Read Toraja-Sa'dan AYUB 16 Bible Online

AYUB 16 - Toraja-Sa'dan bible

AYUB 16

¹Apa mebali tu Ayub nakua:

²Budamo tu kada susite mangka kurangi, manassa kamu tu to ma’pakatana, apa ma’pamasussaorokomi.

³Tae’raka upu’na tu mintu’ kada tang kebattuammi? Apara tu umpatiakka’ko, ammu ma’kada pole’pa?

⁴Ma’din dukana’ ma’kada susi kamu, ke susinna kamu narampoi kamandasan susi aku; la kutolorangkomi kada mammi’ sia kuiling-ilingangkomi ulu.

⁵Pudukku la umpabatta’ penaammi sia pa’pakatanangku la umpamaringankomi.

⁶Apa moi angku ma’kada tae’ nakurang tu kamaparrisangku, sia iake kappana’, denraka kamaringanan kupolean?

⁷Apa totemo Naalaimo’ Puang tu mintu’ kamatotorangku; Mipatisambo’mo male mintu’ sangdadiangku,

⁸sia Miparampoina’ kamandasan; iatu iannato dadi sa’bimo unneana’: iatu sakingku bendanmo umbalina’ sia umparapa’na’.

⁹Kare’dekan ara’Na Puang usse’buse’buna’ sia ullaoina’, Ia umpasisange’ isinNa unta’paina’, iatu Ualingku umpatibulia’ matanNa unneana’.

¹⁰Iatu tau iato umpopenganga sadangna umbalina’, sia napamatunana’ sia ussala’pa popoku, sangbara’ tu tau iato sae sirampun unneana’.

¹¹Nasorongna’ Puang Matua lako tau iato, sia Naeloranna’ tama limanna to tang mekaaluk.

¹²Tuona’ lan kamanamanan, apa Puang umpatirambanna’; Nadammak tu sokkongku sia Napessambakanna’ rokko padang, sia Napamanassana’ Napopassandan.

¹³Buda tu mai tinaran sipettiaran untikuina’, tang untandai kamamasean tu Puang umpatarru’i bale’ke’ku, sia Nabolloan rokko padang tu pa’dungku.

¹⁴Nale’to-le’to bang Puang tu kaleku, sia ma’dondo ullaoina’ susi misa’ to lalong.

¹⁵Misa’ karoro’ diposanda bolong kudasiran kuli’ku, sia tandukku kupentanaran rokko to’ barra’-barra’;

¹⁶iatu lindoku mararang napobua’ katumangiran, sia iatu kulimbang matangku nasamboi lillinan parrak,

¹⁷moi anna tae’ pa’pakario-rio dio limangku sia masero tu passam- bayangku.

¹⁸O kuli’na padang! da musamboi tu raraku, sia peongli’ku da nalambi’i tu inan kapelayoan!

¹⁹Apa moi nasusito, tonganna denmo totemo tu Sa’bingku dao suruga, iamotu To ma’tonganangku dao masuanggana.

²⁰Moi natelle-tellena’ tu mai sangmaneku, apa iatu matangku ma’palulako bang Puang Matua;

²¹kumua na Puang umpaolai salu tu ma’rupa tau siea sia urra’ta’ kara-karana tolino, tu siea solana.

²²Belanna sidi’ bangri tu taun la sae, angku olai tu lalan, tu tae’ angku la unnolai sule.