Read Toraja-Sa'dan KATASSURAN 37 Bible Online

KATASSURAN 37 - Toraja-Sa'dan bible

KATASSURAN 37

¹Nagaragaimi Bezaleel tu patti dio mai kayu simmin, duang siku ssangtangnga landona sia babana sangsiku ssangtangnga sia langka’na sangsiku ssangtangnga.

²Nakallasa’ bulaan massang tongan tu lanna lu sia salianna sia nagaragan sa’pi’ bulaan tiku lao.

³Sia napati’noran komba bulaan a’pa’, napale’ke’i lako a’pa’ lette’na, da’dua dio sangsesena na da’dua pole’o dio sangsesena.

⁴Sia kayu simmin nagaraganni tu pebullena, anna kallasa’i bulaan.

⁵Naulumi tu pebulle tama komba iato dio sa’dena patomali, anna ma’din dibulle tu patti iato.

⁶Nagaragaimi tu tutu’ pebase kasalan dio mai bulaan massang tongan, duang siku ssangtangnga landona sia babana sangsiku ssangtangnga.

⁷Nagaragaimi tu da’dua karubion bulaan, iamotu bulaan pa’kombong nagaragai, dao tampakna patomali tu tutu’ pebase kasalan,

⁸misa’ karubion dao tampak sangsesena na misa’ pole’o dao tampak sangsesena. Iatu tutu’ pebase kasalan sola tu karubion dao tampakna patomali napasikande natampa.

⁹Iatu karubion iato umballa’ patomali pani’na langngan, anna samboi pani’na tu tutu’ pebase kasalan sia sitingoan tu lindona; namentiro rokko tutu’ pebase kasalan.

¹⁰Nagaragaimi tu meda kayu simmin, duang siku landona, babana sangsiku na langka’na sangsiku ssangtangnga.

¹¹Nasapu’i bulaan massang anna garaganni sa’pi’ bulaan tiku lao.

¹²Nagaragai pesa’pi’ tiku lao sangpala’ lua’na, sia nasa’pi’ bulaan tiku lao tu pesa’pi’ iato.

¹³Sia napati’noran komba bulaan a’pa’, napale’ke’i tu komba iato lako a’pa’ lentekna dio tu tetukna a’pa’.

¹⁴Sikandappi’ pesa’pi’ iato tu naninna komba, tu diului pebulle tama la dibulleanni tu meda iato.

¹⁵Iatu pebulle iato kayu simmin nagaraga, anna sapu’i bulaan, la dibulleanni tu meda iato.

¹⁶Sia nagaraga tu mintu’ pareanan la dipadao meda iato, iamotu piringna sia pindanna sia balubunna sia sere’na tu dipa’bolloan; iatu apa iato bulaan massang nagaraga.

¹⁷Nagaragammi tu tongkonan palita dio mai bulaan massang; iatu tongkonan palita bulaan pa’kombong nagaraga, susi dukato tu tongkonanna sia batangna; iatu bunga tiballa’na sia kalopakna sia bunganna napasikande natampa.

¹⁸Annan tangkena sun dio sa’dena patomali: tallu tu tangkena tongkonan palita sun dio sa’dena sangbali na iatu tallu sun dio sa’de sangbalinna.

¹⁹Iatu tallu bunga tiballa’ susi bunga badam rupanna dio sangtangke sola kalopakna sia bunganna sia tallu bunga tiballa’ susi bunga badam dio sangtangkenao sola pusona sia bunganna; susimoto tu annan tangke sun lan mai batang tongkonan palita iato.

²⁰Nadio batangna tongkonan palita den a’pa’ bunga tiballa’ susi bunga badam rupanna sola kalopakna sia bunganna.

²¹Sia misa’pa kalopak diongna lu tangke tu sun patomali lan mai; iatu misa’ kalopak diongna lu tangke tangngana tu sun patomali lan mai na iatu misa’ pole’o kalopak diongna lu tangke sun patomali lan mai; susimoto tu annan tangkena sun lan mai batang tongkonan palita iato.

²²Mintu’ kalopakna sia mintu’ tangkena sun dio mai batangna; mintu’na dipasikande ditampa dio mai bulaan pa’kombong massang.

²³Nagaragammo pitu palita sia pesipi’na sia inan dinii umpa’dei dio mai bulaan massang.

²⁴Iatu tongkonan palita sola mintu’ pareanna sangtalenta[6] bulaan massang digaragai.

²⁵Iatu inan pemalaran pantunuan dupa kayu simmin nagaragai; sangsiku tu lambe’na na sangsiku tu sangka’na, massulapa’ a’pa’, sia iatu langka’na duang siku; iatu tandukna sikande dio.

²⁶Nasapu’ bulaan massang, la papan daona lu, la rindingna tiku lao sia iatu mintu’ tandukna, sia nagaragai sa’pi’ bulaan tiku lao.

²⁷Nagaragammi komba bulaan diongna lu sa’pi’ siduanan dio sa’dena patomali, dinii unnulu pebulle, anna bullei tau.

²⁸Iatu pebulle kayu simmin nagaraga, anna kallasa’i bulaan.

²⁹Sia nagaragapa tu minna’ maindan la dipa’minnakan sia dipa’tokkoan sia dupa massang busarungngu’, susi panggaraga to pande ma’bangki’.