Read Toraja-Sa'dan AYUB 11 Bible Online

AYUB 11 - Toraja-Sa'dan bible

AYUB 11

¹Ma’kadami tu Zofar, to Naama nakua:

²Ma’dinraka tu kada la’bi tang dipebalii, sia to umbeloi kadanna la ditonganan?

³Ma’dinraka tu kada punalammu umpakappa tau, sia ma’telle-telleko anna tae’ tau umpakasiri’ko?

⁴Ma’kadako mukua: Iatu pangadarangku malolo, sia maserona’ dio pentiroNa Puang.

⁵Apa lala sia manii anNa ma’kada Kalena tu Puang Matua sia umpatiku’bi’ randan pudukNa lako kalemu,

⁶sia umpaissanniko rasia kakinaan, belanna umpopanglokkon penduan kapaissanan. Mumane mangaku kumua iatu Puang Matua tae’mo Nakilalai tu sangtaan kakelokammu, tu la mupomatananna.

⁷Ma’dinraka mutarru’ tu rasianNa Puang Matua, sia ussuka’ To umpoissan angge maritik sae lako ma’katampakanna?

⁸Iatu iannato malangka’ ten to langi’; apara tu ma’din mupogau’? Mandalan na lino tomate; apara tu ma’din mutandai?

⁹Iatu suka’na malambe’ anna kuli’na padang, sia iatu kalua’na losong na tasik kalua’.

¹⁰Iake matira’I sae, anna ma’tingkan sia ma’paolai salu lan kombongan, minda tu la umpadapa Puang?

¹¹Belanna Natandai tu to bulituk, sia Natiro tu kakelokan moi tae’ Namale umpenunui.

¹²Umba la nakua tu to tang kinaa la ungkabu’tui kapaissanan, ke la dadi tu iannato, ma’din duka tu anak keledai lampung mendadi rupa tau.

¹³Iake mupamaloloi tu penaammu, sia umballa’ko limammu, lako Puang;

¹⁴iake denni kakelokan lan limammu, pembuanganni lao, sia da naden katangmaloloan lan tenda munii torro —

¹⁵iake susito, manassa la muadongan tu ulummu, natae’mo mumaruttak, ammu batta’ tumanan sia tang mataku’;

¹⁶ondongpi tang la mukilalaimo tu kamaparrisan, sia la mukilalai susito uai lolong.

¹⁷Iatu katuoammu la bu’tu marorrong susi ke ma’tangngai allo; moi matumba malillinna, apa la butung to melambi’.

¹⁸La ma’patonganko, belanna den pa’rannuanan, sia iake mangkami mupalelei matammu, la marampa’ko male mamma’;

¹⁹ammu matindo tang napatiramban misa’ tau, sia buda tu tau umpeagi kamasokanammu.

²⁰Apa kamailuanna to tang mekaaluk umpamalayu matanna, iatu mintu’ lalan pentilindunganna ka’tumo, iatu apa napeagi, ia mannamo tu ka’tuan sunga’.