Read Toraja-Sa'dan KATASSURAN 35 Bible Online

KATASSURAN 35 - Toraja-Sa'dan bible

KATASSURAN 35

¹Nasuami Musa sirampun tu mintu’ kasirampunan to Israel, anna ma’kada lako tau iato mai nakua: Iamote tu mintu’ kada Napepasanan PUANG, kumua naturu’i tau iato mai.

²Sipatu lan annan allona la dinii mengkarang, apa iake allo ma’pempitu la mipoattu maindan, iamo misa’ allo katorroan sundun lako PUANG: minda-minda tu mengkarang allo iato, la dipatei.

³Iake allo katorroan da mipadukku api lan mintu’ banuammi.

⁴Sia nakuapa Musa lako to Israel: Iamote tu kada Napepasanan PUANG Nakua:

⁵Dio mai tu apammi la miala pira ammi pa’durukanni lako PUANG; mintu’i tu tau la umbaai butung pamengan lako PUANG situru’ kamasorokan penaanna: Iamotu bulaan sia salaka sia tambaga,

⁶sia parada lango-lango sia lango-lango makaseda sia karamisi sia lenang melo sia bulu bembe’,

⁷sia kuli’ domba laki pa’damorro’ mararang sia kuli’ taka’ sia kayu simmin,

⁸sia minna’ la ma’pamasiang sia bangki’ la dirauan minna’ la dipa’minnakan sia dipa’tokkoan sia la ditunu dipodupa;

⁹sia ake’ ido sia parimata la dipa’matan epo’ sia pesambo ara’.

¹⁰Mintu’ tu pande dio lu kalemi pada la sae unggaragai tu mintu’ apa Napepasanan PUANG:

¹¹Iamotu kema sola tendana sia pesambona sia pekadangna sia papanna sia pesa’pi’na sia lentongna sia lette’na;

¹²sia iatu patti sola pebullena sia tutu’ pebase kasalan sia kulambu dipa’rerungan;

¹³sia iatu meda sola tu pebullena sia mintu’ pareananna sia roti dipennoloan;

¹⁴sia iatu tongkonan palita la ma’pamasiang sia la dipasakka’ tu mintu’ pareananna sia palitanna sia iatu minna’ la napadukku;

¹⁵sia iatu inan pemalaran pantunuan dupa sola pebullena, sia minna’ la dipa’minnakan sia dipa’tokkoan sia dupa busarungngu’; sia kulambu la digaragan kulambu ba’ba kema,

¹⁶sia iatu inan pemalaran dinii mantunu sola sala’bi’ tambagana sia pebullena sia mintu’ pareananna, sia iatu pembasean sola lentekna;

¹⁷sia tenda dio lu tarampak sola lentongna sia lette’na sia kulambu ba’ba tarampak;

¹⁸sia petana’ kema, petana’ tarampak sola ulangna;

¹⁹sia pakean pangka’ la napake menomba lan inan maindan, iamotu pakean maindan la napake Harun to minaa sia mintu’ pakeanna anakna, la untoe katominaan.

²⁰Soro’mi tu mintu’ kasirampunan to Israel dio mai tingayona Musa.

²¹Pada saemi tu mintu’ to tiakka’ penaanna sia masorok ba’tengna umbaa pa’duruk lako PUANG la dipake unggaragai tenda kasitammuan sia la dipake lan mintu’ kamenomban sia la digaraga pakean masero.

²²Pada saemi la muane la baine minda-minda masorok penaanna umbaa baba’ illong sia anting-anting sia sissin diparimatai sia manik ata sia ma’rupa-rupa pareanan bulaan. Iatu mintu’ muane tu umpennoloan bulaan dipopemala’ disorong ditarima sule lako PUANG,

²³sia mintu’ muane tu unnampui parada lango-lango sia lango-lango makaseda sia karamisi sia lenang melo sia bulu bembe’ sia kuli’ domba laki pa’damorro’ mararang sia kuli’ taka’ pada sae nabaa.

²⁴Minda-minda tu den salaka ba’tu tambaga la napopa’duruk, nasorong lako PUANG, sia minda-minda unnampui kayu simmin, tu la dipake lako pengkarangan kamenomban, nasae umbaai.

²⁵Mintu’ tu baine manarang ma’karidi’ kalena, nabaai tu pa’karidi’na: lango-lango sia lango-lango makaseda sia karamisi sia lenang melo,

²⁶sia mintu’ tu baine manarang sia tiakka’ penaanna, ungkaridi’ bulu bembe’.

²⁷Iatu mintu’ pangulu umbaamo parimata ake’ maido, sia parimata dipa’matan epo’ sia pesambo ara’,

²⁸sia pebangki’ sia minna’, iamotu minna’ la dipatama palita sia pebangki’ la digaragai minna’ dipa’minnakan sia dipa’tokkoan sia digaragai dupa.

²⁹Mintu’ muane sia baine tu tiakka’ penaanna la umbaai tu apa la dipopengkarangan tu Napa’pesuan PUANG nalopian Musa — mintu’ to Israel umpopa’langngo’ penaanna umbaai to la napopamengan lako PUANG.

³⁰Undinnato nakuami Musa lako mintu’ to Israel: Tonganna Natambai PUANG tu Bezaleel tu Nasa’bu’ sanganna, iamotu anakna Uri, anakna Hur, dio mai suku Yehuda,

³¹sia Naponnoi penaanNa Puang Matua, iamotu kakinaan, pa’inaan sola kapaissanan lan mintu’ pengkarangan,

³²la untangnga’i tu pandiri sia unggaragai bulaan tu natampa sia salaka sia tambaga susitu pandiri iato;

³³sia ussura’ parimata sia umpale’ke’ parimata; sia ussura’ kayu sia unggaragai tu mintu’ napandirinna.

³⁴Sia Nakamasei Puang kamanarangan lan penaanna la mangada’ lako to senga’, la ia la Aholiab, anakna Ahisamakh dio mai suku Dan.

³⁵Naponnoimi kamanarangan sola duai tu ba’tengna la ungkarangi tu mintu’ pengkarangan pande sia pande paliu, sia to manarang ma’tannun paruki’ dio mai bannang lango-lango sia lango-lango makaseda sia karamisi sia lenang melo, sia to manarang ma’tannun: manarang ungkarang ma’rupa-rupa pengkarangan sia manarang unggaragai pandiri.