Read Toraja-Sa'dan KATASSURAN 36 Bible Online

KATASSURAN 36 - Toraja-Sa'dan bible

KATASSURAN 36

¹Iatu Bezaleel sia Aholiab sia mintu’ to manarang tu Nakamasei PUANG kakinaan sia pa’inaan diona tu apa iato, anna issanni ungkarangi tu mintu’ pengkarangan kamenomban lan inan maindan la nakarang susitu mintu’ apa Napepasanan PUANG.

²Natambaimi Musa tu Bezaleel sia Aholiab sia mintu’ to manarang, tu Napatamai PUANG kakinaan tu ba’tengna, tu mintu’ to dipatiakka’ penaanna la sae ungkarangi tu pengkarangan iato.

³Natarimami dio mai Musa tu mintu’ pa’duruk tu nabaa to Israel la dipake lako pengkarangan, tu dikarang menomba, lan inan maindan, kumua anna karangi tu pengkarangan iato. Apa iake melambi’oi tontongpa nabaa tau iato mai tu pamengan langngo’ penaa.

⁴Sia iatu mintu’ to manarang, tu ungkarang mintu’ pengkarangan diona inan maindan iato, pantan sae lu dio mai to’ pengkaranganna,

⁵anna ma’kada lako Musa nakua: La’bi maro’ nabaa tu tau iato mai na iatu la dipakena lako pengkarangan tu Napepasanan PUANG ungkarangi.

⁶Mesuami Musa metamba-tamba lan lu to’ tenda, nakua: La muane la baine damo namasara’ la umbaa pa’duruk lako inan maindan. Susimoto nanii unta’tanni tu to buda umbaapi.

⁷Belanna ganna’mo tu mintu’ pareanan lako kalena, kumua anna karangi tu mintu’ pengkarangan iato, ondongpi la’bimo.

⁸Nagaragaimi to manarang dio mai mintu’ pande tu kema umpake kulambu sangpulo lamba’na, dio mai bannang lenang melo dikaridi’ sia bannang ma’rupa lango-lango sia lango-lango makaseda sia karamisi; natannun melo tongan sia napopa’karubion lan.

⁹Iatu landona kulambu iato ke misa’oi duangpulo ngkarua siku na iatu sangka’na patang siku sia la sangsukaranri tu mintu’ kulambu iato.

¹⁰Iatu limang lamba’ kulambu napasikande-kande nasang na iato limang lamba’na napasikande-kande duka.

¹¹Nagaragan dukapa ba’tu pira-pira kale’ke’ lango-lango dio biringna tu kulambu misa’ dio tampak kulambu tu dipasikandenamo, susi dukato nagaragan dio biring kulambu dio tampakna misa’nao tu dipasikandenamo.

¹²Limangpulo kale’ke’ nagaraga dio to’ biring kulambu sanglamba’ na limangpulo kale’ke’ dio biring kulambu misa’nao tu dipasikandenamo; mintu’ tu kale’ke’ iato sipatu nasang.

¹³Nagaragampa limangpulo pekadang bulaan, anna pekadang iato napasikandeanni tu kulambu, naurunganni mendadi misa’ tu kema iato.

¹⁴Sia nagaragaipa tu kulambu tenda bulu bembe’ la dipotenda dio salianna tu kema iato; iatu kulambu tenda iato nagaraga sangpulo misa lamba’na.

¹⁵Iake sanglamba’i tu kulambu tenda la tallungpulo siku tu landona na patang siku tu babana; la sangsukaranri tu kulambu tenda sangpulo misa lamba’na.

¹⁶Iatu limang lamba’ kulambu tenda napasipatu napamisa’, susi dukato tu annannapa lamba’na napamisa’.

¹⁷Nagaragaimo tu limangpulo kale’ke’ dio biringna to kulambu sanglamba’, tu kulambu dio iringna tu dipasikandenamo, sia limangpulo kale’ke’ dio kulambu, misa’nao tu dipasikandemo.

¹⁸Nagaragammo limangpulo pekadang tambaga, anna pasikandei tu tenda iato mendadi misa’.

¹⁹Sia nagaragan dukamo misa’ pesambo kuli’ domba laki pa’damorro’ mararang nasamboanni tu tenda iato, na daona lu tu pesambo iato misa’ pole’pa pesambo kuli’ taka’.

²⁰Nagaragammo papan kayu simmin, dipabendananni tu kema iato;

²¹iatu landona papan iato sangpulo siku ke misa’oi sia iatu babana sangsiku sangtangnga ke misa’oi.

²²Dio misa’ papan den da’dua petangki’na, tu dipasitoe-toe; napasusi nasang to tu mintu’ papan kema iato.

²³Napasusite tu mintu’ papan kema iato: duangpulo papan tu rampe sau’na.

²⁴Nagaragaimo tu patangpulo lette’ salaka, diongna lu to duangpulo papan; da’dua lette’ diong misa’ papan, dinii umpellasukanni tu da’dua petangki’ sia da’dua pole’o diong misa’ papan dinii umpellasukanni tu da’dua petangki’.

²⁵Nasusi dukato nagaragan duangpulo papan tu sa’de senga’na kema, iamotu rampe rekkena,

²⁶sia nagaragan lette’ salaka patangpulo tu papan iato: da’dua lette’ diong misa’ papan na da’dua pole’o diong misa’ papan.

²⁷Apa iatu boko’ kema tu rampe matampu’ nagaragan annan papan.

²⁸Sia nagaragammo da’dua papan la untutu’i tu da’dua lette’ kema tu diona boko’.

²⁹Pada bang tu papan iato da’dua tu diongna lu sia daona lu sae langngan komba bunga’na. Napasusimoto tu papan da’dua, anna padadii tu da’dua tetuk.

³⁰Iamoto na iatu mintu’ papan la karua sola lette’ salakana: sangpulo annan tu lette’na; da’dua diong ke misa’oi papan.

³¹Sia nagaragammo ba’tu pira-pira pesa’pi’ kayu simmin: limang batang lako mintu’ tu papan dio sangsesena kema,

³²nalimang batang lako mintu’ papan dio sangsesena pole’o, sia limapa lako tu mintu’ papan dio boko’ kema rampe matampu’na.

³³Nagaragaimo tu pesa’pi’ lan tangngana lan tangnga papan la untarru’i tu mintu’ papan iato randuk dio mai tampakna sae lako tampak sangbalinna.

³⁴Sia nakallasa’mo bulaan tu mintu’ papan sia bulaan nagaraga, tu mintu’ komba dinii unnulu pesa’pi’, sia nakallasa’ bulaan tu mintu’ pesa’pi’.

³⁵Nagaragammo tu kulambu bannang lango-lango makaseda sia karamisi sia bannang lenang melo dikaridi’; iatu sampin iato natannun melo tongan sia napopa’karubion lan.

³⁶Sia nagarammo a’pa’ lentong kayu simmin sia nakallasa’ bulaan; sia iatu pekadangna bulaan digaraga, sia napati’noran lentek salaka a’pa’.

³⁷Nagaragammo ba’ba tenda tu misa’ kulambu bannang lango-lango sia lango-lango makaseda sia karamisi sia bannang lenang melo dikaridi’: misa’ pa’tannun paruki’.

³⁸Sia nagaragammo lima lentong kayu simmin sola pekadangna; sia nakallasa’ bulaan tu tampak daona lu sia tokeranna, sia iatu lentekna lima tambaga digaraga.