Read Toraja-Sa'dan KATASSURAN 31 Bible Online

KATASSURAN 31 - Toraja-Sa'dan bible

KATASSURAN 31

¹Ma’kadami tu PUANG lako Musa Nakua:

²Kilalai tonganni kumua mangkamo Kutambai sanganna tu Bezaleel, anakna Uri, anakna Hur, dio mai suku Yehuda,

³tu Kuponnoi PenaanNa Puang Matua, iamotu kakinaan, pa’inaan sia kapaissanan lan mintu’ pengkarangan lima,

⁴la untangnga’i tu pandiri sia untampai tu bulaan sia salaka sia tambaga susitu pandiri iato;

⁵la ussura’ parimata sia umpale’ke’ parimata; sia ussura’ kayu sia ungkarang ma’rupa-rupa pengkarangan.

⁶Akumo umpasolai Aholiab, anakna Ahisamakh, dio mai suku Dan; iatu penaanna to pande Kupatamaimo kakinaan, la ungkarangi tu mintu’ apa Kupesuan lako kalemu.

⁷Iamotu tenda kasitammuan sia patti dipannii kasa’bian sia iatu tutu’ pebase kasalan daona lu, sia mintu’ pareanan tenda,

⁸sia meda sola mintu’ pareananna, sia tongkonan palita bulaan massang sola mintu’ pareananna, sia iatu inan pemalaran pantunuan dupa,

⁹sia inan pemalaran dinii mantunu sola mintu’ pareananna, sia pembasean situang lette’,

¹⁰sia mintu’ pakean pangka’, iamotu mintu’ pakean maindan tu napake Harun, to minaa, sia mintu’ tu pakeanna anakna, tu napake ungkarang toean to minaa,

¹¹sia minna’ dipa’minnakan sia dipa’bolloan sia dupa pebangki’ busarungngu’ tu dipalan inan maindan; la nakarang tau iato mai susitu mintu’ apa Kupasan lako kalemu.

¹²Ma’kadami tu PUANG lako Musa Nakua:

¹³Pokadanni to Israel, kumua: Karitutui meloi tu mintu’ allo katorroangKu, belanna iamoto tu misa’ tanda lan alla’ta, misiosso’i, anna issanni tau kumua Akumote tu PUANG umpamarimbangankomi.

¹⁴Iamoto karitutui to allo katorroan, belanna iamo misa’ apa masero lako kalemi; minda-minda tu umpamatunai, la mate dipongko, belanna minda-minda mengkarang lan allo iato, la disabu’i lan mai bangsana.

¹⁵Sipatu lan annan allona nannii tau mengkarang, apa allo ma’pempitu iamo allo katorroan sundun tu maindan lako PUANG; minda-minda tu mengkarang lan allo katorroan iato, manassa la mate dipongko.

¹⁶Iamoto anna mintu’ to Israel la ussiosso’i nakaritutui tu allo katorroan, ke napakarayai, anna pobasse matontonganni.

¹⁷Allo iamoto tu dadi misa’ tanda matontongan lan alla’Ku na to Israel, belanna lan annan allona Nanii PUANG umpadadii tu langi’ sola lino, anNa torroi PUANG tonna allo ma’pempitu sia melayo.

¹⁸Iatonna mangkamo tu PUANG ma’kada lako Musa dao buntu Sinai, Nakamaseammi Musa tu da’dua papan batu kasa’bian, iamotu papan batu Nasura’ rakka’Na Puang Matua.