Read Toraja-Sa'dan KATASSURAN 3 Bible Online

KATASSURAN 3 - Toraja-Sa'dan bible

KATASSURAN 3

¹Iatu Musa ullaai bembe’ sia dombana Yitro, matusanna, to minaa dio Midian. Den pissan tonna baai tu bembe’ sia dombana ullendu’i padang pangallaran, rampomi lako buntunNa Puang Matua, disanga Horeb.

²Umpaombo’mi kalena tu Malaeka’Na PUANG susi dukku api lan duri sangkombong. Mangngami untiroi: to’ duri ma’lana-lana, apa tae’ nakandei api.

³Natangnga’mi Musa lan penaanna: La malena’ lako untiroi tu apa kalle-kallean iato, ma’apai natae’ namampu’ tu to’ duri iato.

⁴Iatonna tiroi PUANG tu Musa la sae untiroi, metambami Puang Matua lako lan mai to’ duri iato, Nakua: E Musa, Musa! Mebalimi nakua: Io Puang!

⁵Ma’kadami Puang lako Nakua: Da mureke’i mai, alai tu sepatummu, belanna iatu munii bendan, padang maindan.

⁶Sia Nakua dukapa: Akumote tu Kapenombanna ambe’mu, iamotu Kapenombanna Abraham sia Kapenombanna Ishak sia Kapenombanna Yakub. Nabungku’mi Musa tu lindona, belanna mataku’ untiro Puang Matua.

⁷Ma’kadami tu PUANG, Nakua: Kutiro tonganmo tu kamandasan rampo lako taungKu dio Mesir sia Kurangimo sarrona napobua’ mintu’ bandoro’ masarrangna sia Kuissan tonganmo tu mintu’ kamaparrisanna.

⁸Iamoto Kusonglo’ la urrampananni lan mai kuasanna to Mesir sia ussolanni tassu’ lan mai tondok iate lako misa’ tondok melo sia kalua’, iamotu misa’ tondok sebo pangandu’na sia tani’ enoan, tu napa’tondokki to Kanaan sia to Het sia to Amori sia to Feris sia to Hewi na to Yebus.

⁹Tonganna iatu sarrona to Israel rampomo lako oloKu sia Kutiromo tu pa’pakario-rio nagauranni to Mesir tu tau iato mai.

¹⁰Iamoto maimoko angku suako male mennolo lako Firaun, ammu solanni sun lan mai tondok Mesir tu taungKu, iamotu to Israel.

¹¹Ma’kadami tu Musa lako Puang Matua, nakua: Tau apara’ te, angku la umpennoloi Firaun sia la ussolan to Israel tassu’ lan mai tondok Mesir?

¹²Ma’kadami tu Puang Matua nakua: Inang la Kurondongko sia iamote tu la dadi misa’ tanda lako kalemu, kumua Aku ussuako: iammu solanni tassu’ tu bangsa iato lan mai Mesir, la menombakomi langngan Puang Matua dao tanete iate.

¹³Ma’kadami tu Musa lako Puang Matua, nakua: Iake rampona’ lako to Israel, angku ma’kada lako kumua: Aku te nasua Kapenombanna nene’ to dolomi sae lako kalemi, anna mekutana tu tau iato mai nakua: mindara sanganNa, naapa la kupebalian lako kalena?

¹⁴Ma’kadami tu Puang Matua lako Musa Nakua: Aku Den tu inang Denna’ sia Nakuapa: Susite tu la mupokada lako to Israel, kumua: Aku Den tu ussuana’ sae lako kalemi.

¹⁵Ma’kadami tu Puang Matua lako Musa, nakua: Susimo la mupokada lako to Israel, kumua: Iatu PUANG, Kapenombanna nene’ to dolomi, Iamo Kapenombanna Abraham, Ishak na Yakub ussuana’ sae lako kalemi sia Nakua: iamote tu sangangKu tontong sae lakona sia sanga iamote tu misiosso’i la ussa’bu’Na’.

¹⁶Malemoko ammu rampunni tu mintu’ to matua-tuanna Israel, sia ma’kada lako tau iato mai, kumua: Iatu PUANG, Kapenombanna nene’ to dolomi iamotu Kapenombanna Abraham, Ishak na Yakub paan lako kaleku sia Nakua: Kutiro tonganmokomi sia iatu mintu’ apa digaurangkomi dio tondok Mesir.

¹⁷Iamoto Kuma’kada Kukua: La Kusolangkomi lan mai kamaparrisan lan Mesir lako tondok to Kanaan sia to Het sia to Amori sia to Feris sia to Hewi na to Yebus, iamotu lako tondok sebo pangandu’na sia tani’ enoan.

¹⁸La naperangii tau iato mai tu kadammu, ammi male, la iko la mintu’ to matua-tua to Israel lako datu Mesir, ammi ma’kada lako, kumua: Iatu PUANG, Kapenombanna to Ibrani paanmo lako kaleki; iamoto elorangkanni te sola nasang male tama padang pangallaran, angki memala’ lako PUANG Kapenombangki.

¹⁹Apa Kuissan tu diona datu Mesir, kumua inang tae’ anna la unnelorangkomi male, moi nalima mawatang umparukui.

²⁰Iamoto la Kue’te’ tu limangKu umpandasai tu to Mesir sia umparampoi mintu’ tanda kalle-kallean, tu la Kupogau’ lan; mangka to namane unnelorangkomi male.

²¹La Kupatiakka’ penaanna tu to Mesir anna katuru-turui tu tau iate mai, naurunganni iake tassu’komi male, tae’ mila ma’pala’ lo’bang.

²²Belanna mintu’ baine la umpalakui lako sangbanuanna ba’tu lako siruranna tu ma’rupa-rupa pareanan salaka sia bulaan sia tamangkale, tu napapakean anakna muane sia baine; la mipasusimoto umpangrampai tu tondok Mesir.