Read Toraja-Sa'dan KATASSURAN 28 Bible Online

KATASSURAN 28 - Toraja-Sa'dan bible

KATASSURAN 28

¹Suai tu Harun kakammu sia mintu’ anakna muane mengkareke’ lako kalemu dio mai mintu’ to Israel la ungkarang toean to minaa lako Kaleku, iamotu Harun sia Nadab sia Abihu sia Eleazar sia Itamar, anakna Harun.

²Sia garaganni Harun kakammu tu pakean masero anna pomaramba’i.

³Sia suai tu mintu’ to pande sia matarru’, tu Kuponnoi penaa kinaa, unggaragan pakeanna Harun, anna dipamarimbangan tete dio pakean iato, anna toei tu katominaan lako Kaleku.

⁴Iatu mintu’ pakean tu la nagaragai tau iato mai iamotu: misa’ pesambo ara’, misa’ epo’, sanglamba’ bayu salian, sanglamba’ bayu paroki’ lanna lu, sanglamba’ passapu sia sanglamba’ pepori aak pa’tannun. La napasusimoto nagaragan Harun kakammu sia mintu’ anakna tu pakean masero, kumua anna toei tu katominaan lako Kaleku.

⁵Mintu’nate la narampunan bulaan dolo sia bannang lango-lango sia bannang lango-lango makaseda sia bannang karamisi sia lenang melo.

⁶Iatu epo’ bulaan la digaraga sia bannang lango-lango sia bannang lango-lango makaseda sia bannang karamisi sia lenang dikaridi’: misa’ pa’tannun kamanarangan.

⁷Dio palempengna la den da’dua ulang sikande, na dio tampakna patomali nanii tu pa’pasikandean.

⁸Iatu beke’ dibekeran epo’ la dipapada garaganna sia la dipasikande epo’ bulaan la digaraga sia bannang lango-lango sia bannang lango-lango makaseda sia bannang karamisi sia lenang dikaridi’.

⁹La unnalako duang batu ake’ ido, ammu sura’i dio tu mintu’ sanganna to Israel.

¹⁰Iatu mintu’ sanga iato annan tu dao misa’ batu parimata na iatu senga’na annan la dao tu batu parimata misa’nao, situru’ kadadianna tau iato mai.

¹¹Susi garaganna passura’ parimata, iamotu susi garaganna passura’ parimata peca’, la mupesuan ussura’i tu mintu’ sanganna to Israel dao tu da’dua batu parimata; sia la mupesuan ussa’pi’i bulaan.

¹²Iatu da’dua batu parimata la mupalako da’dua petampi’ palempeng epo’, la dadi parimata kapengkilalan diona to Israel, anna iatu mintu’ sanganna tau iato mai la napassan Harun dao petampi’ palempengna patomali dio oloNa PUANG, la dadi misa’ kapengkilalan.

¹³La mugaragai pela’ka’ bulaan,

¹⁴sia rante bulaan massang duang tinting, diampinni’ dipopa’karawang na iatu rante diampinni’ la mupale’ke’ lako pela’ka’ parimata iato.

¹⁵Sia la unggaragako misa’ pesambo ara’ pangra’ta’, misa’ panggaraga kamanarangan, la susi epo’ garaganna: bulaan la digaraga sia bannang lango-lango sia bannang lango-lango makaseda sia bannang karamisi sia lenang dikaridi’.

¹⁶Iatu apa iato la massulapa’ a’pa’ sia la duang papa’, sangdangkan landona, sia sangdangkan duka sangka’na.

¹⁷La mumatai parimata patang borong, bunga’na sangbatu parimata Yaspisi’ mararang sangbatu parimata krisoli’, na sangbatu parimata malaki’, iamoto tu borong bunga’na;

¹⁸iatu borong ma’penduanna sangbatu ake’ malontong, sangbatu parimata lasuri’, na sangbatu parimata yaspisi maido;

¹⁹iatu borong ma’pentallunna sangbatu parimata amba’, sangbatu parimata ake’, na sangbatu parimata ketubung;

²⁰iato borong ma’penna’pa’na, sangbatu parimata pirusa’, sangbatu parimata ake’ maido, na sangbatu parimata nepri’; mintu’ parimata iato la disa’pi’ bulaan lan to’ inanna.

²¹Mintu’ parimata iate la situru’ tu sanganna anakna Israel, la sangpulo dua pada bilanganna sanganna; la disura’ susi panggaraga parimata peca’; iatu apa la disura’ lan la situru’ tu sanganna sangpulo dua sukunna to Israel simisa’-misa’i.

²²Ia mugaragan rante bulaan massang tu pesambo ara’ diampinni’,

²³sia garagai tu da’dua sissin bulaan daona lu pesambo ara’, ammu pale’ke’i tu sissin iato da’dua lako tampak pesambo ara’ patomali.

²⁴Mangkato pale’ke’i tu duang tinting rante bulaan dipasibaroe’-roe’ lako tu da’dua sissin dio tampak pesambo ara’.

²⁵Iatu tampakna rante duang tinting diampinni’ la mupale’ke’ lako da’dua pela’ka’ petampi’ palempeng epo’ dio tingayo.

²⁶Sia tampai tu da’dua sissin bulaan pale’ke’i lako tampak pesambo ara’, dio biring lanna lu, umpatu epo’.

²⁷Sia tampai tu da’dua sissin bulaan pale’ke’i lako petampi’ palempeng epo’ patomali, diongna lu, dio tingayo, sikandappi’ pa’pasikandeanna dao lu pepori epo’.

²⁸Na iatu pesambo ara’ la dipori lako epo’, na iatu sissinna napasipori ulang lango-lango, anna manda’ dao pepori epo’ anna iatu pesambo ara’ tae’ natilendok dao mai epo’.

²⁹Susimoto la narengnge’ Harun tu mintu’ sanganna anakna Israel lan pesambo ara’ pangra’ta’ daona lu penaanna, ke tamai inan maindan la misa’ kapengkilalan matontongan dio oloNa PUANG.

³⁰Lan tu pesambo ara’ pangra’ta’ la mupannii Urim sia Tumim, kumua anna daona lu penaanna Harun, ke mennoloi lako PUANG, sia natontong Harun urrengnge’i daona lu penaanna dio oloNa PUANG la umpadenan kara’tasan to Israel.

³¹Sia la mugaragaipa tu bayu salian lango-lango massang diongna lu epo’.

³²Sia iatu baroko bayu salian la ma’tangnga melo sia iatu biring baroko bayu iato la matottok susi tannun bayu kararran, da naserek.

³³Dio to’ biringna la mugaragai tu susi bua dalima, ma’rupa lango-lango sia lango-lango makaseda sia karamisi, dio biringna tiku lao, dipasialla’-alla’ giring-giring bulaan;

³⁴misa’oi giring-giring misa’oi bua dalima, dio tu biring bayu salian tiku lao.

³⁵La napake Harun te, ke menombai, anna rangii tau tu oninna ke tamai inan maindan dio oloNa PUANG sia iake tassu’i, kumua da namate.

³⁶Sia la unggaragaiko makota bulaan massang sia sura’i lan susi passura’ peca’: Dipamaindanan PUANG.

³⁷Pasikandei passapu dipori ulang lango-lango, dio tingayo passapu.

³⁸Iatu makota la dio kidena Harun, anna passanni Harun tu salana mintu’ apa masero, tu napamarimbangan to Israel, dio mintu’ apa masero tu nasorong napopamengan to Israel; tontong bang dio kidena tu makota iato, anna bannang dio makota iato Napopaimanni PUANG tu tau iato mai.

³⁹Sia iatu bayu lanna lu bannang melo mupopetannunanni mupopassura’-sura’i tu tannunna, sia iatu passapu lenang melo la mugaraga sia iatu pepori aak la mutannun paroki’.

⁴⁰Iatu mai mintu’ anakna Harun tu mai muane la mugaragan bayu lanna lu sia popegaraganni tu pepori aakna sia popegaraganni tali anna pomala’bi’i sia napobeloi.

⁴¹Mintu’nate la mupakean Harun sia mintu’ anakna muane, ammu bolloi minna’ busarungngu’ tu tau iato mai sia tokkoi sia pamarimbanganni, anna toei tu katominaan lako Kaleku.

⁴²Sia garaganni seppa lenang tu tau iato mai la ussamboi kasirisanna; na iatu seppa iato randuk dao mai aakna sae rokko pupunna.

⁴³Manassa la napake Harun to sola mintu’ tu mai anakna, ke tamai tenda kasitammuan, ba’tu iake mennoloi lako to’ inan pemalaran la menomba lan inan maindan, da naruai kasalan, anna mate. Iamote tu dadi misa’ atoran matontongan lako kalena sia lako bati’na.