Read Toraja-Sa'dan KATASSURAN 8 Bible Online

KATASSURAN 8 - Toraja-Sa'dan bible

KATASSURAN 8

¹Mangkato Nakuami PUANG lako Musa: Maleko mennolo lako Firaun, pokadanni: Inde sia tu kadanNa PUANG, Nakua: Rampananni tu taungKu, namale umpenombaiNa’.

²Iammu manoka unneloranni tu tau iato male, manassa la Kupandasa tu mintu’ lili’na tondokmu, Kuparampoi tokko’.

³Naurungan iatu salu Nil umpasikarangan tokko’ tassu’, anna kendek langngan tongkonan layukmu sia la tama bilik patindoammu, ondongpi la langngan inan mamma’mu, sia tama banuanna mintu’ to mase’ponmu sia mintu’ taummu sia tama dapo’mu sia tama pa’ta’pungammu.

⁴Sia la nakendekkiko tu tokko’ iato sia mintu’ taummu sia mintu’ to mase’ponmu.

⁵Sia Nakuapa PUANG lako Musa: Pokadanni Harun: Angka’i tu limammu mutoei tu tekkenmu lako mintu’ salu sia kalo’ sia limbong, ammu pakendekki tu tokko’ langngan tondok Mesir.

⁶Naangka’mi Harun tu limanna lako mintu’ to’ uai Mesir, anna kendek tu tokko’ ussitutu’i tondok Mesir.

⁷Iatu to paissan-issan umpogau’ dukai susito tete dio pa’basa-basana, napakendekki tokko’ tu tondok Mesir.

⁸Natambaimi Firaun tu Musa sola Harun nama’kada nakua: Palaku tongan-tonganni lako PUANG, anna pasoro’i te mintu’ tokko’ dio mai kaleku sia dio mai mintu’ taungku, angku eloranni tu bangsa iato male la memala’ lako PUANG.

⁹Ma’kadami Musa lako Firaun nakua: Iake nakalo’i penaanna puangku napokadan tonganna’ piranra angku la umpassambayangangkomi sola mintu’ to mase’ponmi sia mintu’ taummi, kumua anna dipisanni tu tokko’ dio mai kalemi sia lan mai mintu’ banuammi, anna diong mannamo salu Nil nanii.

¹⁰Ma’kadami Firaun nakua: Masiang. Nakuami Musa: Melo, susitu kadammi puang; ammi issanni kumua PUANG, Kapenombangki tae’ sangtintinna.

¹¹Mintu’ tu tokko’ la soro’ dio mai kalemi sia dio mai mintu’ banuammi sia dio mai mintu’ to mase’ponmi sia dio mai mintu’ taummi; anna diong mannamo salu Nil nanii.

¹²Soro’mi tu Musa sola Harun dio mai olona Firaun, anna meongli’ tu Musa lako PUANG diona tu mintu’ tokko’ tu Napandasan Firaun.

¹³Napogau’mi PUANG situru’ palakunna Musa, anna mate tu mintu’ tokko’ lan lu banua sia tarampak sia pa’lak.

¹⁴Napopa’tombon-tombonmi tau narampun, naurungan bubosi tu tondok.

¹⁵Iatonna tiromi Firaun kumua radanmo tu kamandasan, magasaomi penaanna, naurungan tang umperangii tu kadanna sola duai, susitu Napokada PUANG.

¹⁶Ma’kadami PUANG lako Musa, Nakua: Pokadanni Harun: Angka’i tu tekkenmu, sambakki tu barra’-barra’, anna membali katamuk lan lu mintu’ tondok Mesir.

¹⁷Napogau’mi sola duai susito; naangka’mi Harun tu lima untoena tekkenna, anna sambakki tu barra’-barra’, anna ta’pa tu katamuk lako to lino sia lako olo’-olo’. Mintu’ tu barra’-barra’ membali katamuk lan mintu’ tondok Mesir.

¹⁸Natobami to paissan-issan umpogau’i susito tete dio pa’basa-basana, la umpabu’tu katamuk, apa tae’ nakullei; ta’pami tu katamuk dio lu mintu’ to lino sio dio lu mintu’ olo’-olo’.

¹⁹Ma’kadami tu mintu’ to paissan-issan lako Firaun, nakua: Iamote tu rakka’Na Puang Matua! Apa makarra’ tu penaanna Firaun naurungan tae’ naturu’i tu kadanna, susitu Napokada PUANG.

²⁰Ma’kadami PUANG lako Musa, Nakua: Masiang mela’bikko millik, ammu male mennolo lako Firaun; biasa male rokko salu; la mupokadan kumua: Susite tu kadanNa PUANG: Eloranni tu taungKu male anna menomba lako Kaleku.

²¹Ianna tae’ murampananni tu taungKu male, manassa la umpasaeNa’ tabuan lako kalemu sia lako mintu’ to mase’ponmu sia mintu’ taummu sia tama mintu’ banuammu, naurunganni ussitutu’i tu banuanna mintu’ to Mesir, susi duka tu padang nanii tu tau iato mai.

²²Apa allo iato la Kupasenga’ tu tondok Gosyen, tu napa’tondokki taungKu, kumua da naden tambolik dio, ammu issanni, kumua Akumo, tu PUANG, ma’dioren lan tondok iate.

²³Sia la Kulendokan tu taungKu lan mai bangsamu. Masiang bangsiamo anna la dadi te tanda iate.

²⁴Napogau’mi PUANG susito; ta’kala saemi tu tabuan lendu’ budanna tama tongkonan layukna Firaun sia banuanna mintu’ to mase’ponna sia ussamboi mintu’ tondok Mesir, naurunganni narua kamandasan tu tondok iato napobua’ tabuan.

²⁵Natambaimi Firaun tu Musa sola Harun, nakua: Malemokomi, ammi memala’ lako Kapenombammi lan tondok iate.

²⁶Apa nakua Musa: Umba la kikua la umpogau’i tu iannato? Ma’dinrakannika umpemalaranni lako PUANG, Kapenombangki tu apa nakagalli to Mesir? Iake la kipemalaranni tu apa nakagalli to Mesir, dio pentirona, tae’raka na la ulladangkanni batu?

²⁷Elorangkanni male tama padang pangallaran lingkan tallung allo, angki memala’ lako PUANG, Kapenombangki, susitu Napokadangkan.

²⁸Ma’kadami Firaun, nakua: La kuelorangkomi male ammi memala’ lako PUANG, Kapenombammi, lan padang pangallaran, podo da mimale mambela bang. La mipassambayangan tongan-tonganna’.

²⁹Nakuami Musa: La malemo’ totemo, angku mengkamoya-moya lako PUANG, nasoro’ masiang tu tabuan dio mai Firaun sola mintu’ to mase’ponna sia mintu’ taunna; podo natorroi Firaun tu ma’pakena, damo natang unneloranni te bangsa iate male memala’ lako PUANG.

³⁰Mangkato tassu’mi tu Musa dio mai olona Firaun, namengkamoya-moya massambayang lako PUANG.

³¹Napogau’mi PUANG susitu napokada Musa, anna soro’ tu tabuan dio mai Firaun sia mintu’ to mase’ponna sia mintu’ taunna; moi misa’ tae’mo torro.

³²Apa moi susito, attu ia duka bangsiato anna umpabattuk, penaanna tu Firaun naurungan tang naeloran male tu bangsa iato.