Read Toraja-Sa'dan KATASSURAN 4 Bible Online

KATASSURAN 4 - Toraja-Sa'dan bible

KATASSURAN 4

¹Mebalimi tu Musa, nakua: Apa umbai tae’ na la umpatonganna’ tau iato mai sia tae’ na la umperangii tu kadangku, sangadi la nakua: Iatu PUANG tae’ namempaan lako kalemu.

²Ma’kadami tu PUANG lako, Nakua: Apara te lan limammu? Mebalimi nakua: Tekken.

³Nakuami Puang: Pembuanganni rokko padang. Napembuangammi rokko padang, anna dadi ula’. Mallaimi tu Musa dio mai to’ ula’ iato.

⁴Nakuami tu PUANG lako Musa: Pakorongi tu limammu, mutoei tu ikko’na-napopengkorongmi tu limanna, nadammakki, namendadi tekken sule lan limanna —

⁵anna patonganni tu tau iato mai kumua paanmo lako kalemu tu PUANG, Kapenombanna nene’ to dolona, iamotu Kapenombanna Abraham, sia Kapenombanna Ishak, sia Kapenombanna Yakub.

⁶Ma’kada pole’mi tu PUANG lako kalena, Nakua: Ulumi tu limammu tama ara’ bayummu. Naulumi tu limanna tama ara’ bayunna, anna patassu’i sule; mangngami: iatu limanna golenan mabusa susi ambun makko.

⁷Nakuami Puang: Pasulei tu limammu tama ara’ bayummu. Napasulemi tu limanna tama ara’ bayunna; iatonna patassu’i, mangngami: iatu limanna susi pole’mo kale senga’na.

⁸Ma’kadami tu Puang Nakua: Iake tae’ napatonganko tau iato mai sia tae’ nasangai tu tanda bunga’na, manassa la napatongan tu tanda undinna.

⁹Iake tae’ dukapi napatonganni tau iato mai te tanda iate da’dua, sia tae’ naperangii tu kadammu, la muala tu uai diong mai salu Nil, ammu bolloanni rokko padang, na iatu uai muala diong mai salu Nil, la membali rara dao padang.

¹⁰Ma’kadami tu Musa lako PUANG, nakua: Messimanna’ Puang, iate aku te tangiana’ to rangga lila, la tonnanu’ la totemo, moi ia duka tomMi randuk ma’kada lako taumMi, sangadinna iate aku te to magasa pudukna’ sia tang malute ma’kada.

¹¹Ma’kadami tu PUANG Nakua: Mindara umbenni puduk tu to lino, ba’tu mindara umpamamang tau, ba’tu umpataru tau, ba’tu umpopakita tau, ba’tu umpabuta tau? Tae’raka na Aku te, tu PUANG?

¹²Totemo malemoko, Aku la umpamaluteko ma’kada sia la unnada’iko tu apa sipatu la mupokada.

¹³Ma’kadami tu Musa nakua: Messimanna’ Puang, melo ke iamo Misua minda-minda tu sipatu la Misua.

¹⁴Re’dekmi tu ara’Na PUANG lako Musa, Nakua: Tangiaraka kakammu tu Harun, to Lewi? Kuissan tu kamaluteanna ma’kada; manassa tassu’mo umpessitammuiko. Iake natiromoko, manassa la parannu penaanna.

¹⁵La sipa’kadako, ammu pokadanni te kada iate, Aku la umpamaluteko ma’kada sia umpamalutei sia Aku la umpatudukomi tu apa sipatu la mipogau’.

¹⁶Iamo la ussondako ma’kada-kada lako tu tau buda sia iamo dadi sumbung pudukmu sia ikomo la butung Puang Matua lako kalena.

¹⁷Toemi te tekken iate, tu la mupake umpaden mintu’ tanda.

¹⁸Sulemi tu Musa lako Yitro matusanna, nama’kada lako nakua. Eloranna’ kusule sitammu mintu’ siulu’ku dio Mesir, angku issanni ba’tu la tuo siapi. Mebalimi Yitro lako Musa, nakua: Pela’moko lalan!

¹⁹Ma’kadami PUANG lako Musa tonna diopa Midian. Nakua: Sulemoko lako Mesir, belanna iatu mintu’ tau la umpateiko, matemo.

²⁰Naalami Musa tu bainena sia anakna sola duai, napopa’keledai sule lako tondok Mesir, sia naala Musa tu tekkenNa Puang Matua natoei.

²¹Ma’kadami tu Puang lako Musa, nakua: Totemo la sulemoko lako Mesir, apa kilalai kumua la mupogau’ dio olona Firaun tu mai tanda kalle-kallean tu Kupakuasangko, apa la Kupamakarra’ penaanna, naurunganni tang untangga’i male tu to buda.

²²Attu iato la ma’kadako lako Firaun, kumua: Susite tu kadanNa PUANG: Iatu Israel anakKu muane, iamo anak pa’bunga’Ku.

²³Iamoto Kukua lako kalemu: Eloranni tu anakku male anna penombaiNa’; iake tae’i mueloranni male, manassa la Kupatei tu pia muane pa’bunga’mu.

²⁴Iatonna dio lu lalan lan misa’ banua pa’bongian tu Musa saemi tu PUANG la umpatei.

²⁵Naalami Zipora tu piso batu na seppa’i tu kuli’ tappa’ kasirisanna anakna, anna pasussuanni lette’na muanena, nama’kada nakua: Ikomo misa’ to diparampo rara lako kaleku.

²⁶Tae’mo Napatumbai Puang tu Musa. Attu iato ma’kadami, nakua: Ikomo misa’ to diparampo rara, belanna sunna’.

²⁷Ma’kadami PUANG lako Harun, Nakua: Maleko sitammu Musa lako padang pangallaran. Malemi naappa’i dio taneteNa Puang Matua, anna udungi.

²⁸Napokadami Musa lako Harun tu mintu’ kada Nasuanni PUANG, sia iatu tanda kalle-kallean, tu Nasuanni Puang la napogau’.

²⁹Malemi tu Musa sola Harun anna rampunni tu mintu’ ambe’-ambe’ to Israel.

³⁰Naparampomi Harun lako tau iato mai tu mintu’ kadanNa PUANG lako Musa sia napogau’ tu tanda kalle-kallean iato dio tingayona to buda.

³¹Napatonganmi to buda tu kadanna Musa sia iatonna rangimi, kumua Nakilalaimo PUANG sia Natiromo tu kamaparrisanna, tukkumi menomba.