Read Toraja-Sa'dan AYUB 15 Bible Online

AYUB 15 - Toraja-Sa'dan bible

AYUB 15

¹Ma’kadami tu Elifas, to Téman, nakua:

²Denraka to kinaa umpatassu’ kapaissanan tang kebattuan, sia umponnoi angin dio mai rampe matallo tu ba’tengna?

³Nata’tanraka tau umpokada kada tae’ gai’na, sia ulelean tang ma’run- dunan?

⁴Den dukapa iamotu mulullu’ tu kapengkaolan lako Puang Matua sia umpasosso’ko pa’pakaraya dio oloNa Puang Matua.

⁵Belanna iatu kakelokammu unnada’iko ma’kada susito, ammu pilei tu kada to ma’pakena.

⁶Lilamu kalena umpasalako, tangia aku; ondongpi pudukmu kalena ussa’biiko, kumua salako.

⁷Ikoraka tu bunga’na tolino dadi, ba’tu dipadadirokoka dolo na mintu’ tanete?

⁸Ma’perangirokoka lan kombonganNa Puang Matua, sia iatu kakinaan mupalulakoraka kalemu?

⁹Apara tu mutandai, anna tae’ kitandai? Apara tu muissan, anna tae’ kiampui?

¹⁰Den duka dio kaleki tu to ubanan sia to matua induk, tu mandu matua anna ambe’mu.

¹¹Musanga bitti’raka tu pa’pakatana dio mai Puang Matua sia kada masokan, tu dipokada lako kalemu?

¹²Ma’apai nataloiko penaa mapallamu, sia ma’apai nadukku-dukku tu matammu,

¹³ammu barani umbali-bali Puang Matua sia umpatassu’ kada susito dio randan pudukmu?

¹⁴Umbara nakua tu tolino, anna masero, sia anna malolo tu mai to nadadian misa’ baine?

¹⁵Manassa iatu to maseroNa tae’ Nakatappa’i Puang, moi anna mintu’ to untorroi suruga tae’ duka namasero dio pentiroNa;

¹⁶ondongpissan tu to megi’giran sia to kadake liu, iamotu tolino, tu unniru’ kakadakean butung uai.

¹⁷La moraina’ unnada’iko, perangiina’; sia mintu’ apa mangka kutiro, la kuuleleanangko,

¹⁸iamotu mai apa napa’peissanan to kinaa tu nanannanni nene’ to dolona, sia moi misa’ tae’ nabunii,

¹⁹tonna misa-misapa diben untorroi tondok, sia tae’pa to salian lembang tama urraui.

²⁰Iatu to tang mekaaluk mataku’ lan mintu’ allo katuoanna, sia iatu to ma’pakario-rio lan mintu’ taun tu mangka dilampakanni.

²¹Iatu oni apa mepatiramban tialling lan talinganna, iake lanni kamarampasan tongan narampoimi to ma’kasanggang.

²²Tae’ napatonganni, kumua la sule lan mai kamalillinan: dilampakmo tu kalena la nakande pa’dang.

²³Salamba salaomo undaka’ kande umbara nanii? Natandaimo, kumua sakka’mo lako kalena tu allo kamalillinan.

²⁴Napamataku’ kamasussan sia kapussakan, narampoi anna sau’i susito misa’ datu sakka’mo la palaoan situang kamaparranganna.

²⁵Belanna nae’te’mo tu limanna unnea Puang Matua, sia umbali To umpoissan angge maritik.

²⁶Ma’dondo umbali Puang situang kamadongngaranna, sola balulang dikararran bassi.

²⁷Belanna napabungku’i lompo tu lindona sia napalapikki lompo tiku lao tu aakna;

²⁸napa’tondokkimo tu kota disanggang, sia lan banua tu tang sipatu nanii tau torro, tu dilampakmo tontong daun lauan.

²⁹Tae’ natontong sugi’ sia iatu mai iananna tang la marendeng, sia iatu mai apanna tang la kerangan dao kuli’na padang.

³⁰Tae’ natilendok dio mai kamalillinan, sia iatu dukku api ungkande mampu’i tu tarukna sia napa’dei penaa sun dipudukNa Puang.

³¹Da narannuanni tu apa tang kebattuan, napakena manii tu apa iato, belanna tang kebattuan tu pepak- kanna.

³²Tae’pa nalambi’ tu attunna, anna upu’mo tu allona, sia tae’mo namamata tu mai palapa koromana.

³³La susito garonto’ anggoro’ tu ronno’ mintu’ bua makkanna sia susito garonto’ saitun, tu rondon mintu’ ta’binna.

³⁴Belanna iatu tuntunan to tang umbilang Puang Matua tang danun sia api ungkande pura mintu’ tendana to ungkande pappe’.

³⁵Susito ungkia’tangan kakadakean sia untibussanan kakelokan sia iatu ba’tengna umpopembua pa’pakena.