Read Toraja-Sa'dan KATASSURAN 40 Bible Online

KATASSURAN 40 - Toraja-Sa'dan bible

KATASSURAN 40

¹Ma’kadami tu PUANG lako Musa Nakua:

²Iake allo bunga’na lan bulan tipamulanna la mupabendanmo to tu kema, iamotu tenda kasitammuan.

³La mupatama tu patti kasa’bian, parerungi kulambu.

⁴Sia iatu meda la mubaa tama sia pasirundunanni dao tu apa sipato’ mupalenna’, sia baa dukai tama tu tongkonan palita, ammu padaoi tu mintu’ palitanna.

⁵Iatu inan pemalaran bulaan dinii untunu dupa la mupadio tingayo patti kasa’bian. Ammu toke’i tu kulambu ba’ba kema.

⁶Iatu inan pemalaran pantunuan la mupadio tingayo ba’ba kema, iamotu tenda kasitammuan.

⁷Iatu pembasean la mupadio alla’na tenda kasitammuan na inan pemalaran, ammu issii uai.

⁸Undinnato la mupabendan tu tenda tarampak tiku lao, ammu toke’i tu kulambu dio ba’ba tarampak iato.

⁹Mumane unnalai tu minna’ dipa’minnakan sia dipa’tokkoan, ammu minnakki tu kema sia mintu’ barang apa lan sia pamaindanni sola tu mai pareananna, anna maindan.

¹⁰Sia la muminnakki tu inan pemalaran sia pantunuan sola tu mai pareananna, sia la mupamaindan tu inan pemalaran iato anna tarru’ maindan.

¹¹La muminnakki tu pembasean sola lette’na sia pamaindanni.

¹²Mangkato musuai tu Harun sola tu mai anakna mentireke’ lako ba’ba tenda kasitammuan, ammu dio’i.

¹³Ammu papakei pakean maindan tu Harun sia mubolloi minna’ busarungngu’, ammu pamarimbanganni, la ungkarangi tu toean to minaa lako Kaleku.

¹⁴Sia suai tu anakna anna sae mentireke’, ammu papakei tu pakean lanna lu.

¹⁵La mubolloi minna’ busarungngu’ tu tau iato susitu ambe’na mangkamo mubolloi, anna karangi tu toean to minaa lako Kaleku; la dadimo tu iannato, kumua iatu kadibolloianna minna’ la dadimo lako kalena tu katominaan tu tontong nasiosso’i.

¹⁶Napogau’mi Musa tu mintu’na te; susitu Napepasanan PUANG, susimo napogau’ to.

¹⁷Iatonna bulan tipamulanna, taun ma’penduan tonna allo bunga’na, napabendanmi tau tu kema iato.

¹⁸Napabendanmi Musa tu kema, napadioi inanna tu lentekna, napale’ke’mi tu mintu’ papanna, sia napale’ke’ tu pesa’pi’na sia napabendan tu lentongna.

¹⁹Naballa’mi tu kulambu daona lu kema anna samboi tenda kema daona lu, susitu Napepasanan PUANG lako Musa.

²⁰Naalami tu kasa’bian, napalanni patti, napalakoi pebulle tu patti iato, nasamboi tutu’ pebase kasalan tu patti iato.

²¹Nabaami tama kema tu patti iato, anna toke’i tu kulambu dipa’rerungan, narerungi tu patti kasa’bian, susitu Napepasanan PUANG lako Musa.

²²Iatu meda napatama tenda kasitammuan, napadio rampe daanna lu kema, naboko’ kulambu.

²³Napalenna’mi tu roti dao, napasirundunan melo dio oloNa PUANG, susitu Napepasanan PUANG lako Musa.

²⁴Iatu tongkonan palita napatama tenda kasitammuan napasitingoanni meda, rampe sau’na kema.

²⁵Napadao nasangi tu palita iato dio oloNa PUANG, susitu Napepasanan PUANG lako Musa.

²⁶Iatu inan pemalaran bulaan napatama tenda kasitammuan napadioi tingayo kulambu.

²⁷Natunumi tu dupa dao, susitu Napepasanan PUANG lako Musa.

²⁸Natoke’mi tu kulambu ba’ba kema.

²⁹Iatu inan pemalaran pantunuan napadio sikandappi’ ba’ba kema, iamotu tenda kasitammuan, anna pennoloanni tu pemala’ ditunu pu’pu dao sia kande dipemalaran, susitu Napepasanan PUANG lako Musa.

³⁰Iatu pembasean napadio alla’na tenda kasitammuan na inan pemalaran, anna issii uai la dipembase.

³¹Iatu uai lan nabasean limanna sia lentekna Musa sola Harun sia iatu mai anakna muane.

³²Iake tamami tenda kasitammuan sia iake urreke’i tu inan pemalaran, nabasei tu kalena susitu Napepasanan PUANG lako Musa.

³³Napabendanmi tu tenda tarampak untikui kema iato sia napabendan duka tu inan pemalaran, anna toke’i tu kulambu dio ba’ba tarampak. Susimoto tu Musa umpalanda’i tu pengkarangan iato.

³⁴Nasamboimi gaun tu tenda kasitammuan na iatu kamala’biranNa PUANG parrang ussitutu’i tu kema iato,

³⁵naurungan iatu Musa tang nakulle tama tenda kasitammuan, belanna naniimo gaun sia nasitutu’imo kamala’biranNa PUANG tu kema iato.

³⁶Iake sulemi langngan tu gaun diong mai kema iato, ke’de’omi tu to Israel dio lu kalingkanna.

³⁷Apa iake tae’pi nasule langngan tu gaun, tae’ duka nake’de’ dio mai tu tau iato mai sae lako sulena pole’ langngan tu gaun.

³⁸Belanna iatu gaunNa PUANG ussamboi kema, ke allona, sia nanii api ke bonginna dio pentirona mintu’ to Israel lan mintu’ kalingkanna.