Read Toraja-Sa'dan KATASSURAN 27 Bible Online

KATASSURAN 27 - Toraja-Sa'dan bible

KATASSURAN 27

¹La unggaragaiko misa’ inan pemalaran kayu simmin, limang siku lambe’na na iatu sangka’na limang siku duka naurunganni massulapa’ a’pa’ tu inan pemalaran iato, na tallung siku langka’na.

²Sia iatu tandukna la mugaragai dio to a’pa’ tetukna sia la mupasikande mugaraga tu tandukna, ammu kallasa’i tambaga.

³Sia la mugaragan tu kurinna, tu la dipatamai au sia pesodokna sia pindan pa’pi’pikanna sia petossokna sia peruayanna; mintu’ pareanan iato tambaga la mugaraga.

⁴La mugaragampa sala’bi’ ma’rupa dalla’ tambaga sia dio a’pa’ tetuk sala’bi’ la mugaragan a’pa’ komba tambaga.

⁵Ammu padioi biring inan pemalaran sia diongna lu, naurunganni iatu sala’bi’ la rampo tama tangnga inan pemalaran iato.

⁶Sia iatu inan pemalaran iato kayu simmin la mugaraganni tu bulleanna sia kallasa’i tambaga.

⁷Iatu bullean iato la diulu tama kombana bullean iato dio sa’de inan pemalaran patomalinna, kumua anna ma’din dibulle.

⁸La murinding papan; susitu mangka Napatiroangko Puang dao buntu, susi dukamo la napogau’ tau iato mai.

⁹Sia la mugaragapa tu tarampak kema; mintu’ tu tenda rampe sau’na bannang lenang melo dikaridi’ la digaraga; saratu’ sikunna tu landona dao sangsesena;

¹⁰sia la den lentongna duangpulo, dilette’i tambaga duangpulo sia mintu’ pekadangna sia tokeranna salaka digaraga.

¹¹Susi dukato tu rampe rekkena unturu’ landona tu tenda; la saratu’ sikunna tu landona, sia la den lentongna duangpulo, dilette’i duangpulo tambaga sia mintu’ pekadangna sia tokeranna salaka digaraga.

¹²Sangka’na tarampak dio rampe matampu’ la limangpulo siku tu tendana, na sangpulo tu lentongna situang lette’.

¹³Susi dukato tu sangka’ tarampak rampe matallona la limangpulo siku.

¹⁴Sia sangpulo lima siku tu tenda dio sangsesena, na tallu tu lentongna situang lentekna.

¹⁵Sia sangpulo lima siku tu tenda dio sangsesena pole’o natallu tu lentongna situang lette’na.

¹⁶Dio to ba’ba tarampak iato la den misa’ kulambu duangpulo siku bannang ma’rupa lango-lango sia lango-lango makaseda sia karamisi sia bannang melo dikaridi’ misa’ pa’tannun paruki’ na a’pa’ tu lentongna situang lette’na.

¹⁷Mintu’ te lentong iate tiku lao tarampak napasikande mintu’ tokeran salaka; iatu pekadangna salaka na iatu lette’na tambaga digaraga.

¹⁸Iatu tarampak iato la saratu’ siku landona sia sangka’na limangpulo siku patomali sia langka’na lima sikunna, tu bannang lenang dikaridi’ digaraga na mintu’ tu lette’na tambaga.

¹⁹Iatu pareanan kema tu dipake umpabendanni, sia petangki’na sia petangki’ lentong lu ba’ba, tambaga nasang digaraga.

²⁰La musua tu mintu’ to Israel umbangko minna’ bua saitun dilambuk sia malino, la dipatama palita, anna tontong dukku tu palita iato.

²¹Lan tu tenda kasitammuan dio salian kulambu tu dio olona kasa’bian, la napasakka’ Harun sia mintu’ anakna muane dio oloNa PUANG randuk dio mai makaroen sae lako melambi’; iamote tu misa’ aluk dipondok matontongan lako mintu’ to Israel la nasiosso’i.