Read Toraja-Sa'dan AYUB 12 Bible Online

AYUB 12 - Toraja-Sa'dan bible

AYUB 12

¹Apa mebali tu Ayub nakua:

²Manassa kamumo to paissan tongan: la sipulikomi tu kakinaan.

³To paissan dukana’, susitu kamu, tae’ra ammi sau’na’; mindara tang untandai tu susinnato?

⁴Napokatelleanna’ padangku ma’rupa tau, iatu aku Naperangiina’ Puang Matua, ke meongli’na’ lako Kalena; napokattellean to malambu’ sia to mengkaola lako Puang.

⁵Taana to mandasa iamotu kadisayuan — susimoto tu pa’tangngaranna to maupa’; iamoto tu taana to tipa’re’ba.

⁶Marampa’ tu tendana to ma’pakario-rio sia manaman tu to umpare’dek ara’Na Puang Matua, mintu’ tu to morai ungkuasai Puang Matua.

⁷Apa mekutanako lako mintu’ olo’-olo’, anna ada’iko; sia lako manuk-manuk dao langi’, anna pamanassangko.

⁸Ba’tu ma’kadako lako kuli’na padang, anna ada’iko, sia melo ke bale diong tasik unnuleleanni lako kalemu.

⁹Mindara tu mintu’ apa iate tu tae’ natandai, kumua penggauran limanNa PUANG te?

¹⁰Iatu deatanna mintu’ apa tuo, lan limanNa sia penaanna mintu’ ma’ rupa tau.

¹¹Tang nasudiraka talinga tu kada, sia tae’raka nale’i langi’-langi’ tu kande?

¹²Denraka kakinaan dio to kaubanan, sia padaraka kamalamberan sunga’ tu kapaissanan?

¹³Dio Puang nanii tu kakinaan sia kamawatangan, Puang unnampui pa’tangngaran sia patiro melo.

¹⁴IanNa rondonni Puang, tae’mo nadibangun sule; iake Natarungkui tu tau, tae’ nadibungkaran.

¹⁵Iake Nasapanni tu uai, marangke nasang; iake Napalolong pole’i, nabaliangan tu mai padang.

¹⁶Dio Puang nanii tu kamatotoran sia patiro penaa, Ia umpoissan to dipapusa sia to ma’papusa.

¹⁷Nasua tu to pebangun ada’ male susito makario-rio sia to ma’paolai salu Napadadimo to baga.

¹⁸Nako’ka’i tu rante napa’pungoan datu, sia Napungo Puang tu aakna datu.

¹⁹Iatu mai tominaa Nasua male susito makario-rio, sia minda-minda batta’ tumanan, Nasongkan.

²⁰Napopa’loko-lokomo tu to manarang umbuang kada, tu mai to naposande’ tau, sia untaeran tu tangnga’ melona to matua.

²¹Napabuda tu kamatunanna to mala’bi’ sia Nako’karan tu pepori aakna to kuasa.

²²Napasombo tu mai apa mandalan lan mai to’ malillinna sia umpapayan lillinan parrak lako to’ kasianganna.

²³Napatarompo’ tu mai bangsa, anNa sanggangi tu tau iato, Napamalona’ lili’na tu mai bangsa sia Napali’ tu tau iato.

²⁴Naalai tu tangnga’ melona pangulunna tau lan tondok, sia Napapusa tu tau iato lan lu padang pangallaran tu tae’ lalan ditiro.

²⁵Sumalappa-lappa tu tau iato lan kamalillinan tu tae’ nakasiangan, Napapusa tu tau iato susito malango.