Read Toraja-Sa'dan AYUB 13 Bible Online

AYUB 13 - Toraja-Sa'dan bible

AYUB 13

¹Manassa iatu mintu’nato natiromo matangku, sia narangimo talingangku sia kupalanmo penaangku.

²Iatu apa mitandai, kutandai duka, tae’ra ammi sau’na’.

³Apa moi susito, moraina’ ma’kada lako To umpoissan angge maritik lako Puang Matua la kunii umpokadai tu a’gangku.

⁴Apa kamu to untannun kabuttokan, sia kamu sola nasang to ma’dampi tang tongan.

⁵A’a kemmi ma’pakappa pissan bangmo! Iatu iannato la mipokinaa.

⁶Perangii tu peta’tanku, sia palan penaai tu pa’pasala sun dio randan pudukku.

⁷La mitongananraka tu Puang Matua, ke ma’kada tang tongankomi sia mitongananraka tu Puang, ke ma’kada buttokkomi?

⁸La mipelindoraka tu Puang sia la bendanrokomika tu to untonganan Puang Matua?

⁹La meloraka, ke Puang umparessakomi; ma’dinraka mipakena tu Puang, susitu ma’rupa tau dipakena?

¹⁰La Naukung makarra’komi, ke ma’pelindo buni bangkomi.

¹¹Tae’raka nala umpatirambankomi tu kapasareongananNa sia tae’raka nala urrampoikomi kama’parondoan diona Kalena Puang?

¹²Iatu kada misa’bu’ iamo peada’ dandanan sangka’ susito au, iatu mipobalulang balulang losso’ pitti’.

¹³Perangiina’ ammi kappa, angku ma’kada, moi naapa-apa urrampoina’.

¹⁴Kuala tu duku’ku kupatamai to’ alla’ isingku sia kupalan limangku tu sunga’ku.

¹⁵Moi Namorai tu Puang umpateina’, tontong duka kurannuan; ondongpi iatu gau’ku moraina’ untongananni dio oloNa.

¹⁶Belanna Puang tu la kupogaronto’ kasalamarangku, apa iatu to bulituk tae’ nabarani mennolo lako Puang.

¹⁷Perangii melomi tu kadangku sia tanannimi talingammi tu apa kupamanassa.

¹⁸Manassa iatu kara-karaku kupasirundunammo, kutandai, kumua tonganna’.

¹⁹Mindara ma’din umbalina’ lan kara-karaku? Iake tonganni den, la kappana’ anna ka’tu sunga’ku.

²⁰Ia manna tu da’dua penggauran da Mipogau’i lako kaleku, manassa tae’ kula umpembunian kaleku dio oloMi.

²¹Alai tu limamMi dio mai kaleku sia da napamataku’na’ tu apa mepatirambamMi.

²²La metambaKomi, angku mebali; ba’tu aku la ma’kada, amMi pebaliina’.

²³Sangapara tu kakelokangku sia kasalangku? Paissannina’ tu kapatodotintingangku sia kasalangku.

²⁴Ma’apai amMi buni lindoMi sia Misangana’ ualimMi?

²⁵MorairoKomika umpatirambanna’ susitu daun nairi’ angin, sia unnula’ dalame marangke,

²⁶miurungan ullampakanna’ toto’ mapalla, sia Mipakkan tu kakelokangku tongku mangura,

²⁷sia Mipatama sangkala tu lentekku sia Mipenniroi tu mintu’ tengkaku sia Misakkalanganni tu pala’ lentekku?

²⁸Iatu iannato la rampo lako tau, tu sanggang susito kayu manapo sia susito sampin nakande busung!