Read Toraja-Sa'dan KATASSURAN 5 Bible Online

KATASSURAN 5 - Toraja-Sa'dan bible

KATASSURAN 5

¹Mangkato malemi tu Musa sola Harun mennolo lako Firaun, anna ma’kada nakua: Susite tu kadanNa PUANG, Kapenombanna to Israel: Eloranni tu mintu’ taungKu male, anna memala’ lako Kaleku lan padang pangallaran.

²Apa mebali tu Firaun nakua: Mindara tu PUANG, tu sipatu la kuturu’ kadanNa sia unneloranni tu to Israel male? Tae’ kutandai tu PUANG iato sia tang kueloran tu to Israel male.

³Nakuami Musa sola Harun: Sitiromokan tu Kapenombanna to Ibrani, iamoto elorammokan sola nasang male lan kalingkan tallung allo mambelanna tama padang pangallaran la memala’ lako PUANG, Kapenombangki, da anNa sae umparampoikanni ropu ba’tu kandean pa’dang.

⁴Ma’kadami tu datu Mesir lako nakua: E Musa sola Harun, ma’apai ammi patadangi tu to buda lan diamanna. Malekomi lako pa’diamammi!

⁵Sia nakuapa Firaun: Iatu to kamban buda kadakemo lan tondok iate, ammi la umpatadangopi dio mai pa’diamanna!

⁶Iamoto nama’kada tu Firaun allo iato lako mintu’ kapala bandoro’ sia bandoro’ tu untiro to buda, nakua:

⁷Damo mibenni dalame dita’tak-ta’tak tu tau la napantunui batu susi sangmai’ sia duangbongi’, sangadinna ia kalena la male undaka’i,

⁸sia patage’i batu tu tau iato pada budanna tu nagaragai sangmai’ sia duangbongi’, da mipasosso’i, belanna napopaningo-ningoan bangri lumingka, iamoto nama’kada nakua: Elorangkanni male angki memala’ lako Kapenombangki.

⁹La dipabokkokki tongan pa’diaman, anna karangi, da natolo’ talinga kada tang tongan.

¹⁰Tassu’ nasangmi tu mintu’ bandoro’ lompo sia bandoro’ untiro to buda, anna ma’kada lako to buda nakua: Susite tu kadanna Firaun: Tae’mo mila diben dalame dita’tak-ta’tak.

¹¹Male kalenakomi unnalai tu dalame umba-umba tu minii unnappa’i apa iatu diamammi tae’ra la dipasosso’.

¹²Sisarak-sarakmi tu to buda lan lu mintu’ tondok Mesir la urrampun dalame la dita’tak-ta’tak.

¹³Naula’mi mintu’ bandoro’ lompo tu tau iatu mai anna kuanni: Mangkai tu pa’diamammi, iamotu borongammi susi biasanna tonna denpa dalame dita’tak-ta’tak.

¹⁴Mintu’ tu bandoro’na to Israel, tu napapatui borongan bandoro’ lompona Firaun, nalonga’ bandoro’ lompona Firaun, anna ma’kada nakua: Ma’apai natae’ mimangkai tu panglallang batu borongammi, la allo iate la iongi’, susito lendu’na?

¹⁵Iamoto namale tu mintu’ bandoro’na to Israel mennolo lako Firaun, anna ma’kada nakua: Ma’apari anna ma’pasusito tu puangki lako kaunanna?

¹⁶Tae’ nabenni dalame dita’tak-ta’tak tu kaunanmi, anna ma’kada nakua: Garagai tu batu. Kami tu nalonga’, apa taunna ia puang tu sala!

¹⁷Ma’kadami Firaun, nakua: Mipopaningo-ningoan bang lumingka, ondongpi mipopaningo-ningoan bangri, ammi ma’kada: Elorangkanni male, angki memala’ lako PUANG.

¹⁸Iamoto malemokomi totemo ma’diama; tae’ mila diben dalame dita’tak-ta’tak, apa inang la ganna’ bilanganna tu batu mipatama.

¹⁹Attu iato naissanmi mintu’ bandoro’na to Israel, kumua kadakemo tu apa urrampoi, belanna dipokadammo, kumua: Tae’ mima’din umpasosso’i tu batu, iamotu borongammi kiallo-kiallo.

²⁰Iatonna tassu’mo dio mai olona Firaun tu tau iato mai, sitammumi Musa sola Harun, tu bendan ungkampai.

²¹Ma’kadami tu tau iato lako: Kenna tiroorokomi PUANG sia Napaolaikomi salu, belanna mipakadake lelemokan lako Firaun sia lako mintu’ pareanna natumang kadammi, butung-butung to mipatangkei pa’dang la umpateikanni.

²²Sulemi tu Musa mennolo lako PUANG, nakua: O Puang, ma’apari amMi parampoi kakadakean te bangsa iate? Ma’apa dukari amMi suana’?

²³Belanna randuk to attu kunii umpennoloi Firaun la umparampoanni tu kadamMi, ta’pa napogau’ tu kakadakean lako bangsa iate, anna tae’ra Mirampananni tu taumMi.

²⁴Ma’kadami PUANG lako Musa, Nakua: Totemo ma’din mutiro tu apa la Kugauran Firaun; belanna tete dio lima makuasa, anna rampananni male tu tau iato mai, ondongpi tete dio lima makuasa na la urrambai tu tau iato mai tassu’ lan mai tondokna.