Read Toraja-Sa'dan KATASSURAN 38 Bible Online

KATASSURAN 38 - Toraja-Sa'dan bible

KATASSURAN 38

¹Iatu inan pemalaran pantunuan, kayu simmin nagaragai limang siku tu lambe’na, na limang siku duka tu sangka’na, massulapa’ a’pa’, na tallung siku tu langka’na.

²Nagaragaimi tu tandukna dio to a’pa’ lentekna sia iatu tandukna dipasikande ditampa nakallasa’i tambaga.

³Nagaragaimi tu mintu’ pareanan inan pemalaran iato, iamotu mai kurinna sia pesanglena sia pindan pa’pi’pikanna sia petossokna sia peruayanna: iatu mintu’ pareanan iato tambaga nagaragai.

⁴Nagaragampa sala’bi’ susi dalla’ sae lako tangana diongna lu biringna.

⁵Napati’noranni komba a’pa’ tu a’pa’ tetuk sala’bi’, dinii unnulu pebulle.

⁶Iatu pebulle kayu simmin nagaragai anna kallasa’i tambaga.

⁷Naulumi tu pebulle tama to komba dio sa’dena inan pemalaran patomali, dinii umbullei; inan pemalaran iato lo’bang, papan nagaragai.

⁸Iatu pembasean tambaga nagaragai, na iatu lentekna tambaga duka, samminna baine untoe toean dio ba’ba tenda kasitammuan, tu digaragai.

⁹Nagaragaimi tu tarampakna; iatu rampe sau’na digaragan tenda lenang melo dikaridi’ saratu’ siku lambe’na;

¹⁰iatu lentongna duangpulo dilette’i tambaga duangpulo, na iatu mintu’ pekadangna lentong iato sia mintu’ tokeranna salaka digaraga.

¹¹Rampe rekkena digaragan tenda saratu’ siku lambe’na; iatu lentongna duangpulo dilette’i tambaga duangpulo, na iatu mintu’ pekadangna lentong iato sia tokeranna salaka digaraga.

¹²Iatu rampe matampu’na digaragan tenda limangpulo siku lambe’na; iatu lentongna sangpulo dilette’i tambaga sangpulo, na iatu mintu’ pekadangna lentong iato sia mintu’ tokeranna salaka digaraga.

¹³Iatu rampe matallona digaragan duka tenda limangpulo siku lambe’na.

¹⁴Iatu sangsesena digaragan tenda sangpulo lima siku lambe’na situang lentongna tallu sia tallu lette’na.

¹⁵Iatu sangsesena — patomalinna ba’ba tarampak iato nanii tenda — digaragan tenda sangpulo lima siku lambe’na, situang lentong tallu sia tallu lette’na.

¹⁶Iatu mintu’ tenda untikui tarampak iato bannang lenang melo dikaridi’, digaragai.

¹⁷Mintu’ tu lette’ lentong iato tambaga digaraga, na iatu pekadangna na tokeranna salaka sia iatu kallasa’ sarongna salaka duka. Mintu’ lentong tarampak iato dipasikande ba’tu pira-pira tokeran salaka.

¹⁸Iatu kulambu ba’ba tarampak pa’tannun paruki’, bannang lango-lango sia lango-lango makaseda sia karamisi sia bannang lenang melo dikaridi’ tu digaragai; duangpulo siku lambe’na, na iatu langka’na pada bangsia sangka’na tu pa’tannun limang siku, sipatu tu mintu’ tendana tarampak iato.

¹⁹Iatu lentong a’pa’ sola tu lette’na a’pa’ tambaga digaragai; na iatu pekadangna sia sarongna daona lu sia tokeranna salaka.

²⁰Iatu petangki’ kema sia petangki’ tarampak tiku lao tambaga digaragai.

²¹Iamote tu bilanganna tu mintu’ pareanan kema, iamotu kema kasa’bian tu napa’peiaran Musa lako to Lewi, napangului Itamar, anakna Harun, to minaa.

²²Nagaragaimi Bezaleel, anakna Uri tu nadadian Hur, dio mai suku Yehuda tu mintu’ pareanan Napepasanan PUANG lako Musa.

²³Iatu nasangayokan iamotu Aholiab anakna Ahisamakh dio mai suku Dan, to pande sia pande paliu sia manarang ma’tannun paruki’ dio mai bannang lango-lango sia lango-lango makaseda sia karamisi sia lenang melo.

²⁴Mintu’na bulaan dipake dio tu pengkarangan ditoe unggaragai inan maindan, iamotu mintu’ bulaan pemala’ pangurrande disorong anna ditarima sule, timbanganna duangpulo ngkasera talenta[7] pituratu’ ntallungpulo sikele’[8] pada timbanganna sikele’ masero.

²⁵Iatu salakana mintu’ to diia’ lan kasirampunan iato, timbanganna saratu’ talenta sangsa’bu pituratu’ pitungpulo llima sikele’ pada timbanganna sikele’ masero.

²⁶Misa’ tau misa’ beka, iamo sangtangnga sikele’, pada timbanganna sikele’ maindan, dio mai mintu’ to naala bilangan, tu siduangpulomo taun dadinna ba’tu la’bi; mintu’nato den annan ratu’ ntallu sa’bunna limaratu’ llimangpulo.

²⁷Saratu’ talenta salaka dipati’noranni tu mintu’ lentek inan maindan sia iatu kulambu; saratu’ lentekna saratu’ talenta dipake, simisa’ lentek namisa’o talenta.

²⁸Iatu sangsa’bu pituratu’ pitungpulo llima sikele’ nagaraga pekadang lentong, nakallasa’ salaka tu sarongna sia nagaragan tokeran.

²⁹Iatu mintu’ tambaga pemala’ pangurrande disorong anna ditarima sule, timbanganna pitungpulo talenta duangsa’bu nna’pa’ratu’ sikele’.

³⁰Iamoto tu digaragai mintu’ lentek ba’ba tenda kasitammuan, sia inan pemalaran tambaga sia sala’bi’ tambaga tu untikui sia mintu’ pareanan inan pemalaran.

³¹Sia mintu’ lentek tenda tarampak tu untikui sia mintu’ lentek ba’ba tarampak, sia iatu mai petangki’ kema sia mintu’ petangki’ tenda tarampak untikui.