

²³Sia la unggaragaiko misa’ meda kayu simmin, duang siku landona, babana sangsiku na langka’na sangsiku ssangtangnga.

²⁴Sia la mukallasa’ bulaan massang tongan sia la mugaragan sa’pi’ bulaan tiku lao.

²⁵La mugaragan duka petolo’ tiku lao sangpala’ lua’na, sia la musa’pi’ bulaan tiku lao tu petolo’ iato.

²⁶La mugaragan komba bulaan a’pa’, pale’ke’i tu komba iato lako a’pa’ tetukna.

²⁷La sikandappi’ petolo’ iato tu naninna komba, tu la diului pebulle tama la umbullei tu meda iato.

²⁸Iatu pebulle kayu simmin la mugaraga sia la mukallasa’, anna ia dibulleanni tu meda.

²⁹Sia la mugaragan piringna sia dolong-dolongna sia sere’na sia balubunna dipa’bolloan; iatu apa iato bulaan massang tongan la mugaraga.

³⁰Sia palenna’i tu roti dipennoloan dao meda iato tontong dio oloKu.

³¹La mugaraga tu misa’ tongkonan palita bulaan massang; iatu tongkonan palita bulaan pa’kombong la digaragai susi dukato tu tongkonanna sia batangna; iatu bunga tiballa’na sia kalopakna sia bunganna la mupasikande mutampa.

³²Annan tangkena la sun dio sa’dena patomali, tallu tu tangkena tongkonan palita la sun dio sa’dena sangbali na iatu tallu la sun dio sa’de sangbalinna.

³³Iato tallu bunga tiballa’ la susito bunga badam rupanna dio sangtangke sola kalopakna na bunganna sia tallu bunga tiballa’ la susito bunga badam dio sangtangkenao sola kalopakna na bunganna; la susimoto tu annan tangkena sun lan mai batang tongkonan palita iato.

³⁴Nadio batangna tongkonan palita iato la den a’pa’ bunga tiballa’ la susito bunga badam rupanna sola kalopakna sia bunganna.

³⁵Sia misa’pa kalopak diongna lu tangke dionganna tu sun patomali lan mai, iatu misa’ kalopak diongna lu tangke tangngana tu sun patomali lan mai, iatu misa’ pole’o kalopak diongna lu tangke daoanna tu sun patomali lan mai; la susimoto tu annan tangkena sun lan mai batang tongkonan palita iato.

³⁶Mintu’ kalopak sia mintu’ tangkena la sun lan mai batangna; mintu’nato la dipasikande ditampa dio mai bulaan pa’kombong massang.

³⁷La mugaragan pitu palita ammu padaonai lu, na iake dipadukkui la parrang lu lako tingayo.

³⁸Mintu’ tu pesipi’na sia inan dinii umpa’dei bulaan massang la digaragai.

³⁹Iatu tongkonan palita sola mintu’ pareanna sangtalenta bulaan massang la digaraga.

⁴⁰La mupengkilalai tongan, ammu garagai tu mintu’nato susitu pandiri mangka dipatiroangko dao buntu iato.