Read Toraja-Sa'dan KATASSURAN 9 Bible Online

KATASSURAN 9 - Toraja-Sa'dan bible

KATASSURAN 9

¹Ma’kadami PUANG lako Musa Nakua: Maleko mennolo lako Firaun, pokadanni kumua: Nakua kadanNa PUANG Kapenombanna to Ibrani: Eloranni tu taungKu male, anna menomba lako Kaleku.

²Belanna iake manokako urrampananni tu tau iato male sia tontongko la umpatadangi,

³manassa la Napata’pai lima PUANG tu mintu’ patuoammu dio lu padang, iamotu mintu’ darang sia keledai sia unta sia sapi sia mintu’ bembe’ sola domba; iamoto tu la Naparampoi ropu mapannang.

⁴La Napasenga’ PUANG tu patuoanna to Israel anna patuoanna to Mesir, kumua da naden mate moi misa’ tu mintu’ patuoanna to Israel.

⁵Napatantumi PUANG tu attunna, Nakua: Masiangmo anna la umpogau’i PUANG tu apa iato lan te tondok.

⁶Iatonna masiangmo Napogau’mi PUANG tu apa iato; mintu’ tu patuoanna to Mesir mate nasangmo, apa iatu patuoanna to Israel moi misa’ tae’ duka mate.

⁷Nasuami Firaun tu tau lao inde to lako, anna moi misa’ tae’ ia mate tu mintu’ patuoanna to Israel, apa iatu penaanna Firaun tontong battuk, naurungan tang naeloran tu bangsa iato male.

⁸Ma’kadami PUANG lako Musa sia Harun, Nakua: Alakomi au lan mai dapo’ ammi peponnoi pa’ka’panmi, anna samboranni Musa langngan langi’ dio olona Firaun.

⁹Au iato la mendadi manissang sipettiaran ussitutu’i tondok Mesir, anna iatu mai to lino sia olo’-olo’ lan mintu’ tondok Mesir puruan, na iato puru iato sira’tuk-ra’tuk mendadi kele.

¹⁰Naalami sola duai tu au lan mai dapo’, anna male mennolo lako Firaun, naamboranni Musa tu au iato langngan langi’, anna puruan tu mai to lino sia olo’-olo’, nasira’tuk-ra’tuk tu puru iato mendadi kele.

¹¹Naurunganni iatu mintu’ to unnampui issan-issan tang naatta bendan dio olona Musa, napobua’ puru iato; belanna pada puruammo tu mintu’ to unnampui issan-issan sia mintu’ to Mesir.

¹²Apa Napamakarra’ PUANG tu penaanna Firaun, naurungan tae’ naturu’i tu kadanna sola duai, susitu Napokada PUANG lako Musa.

¹³Ma’kadami PUANG lako Musa, Nakua: Masiang melambi’ko millik, ammu male umpennoloi Firaun, pokadanni: Nakua kadanNa PUANG, Kapenombanna to Ibrani: Eloranni tu taungKu male, anna menomba lako Kaleku.

¹⁴Belanna attu iate la Kupasae tu mintu’ kamandasan landa’ lako kalemu sia lako mintu’ taummu, ammu issanni, kumua tae’ padangKu lan mintu’ lino.

¹⁵Moi totemote ma’din Kuangka’ tu limangKu umparampoiko ropu sia mintu’ taummu, ammu mangsan dao mai kuli’na padang.

¹⁶Apa tonganna iamo bannangna te angKu karimmanniko, kumua angKu patiroangko tu kamatotorangKu; anna sangangKu dipakalelean lan mintu’ lino.

¹⁷Tontong bangpoko undampa taungKu, tang mueloran male.

¹⁸Manikale’ attu susite, angKu pasae uran batu mandu mapannang, tu inang tae’ lenpa nadadi lan tondok Mesir, randuk dio mai pamulanna sae lako totemo.

¹⁹Totemo pesuanni urrampunni tu mintu’ patuoammu sia mintu’ apammu dio lu padang, belanna mintu’ to lino sia patuoan tu dio lu padang sia tang dirampun tama banua, la mate narua uran batu.

²⁰Minda-mindai to mase’ponna Firaun, tu ungkasiri’ kadanNa PUANG, iamo umpasere mintu’ rurananna sia mintu’ patuoanna tama banua.

²¹Apa mintu’ tu to tang undampang kadanNa PUANG, iamo umpopa’elo’na mintu’ rurananna sia mintu’ patuoanna dio lu padang.

²²Ma’kadami PUANG lako Musa, Nakua: Angka’i tu limammu langngan langi’, anna sae tu uran batu lan lili’na tondok Mesir, urrua mintu’ to lino sia mintu’ patuoan sia mintu’ tananan lan lili’na tondok Mesir.

²³Naangka’mi Musa tu tekkenna langngan langi’, anNa pasaei PUANG tu guntu’ sia uran batu sia kila’ sipellepa’-leparan tama lino: susimoto tu tondok Mesir Napauranni PUANG uran batu.

²⁴Sia iatu uran batu sirau kila’ silalle-lalle lendu’ metakuranna, tae’ bangpa susinna lan mintu’ tondok Mesir temponna to Mesir dadi misa’ bangsa.

²⁵Mintu’ tu apa dio lu padang, la tolino la patuoan, nasanggang uran batu, sia iatu mai tananan dio lu padang nasanggang duka sia iatu mintu’ kayu dio lu padang napasiapanan.

²⁶Ia manna tu padang Gosyen, tu napa’tondokki to Israel, tang narampoi uran batu.

²⁷Iatonna attu iato napopetambaimi Firaun tu Musa sia Harun, anna ma’kada lako nakua: Tonganna te allo iate kasalammo’; inang malambu’ tu PUANG, apa aku, sola mintu’ taungku to kadake gau’.

²⁸Mengkamoya tonganmokomi lako PUANG, belanna iatu guntu’ Napasae Puang Matua sia uran batu metakuran tongan. Ianna dadi la kuelorangkomi male, tae’mo ammi la torro.

²⁹Nakuami Musa lako: Iangku tassu’ lan mai tondok, la mempala’ patomalina’ langngan PUANG anna radan tu mintu’ guntu’ sia la pa’de tu uran batu, ammi issanni, kumua PUANG ampunna te lino.

³⁰Apa kutandai duka tu kamu sia mintu’ to mase’ponmi, kumua tang mataku’pokomi dio oloNa PUANG Kapenomban.

³¹Iatu mintu’ kame sia dalle sisikan napasiapanan uran batu, belanna iatu dalle sisikan membulimo sia iatu kame membungamo.

³²Apa iatu mintu’ gandung sia gandung kapua lise’na, tae’ nasanggang, belanna tae’ siapa nakeba’tang.

³³Malemi tu Musa dio mai olona Firaun anna tassu’ lan mai tondok, sia mempala’ langngan PUANG, anna iatu guntu’ sia uran batu, tae’mo nauranni tu padang.

³⁴Iatonna tiromi Firaun tu diona uran sia uran batu sia guntu’ pa’demo, umpogau’omi kasalan sia umpabattuk penaanna, la ia, la iatu mintu’ to mase’ponna.

³⁵Umpamakarra’omo penaanna tu Firaun, naurunganni tang unneloran to Israel male, susitu kadanNa PUANG nasa’bu’ Musa.