Read Toraja-Sa'dan KATASSURAN 26 Bible Online

KATASSURAN 26 - Toraja-Sa'dan bible

KATASSURAN 26

¹Iatu kema iato la mugaragan kulambu sangpulo lamba’na; iamotu bannang lenang melo dikaridi’ sia bannang ma’rupa lango-lango sia lango-lango makaseda sia karamisi; iatu sampin iato la mutannun melo tongan sia la mupopa’ karubion lan.

²Iatu landona ke misa’oi duangpulo ngkarua sikunna, na iatu sangka’na patang siku sia la sangsukaranri tu mintu’ kulambu iato.

³Iato limang lamba’ kulambu la sikande-kande nasang na iato limang lamba’na la sikande-kande nasang duka.

⁴Sia la mugaragan dukapa ba’tu pira-pira kale’ke’ lango-lango dio biringna tu misa’ kulambu dio tampakna kulambu tu dipasikandemo, susi dukato la mugaraga dio biringna kulambu misa’nao dio tampakna tu dipasikandemo.

⁵Limangpulo kale’ke’ la mugaraga dio to’ biring kulambu sanglamba’ na limangpulo kale’ke’ dio biring kulambu misa’nao tu dipasikandemo; mintu’ tu kale’ke’ la sipatu nasang.

⁶Sia la mugaragampa limangpulo pekadang bulaan, anna pekadang iato la mupasikandeanni tu kulambu, naurunganni mendadi misa’ tu kema iato.

⁷Sia la unggaraga dukapako kulambu tenda kulambu bulu bembe’ la dipotenda dio salianna tu kema iato, iatu kulambu tenda iato la mugaraga sangpulo misa lamba’na.

⁸Iake sanglamba’oi tu kulambu tenda la tallungpulo sikunna tu landona na patang siku tu babana; la sangsukaranri tu kulambu tenda sangpulo misa lamba’na.

⁹Iatu mintu’ kulambu tenda la mupasitoe limang lamba’ mupamisa’, susi dukato annannapa lamba’na mupamisa’; iatu lamba’ kulambu ma’pennannanna la mulu’pi’ dua dio tingayo ba’ba tenda iato.

¹⁰La unggaragako limangpulo kale’ke’ dio biringna to kulambu sanglamba’, tu kulambu dio iringna tu dipasikandemo, na limangpulo kale’ke’ dio kulambu misa’nao tu dipasikandemo.

¹¹Sia la unggaragako limangpulo pekadang tambaga, ammu patamai mintu’ kale’ke’ ammu pasikandei tu tenda iato mendadi misa’.

¹²Iatu kulambu tenda tu mendoke’, sesena kulambu mendoke’ iato la mupopendoke’ dio boko’na kema iato.

¹³Iatu la’binna landona kulambu tenda indena mai sia diona lu la mupopendoke’ sangsiku dio sa’de patomalinna kema, la ussamboi.

¹⁴Sia la mugaragan duka misa’ pesambo kuli’ domba laki pa’damorro’ mararang, na daona lu misa’ pesambo kuli’ taka’.

¹⁵Sia la mugaragampa papan kayu simmin la dirinding te’dekanni tu kema iato.

¹⁶Iatu landona papan iato la sangpulo siku ke misa’oi na iatu babana la sangsiku sangtangnga ke misa’oi.

¹⁷Dio misa’ papan la den da’dua petangki’na, tu la sitoe-toe; la mupasusi nasang to tu mintu’ papan kema iato.

¹⁸La mupasusite tu mintu’ papan kema iato: duangpulo papan tu la rampe sau’na.

¹⁹Sia la unggaragapoko patangpulo lette’ salaka diongna lu to duangpulo papan; da’dua lette’ diong misa’ papan la dinii ullasukki tu petangki’ na da’dua pole’o diong misa’ papan dinii ullasukki tu petangki’.

²⁰Susi dukato la mugaragan duangpulo papan tu sa’de senga’na kema, iamotu rampe rekkena,

²¹sola patangpulo lette’ salakana: da’dua lette’ diong misa’ papan, na da’dua lette’ diong papan sidampi’na.

²²Apa iatu boko’ kema rampe matampu’na la mugaragan annan papan.

²³Sia la mugaragampa da’dua papan la untutu’i tu da’dua tetuk kema tu diona boko’.

²⁴La pada bang tu papan iato da’dua diongna lu sia daona lu dio komba misa’na; la susimoto tu papan iato da’dua; anna patomalinna to la dadi tu da’dua tetuk.

²⁵Iamoto na iatu mintu’ papan la karua situang lette’ salakana: sangpulo annan tu lette’na; sida’dua lette’na diong ke misa’oi papan;

²⁶Sia la mugaragan ba’tu pira-pira pesa’pi’ kayu simmin: limang batang lako mintu’ tu papan dio sangsesena kema,

²⁷na limang batang lako mintu’ papan dio sangsesena pole’o, sia limapa lako tu mintu’ papan dio boko’ kema rampe matampu’na.

²⁸Iatu pesa’pi’ lan tangngana tu lan tangnga papan la natarru’ tu mintu’ papan iato randuk dio mai tampakna sae lako tampak sangbalinna.

²⁹Sia la mukallasa’ bulaan tu mintu’ papan sia bulaan la mugaraga tu komba dinii unnulu pesa’pi’, sia la mukallasa’ bulaan tu mintu’ pesa’pi’.

³⁰Mangkato la mupabendanmo tu kema iato susitu pandiri mangka dipatiroangko dao buntu iato.

³¹Sia la mugaragampa misa’ kulambu bannang ma’rupa lango-lango sia lango-lango makaseda sia karamisi sia bannang melo dikaridi’; iatu sampin iato la mutannun melo tongan sia la mupopa’karubion lan.

³²Sia toke’i a’pa’ lentong kayu simmin tu dikallasa’ bulaan; iatu lentong iato nanii pekadang bulaan dio anna dipadao a’pa’ lette’ salaka.

³³Sia la mutoke’ tu kulambu iato diong pekadangna, ammu baai tama tu patti kasa’bian lanna lu kulambu, naurunganni iatu kulambu iato la ussapa’i tu inan maindan anna inan tarru’ maindan;

³⁴Ammu patoppo’i tu tutu’ pebase kasalan dao patti kasa’bian lan inan tarru’ maindan.

³⁵Dio salianna kulambu iato munii umpatorroi tu meda sia tongkonan palita sitingoan tu meda iato rampe sau’na kema na iatu meda la mupatorro rampe rekkena.

³⁶La mugaragampa misa’ kulambu tu ba’ba tenda, iamotu bannang ma’rupa lango-lango sia lango-lango makaseda sia karamisi sia bannang melo dikaridi’: misa’ pa’tannun paruki’.

³⁷Iatu kulambu iato la mugaragan lentong kayu simmin lima ammu kallasa’i bulaan; iatu lentong iato palakoi pekadang bulaan, sia la mupati’noran lima lette’ tambaga.