Read Toraja-Sa'dan KATASSURAN 33 Bible Online

KATASSURAN 33 - Toraja-Sa'dan bible

KATASSURAN 33

¹Ma’kadami PUANG lako Musa Nakua: Ke’de’moko indete mumale, la iko la iate bangsa iate tu musolan lan mai tondok Mesir lako tondok tu umpalaoNa’ sumpa unnallu’i lako Abraham, Ishak na Yakub, Kukua: La Kukamasean bati’mu

²— la ussuaNa’ misa’ malaeka’ undoloangko sia la Kurambai tassu’ tu mintu’ to Kanaan sia to Amori sia to Het sia to Feris sia to Hewi sia to Yebus —

³lako tondok sebo pangandu’ sia tani’ enoan, apa tae’ Kula ke’de’ ussolangkomi, belanna kamumo tu misa’ bangsa makarra’ penaammi, Kusabu’ikomi manii lako lalan iate.

⁴Tonna rangimi to buda te kada metakuran iate, masussami penaanna, naurunganni tae’mo’ misa’ umpake belona.

⁵Ma’kadami tu PUANG lako Musa Nakua: Pokadanni to Israel kumua: kamumo misa’ bangsa makarra’ penaammi. Moi angKu sattu’ri ke’de’ ussisolangkomi, manassa la Kusabu’ikomi. Iamoto alai tu mintu’ belomi, angKu issanni apa tu sipatu la Kupogau’ lako kalemi.

⁶Nalossokammi to Israel tu belona, randuk dio mai buntu Horeb.

⁷Unnalami misa’ tenda tu Musa, anna pabendan dioi lu salian mambela dio mai to’ tenda, anna sangai tenda kasitammuan. Minda-minda la mekutana lako PUANG, la tassu’ male lako to’ tenda kasitammuan.

⁸Sia ianna tassu’ tu Musa lako tenda iato ke’de’ nasangmi tu mintu’ tau, anna pada bendan dio to’ ba’ba tendana, umpaula’i mata tu Musa sae lako tamanna tenda iato.

⁹Ianna tamamo tenda tu Musa, ta’pa songlo’ tu lentong gaun, anna tadang dio to’ ba’ba tenda, anna sipa’kada Puang tu Musa.

¹⁰Iatonna tiromi to buda tu lentong gaun iato tunannang dio to’ ba’ba tenda, bendan nasangmi, anna pada tukku menomba dio ba’ba tendana.

¹¹Sitiro lindomi PUANG tu Musa, Nama’kada lako Musa, butung to misa’ tolino sipa’kada sangmanena; mangkato sulemi tu Musa lako to’ tenda. Apa iatu taunna, iamo Yosua, anakna Nun misa’ to mangura, tae’ namallai dio mai tenda iato.

¹²Ma’kadami Musa lako PUANG nakua: Tonganna Mikua lako kaleku: Solanni te bangsa iate, anna tae’ Mipokadanna’ minda tu la Misua ussolanna’ moi mangkamo Mikua: Kutandai tonganko sia Kukaturu-turuiko.

¹³Iake Mikaturu-turuina’, paissannina’ tu lalanMi kuurungan untandaiKomi, ianna susito kuissan tonganmo, kumua Mikaturu-turuina’. Melo Mikilalai, kumua iate bangsa iate taumMi.

¹⁴Ma’kadami PUANG Nakua: Aku Kalenaraka la ussolangko, anna pomatanai penaammu?

¹⁵Ma’kadami Musa lako PUANG nakua: Iake tae’i na Kamu Kalena ussolangkan, da Misuakan ke’de’ indete.

¹⁶Belanna umba la dikua unnissanni, kumua Mikaturu-turuina’, la aku la taumMi? Tang bannang iaraka te ke Misolangkanni? Susimo kadipamarimbangangki to, la aku la taumMi dio mai mintu’ bangsa dao kuli’na padang.

¹⁷Ma’kadami tu PUANG lako Musa Nakua: Iate apa mupokada, la Kupogau’, belanna Kukaturu-turuiko sia Kutandai tonganko.

¹⁸Nakuami Musa: Patiroammo’ tu kamala’biramMi.

¹⁹Ma’kadami tu PUANG Nakua: Iamoto la Kupalendu’iko tu mintu’ kamadatuangKu sia la ussa’bu’Na’ sanganNa PUANG dio tingayomu: iamoto angKu katuru-turui, minda-minda tu Kukaturu-turui, sia Kukamasei minda-minda tu Kukamasei.

²⁰Sia nakuapa kadanNa PUANG: tae’ nama’din mutiro tu lindoku, belanna moi misa’ tolino tae’ nakullei untiroNa’ anna tuo.

²¹Sia Nakuapa PUANG: Den misa’ inan Kusikandappiran, inde to la munii bendan dao buntu batu.

²²Iake lendu’mi tu kamala’birangKu, angKu palanko lo’ko’ batu sia la Kuparerungiko limangKu sae lako lendu’Ku.

²³Attu iato Kuriu’mi sule tu limangKu, ammu tiroi tu boko’Ku, apa iatu lindoKu tae’ nama’din ditiro.