Read Toraja-Sa'dan AYUB 10 Bible Online

AYUB 10 - Toraja-Sa'dan bible

AYUB 10

¹Iatu penaangku mosomo tuo, kulendokan bang tu sarroku, sia ma’kadana’ lan kamapairan penaangku.

²La ma’kadana’ lako Puang Matua: Da Mira’ta’i kumua sipatuna’ diukung; paissannina’, ma’apai Milaoina’.

³Denraka upa’Mi, ke Mipakario-rioi sia Mitibe tu panggaraga limamMi sia Mipaparrangi masiang tu pa’tangngaranna to tang mekaaluk?

⁴Miampuiraka tu mata tolino, patiroroKomika susi patirona ma’rupa tau?

⁵Padaraka allo katuoamMi tu allona ma’rupa tau sia padaraka tu taunMi na allona misa’ muane,

⁶amMi daka’i tu kakelokangku sia Mipenunu tu kasalangku,

⁷moi amMi tandai, kumua tae’ angku sala, sia moi misa’ tau tae’ nama’din ullendokanni lan mai limamMi?

⁸LimamMimo tu unggaragana’ sia ungkombongna’, upu’mo sia sanda rupamo; sia la morairoKomika ussabu’ina’?

⁹Kilalai, kumua losso’ pitti’ tu Mikombong angku dadi, sia morairoKomika umpasulena’ angku dadi barra’-barra’?

¹⁰Tae’ raka Mibolloanna’ susitu bumbungan sia Mipasusina’ to dadi’ makko,

¹¹umpapakeina’ kuli’ sia duku’, sia Mipakkannina’ buku sia ura’?

¹²Mikamaseina’ katuoan sia kamaturu-turuan, sia pa’kaduttu’Mi ungkampai penaangku.

¹³Apa inde sia tu Mibuni lan penamMi-kutandai kumua iatu iannate mipangudumo — ,

¹⁴kumua iake kasalammo’, manassa Mipemarangana’ sia tae’ Mibilang maserona’ dio mai kakelokangku.

¹⁵Iake manassana’ sala — upu’ alloku! sia iake tae’i kusala — manassa tae’ kubelai unnadongan ulungku, belanna namosomo’ kadisayuan sia untiro kamandasangku.

¹⁶Iangku adongan ulungku, manassa iatu Puang susito singa unnula’na’ sia Mipakitan pole’na’ kuasa kalle-kalleamMi.

¹⁷Tontong bangna’ Mitamban sa’bi ba’ru unneana’, sia umpabudaKomi kamapa’diran penaamMi lako kaleku susi to sangtuntunan, ondongpi sangpampangan surodadu ullaoina’.

¹⁸Apa ma’apai amMi patibussanna’ lan mai pa’tambukanna indo’ku, anna tae’ naka’tu sunga’ku, tonna tae’pa misa’ mata untirona’.

¹⁹Iake susito susina’ to tae’pa kudadi; tongku tassu’ dio mai pa’tambukanna indo’ku, angku ta’pa male dilamun.

²⁰Tang sidi’raka tu allo katuoangku? Eloranna’, angku perasai kaparannuan sidi’,

²¹ke tae’pi angku male sia tang sule lako tondok kamalillinan sia kapittukan,

²²lako tondok lillinan parrak, tu nanii, kapittukan sia nanii atoran tang ma’rundunan, sia nanii arrang susito kamalillinan.