Read Toraja-Sa'dan KATASSURAN 7 Bible Online

KATASSURAN 7 - Toraja-Sa'dan bible

KATASSURAN 7

¹Ma’kadami PUANG lako Musa, Nakua: Kupabutungko Puang Matua lako Firaun; na Harun kakammu la butung nabimmu.

²Ikomo la umpokadai tu mintu’ Kupasanangko na Harun kakammu la ma’kada lako Firaun, kumua anna eloranni tu to Israel tassu’ lan mai tondokna.

³Apa Aku la umpabattuk penaanna Firaun sia Aku la umpabudai tu tanda mangnga sia tanda kalle-kalleangKu lan tondok Mesir.

⁴Apa tae’ na la unturu’i Firaun tu kadammi sola dua. Iamoto angku la umpata’pai lima tu Mesir sia ussolanni tu surodadungKu, iamotu mintu’ taungKu Israel lan mai tondok Mesir tete dio ukungan kapua.

⁵Anna issanni to Mesir kumua Akumo tu PUANG, ke unnangka’mo’ limangKu lan tondok Mesir sia ussolanni tassu’ tu to Israel lan mai tau iato mai.

⁶Napogau’mi Musa sola Harun susito; susitu Napokadanni PUANG, susi dukamo napogau’ to.

⁷Iatonna ma’kada sola duai lako Firaun, karuamo pulona taunna tu Musa, na Harun karuapulona ntallu taunna.

⁸Ma’kadami tu PUANG lako Musa sola Harun, Nakua:

⁹Ianna ma’kada tu Firaun lako kalemi, nakua: Patiroanna’ tu tanda mangnga, la ma’kadako lako Harun: Alai tu tekkenmu; pempa’nakanni rokko padang dio olona Firaun, anna dadi ula’.

¹⁰Malemi tu Musa sola Harun mennolo lako Firaun, anna pogau’i sola duai susitu pepasanNa PUANG lako kalena; napempa’nakanni Harun tu tekkenna dio olona Firaun sia mintu’ to mase’ponna, anna dadi ula’.

¹¹Natambaimi Firaun tu mintu’ to paissan sia mintu’ balik mata, na mintu’ tu to Mesir den issan-issanna umpogau’ dukai susito tete dio basa-basana.

¹²Pada napempa’nakammi tu tekkenna, anna dadi ula’, apa naamma’ nasang tekkenna Harun tu mintu’ tekkenna tau iato mai.

¹³Makarra’mi penaanna tu Firaun, anna tae’ naperangii tu kadanna sola duai, susitu Napokada PUANG.

¹⁴Nakuami PUANG lako Musa: Tang nakalo’mo penaanna Firaun la urrampananni tu bangsa iate male.

¹⁵Ianna melambi’ malemoko mennolo lako Firaun; inang biasa male rokko salu; la bendanko umpeagi dio biring salu Nil ammu tangkei tu tekken denmo namembali ula’.

¹⁶Sia pokadanni lako, kumua: Iatu PUANG, Kapenombanna to Ibrani ussuana’ umparampoi lako kalemi te kada iate: Rampananni tu taungKu male la umpenombaiNa’ dio padang pangallaran, apa tonganna sae lako totemo tae’ mituru’i tu kadangku.

¹⁷Iamoto nakua kadanNa PUANG: Diona te apa iate la munii unnissanni, kumua Akumo tu PUANG: tiromi iate tekken kutoe, la kusambakan uai diong salu Nil, anna membali rara.

¹⁸Sia mintu’ bale, tu lan salu Nil la mate, naurunganni bubosi tu salu Nil, natang tiamma’ nairu’ to Mesir.

¹⁹Sia Nakuapa PUANG lako Musa: Pokadanni Harun: Alai tu tekkenmu, angka’i tu limammu lako mintu’ uai to Mesir, lako mintu’ salunna sia kalo’na sia limbongna sia lako mintu’ pa’rampunan uainna, kumua anna membali rara; nake nanii nasangi rara tu mintu’ lili’na tondok Mesir, la lan lu busso kayu, la lan lu busso batu.

²⁰Napogau’mi Musa sola Harun susite kadanNa PUANG, naangka’i tu tekkenna nasambakki tu uai diong salu Nil dio olona Firaun sia dia olona mintu’ to mase’ponna; membali rara nasangmi tu mintu’ uai diong salu Nil.

²¹Mate nasangmi tu mintu’ bale diong salu Nil naurunganni bubosi tu uainna sia tang nasaramo nairu’ to Mesir; dadimi rara lan mintu’ tondok Mesir.

²²Apa mintu’ to Mesir unnampui issan-issan umpogau’ dukai susito tete dio basa-basana, naurunganni makarra’ tu penaanna Firaun, sia tae’ naturu’i tu kadanna sola duai, susito Napokadanna PUANG.

²³Memboko’mi tu Firaun sule lako tongkonan layukna sia napasalai duka penaa te apa iate.

²⁴Apa mintu’ to Mesir mambo’bok tiku lao salu Nil undaka’ uai diiru’, belanna iatu uai salu tang disaramo diiru’.

²⁵Susimoto anna ganna’ pitung allo mangkanna Nabamba PUANG tu salu Nil.