Read Toraja-Sa'dan KATASSURAN 32 Bible Online

KATASSURAN 32 - Toraja-Sa'dan bible

KATASSURAN 32

¹Iatonna tiromi tu buda, kumua male’lanmo tu Musa mengkalao dao mai buntu iato, sirampunmi lako Harun nama’kada nakua: Maikomi migaragangkanni tu mai rapang-rapang dipodeata tu undoloangkan, belanna iatu Musa, tu to ussolangkan lan mai tondok Mesir, tae’mo kiissanni ba’tu umbamo nakua dadinna.

²Ma’kadami Harun lako tau iato mai nakua: Sintakki tu mintu’ paku-paku bulaan dio mai talinganna bainemi sia anakmi muane sia baine mibanna’ mai.

³Nasimpula’imi to buda tu mintu’ paku-paku bulaan dio mai talinganna anna banni Harun.

⁴Natarimami dio mai tau iato mai anna tarekki pesura’ susi anak sapi, anna garagai anak sapi dipati’no’. Nakuami: E to Israel iamote tu deatammu, tu ussolangko sun lan mai tondok Mesir.

⁵Iatonna tiromi Harun tu iannato, napabendanammi misa’ inan pemalaran dio tingayona, anna metamba nakua: Masiang la ma’gau’ki’ lako PUANG.

⁶Iatonna melambi’ napemalarammi tau iato mai tu pemala’ ditunu pu’pu’ sia napennoloan tu pemala’ kasalamaran, anna unno’ko’ kumande sia mangiru’; mangkato bendanmi ma’marua’-rua’ maningo.

⁷Attu iato ma’kadami PUANG lako Musa Nakua: Malemoko, mengkalaomoko belanna iatu bangsamu, tu musolan sun lan mai Mesir kadakemo gau’na.

⁸Madomi’ bang tu tau iato mai sepang dio mai lalan, tu Kupasan lako kalena: nagarammo kalena tu misa’ anak sapi dipati’no’, anna tukku umpenombai anna pemalaranni tu pemala’ lako, anna ma’kada nakua: E to Israel, iamote tu deatammu, tu ussolangko sun lan mai tondok Mesir.

⁹Sia Nakuapa PUANG lako Musa: Iate bangsa iate Kutiro, manassa tongan misa’ bangsa makarra’ penaanna.

¹⁰Totemo da’ito anna rampoi kare’dekanna ara’Ku sia la Kusabu’i angKu padadiko misa’ bangsa kapua.

¹¹Mengkamase-masemi tu Musa dio oloNa PUANG, Kapenombanna nakua: O PUANG, ma’apari amMi la umparampoiri kare’dekanna ara’Mi tu taumMi tu Misolan lan mai tondok Mesir tete dio kamatotoran kapuaMi sia lima mawatangMi?

¹²Ma’apai na la ma’kada tu to Mesir kumua: Ia sia Nasolanni tassu’ tu tau iato mai, kumua anna sanggang Napatei dio lu to’ buntu sia Nasabu’i dao mai kuli’na padang? Paradanmi tu kare’dekanna ara’Mi sia penassanni tu kasengkean la Miparampoan taunMi.

¹³Kilalai tu taumMi Abraham sia Ishak sia Israel, tu umpalaoKomi sumpa unnallu’i tete dio Kalemi lako tau iato mai sia ma’kada lako kumua: La Kupopemba’ka’ kalle-kallean tu bati’mi susi bintoen dao langi’, na mintu’ tu padang tu Kupokadammokomi a’ganna, la Kukamasean bati’mi, la napomana’ tontong sae lakona.

¹⁴Attu iato menassanmi tu PUANG diona tu kasanggangan la Napasae lako mintu’ taunNa susitu mangka Napokada.

¹⁵Messailemi tu Musa, anna mengkalao dao mai buntu untangkei tu da’dua papan nanii kasa’bian. Iatu papan iato disura’ patomali, iamotu boko’na sia tingayona.

¹⁶Iatu papan da’dua panggaraganNa Puang Matua, na iatu passura’ lan passura’Na Kapenomban, tu tioki’ lan papan iato.

¹⁷Iatonna rangimi Yosua tu gamaranna to buda unnarrak-arrak, ma’kadami lako Musa nakua: Den arrak to parari lan to’ tenda.

¹⁸Apa nakua Musa: Tangia arrak to patalo sia tangia gamara to talo, sangadinna kurangi tu to menani sibali-bali.

¹⁹Iatonna reke’mi tu to’ tenda sia iatonna tiromi tu anak sapi sia iatu to buda tumbang-tumbang re’dekmi ara’na tu Musa, anna pentibeanni tu papan da’dua, natesse-tessei diong se’pon tanete.

²⁰Naalami tu anak sapi nagaragai tau iato mai, anna tunui sia nanisak-nisak samanissangna, anna ambo’i rokko to’ uai, nasuai tu to Israel unniru’i.

²¹Ma’kadami Musa lako Harun nakua: Napatumbaroko te to buda ammu pasaeanri kasalan kapua susite?

²²Nakuami Harun: Da natarru’ re’dek ara’na puangku; mitandaimo tu a’ganna bangsa iate kumua umparri-parri kakadakean.

²³Ma’kada tu tau iato mai lako kaleku nakua: Garagangkanni tu mai rapang-rapang dipodeata tu undoloangkan, belanna iatu Musa, tu to ussolangkan lan mai tondok Mesir, tae’mo kiissanni ba’tu umbamo nakua dadinna.

²⁴Ma’kadamo’ lako tau iato mai kukua: Minda-minda tu umpake bulaan la naalai, nabenna’; kubuangmi tama to’ api, anna sun susite anak sapi.

²⁵Attu iato natiromi Musa tu a’ganna tau iato mai ma’inaanna bangmo, belanna napopa’inaanna Harun naurunganni tattammo tu tau iato mai lako to unneai.

²⁶Bendanmi tu Musa dio babangan to’ tenda, anna ma’kada nakua: Minda-minda tu mengkaola lako PUANG, nasae lako kaleku; ma’rampunmi lako kalena tu mintu’ to Lewi.

²⁷Ma’kadami Musa lako tau iato mai nakua: Susite tu kadanNa PUANG, iamotu Kapenombanna to Israel, Nakua: Pada untakinkomi pa’dangmi, mimale lu lako lu dio mai lan lu to’ tenda dio mai misa’ ba’ba lako ba’ba senga’, ammi pada umpatei tu siulu’mi sia sangmanemi sia solami.

²⁸Napogau’mi to Lewi susitu kadanna Musa; allo iato, mate tu tau iato agi-agi tallungsa’bu.

²⁹Ma’kadami tu Musa nakua: Allo iate ammi tama sangtorroanna to umpenombai PUANG — ammi pada tae’mo ungkatirinnai tu anakmi ba’tu siulu’mi, kumua ammi dipamasakke.

³⁰Iatonna masiangmo dio mai ma’kadami tu Musa lako to buda: Mangkamokomi umpogau’ kasalan kapua; totemo la kendekna’ umpennoloi PUANG, lala siai manii kupadenanni kadiseroian tu kasalammi.

³¹Sulemi tu Musa lako PUANG, anna ma’kada nakua: Ah, iate bangsa iate umpogau’ kasalan kapua, unggaragan kalena deata bulaan.

³²Totemo ke ma’dinni, Mipa’dei salana tau iato mai; iake tae’i, puttaina’ lan mai sura’Mi tu mangka Misura’.

³³Ma’kadami tu PUANG lako Musa Nakua: Tau iato tu la Kuputtai lan mai sura’Ku iamotu to umpogau’ kasalan lako Kaleku.

³⁴Totemo malemoko, solanni te bangsa iato lako inan, tu Kupokadangko; malaeka’Ku la undoloangko, apa ianna allo kapa’balarangKu, la Kupabala’i tu kasalanna tau iato mai.

³⁵Susimo kaNapa’dikkianna PUANG tu bangsa iato, belanna unggaragai anak sapi tu mangka napandiri Harun.