Read Toraja-Sa'dan AYUB 17 Bible Online

AYUB 17 - Toraja-Sa'dan bible

AYUB 17

¹Iatu sunga’ku sanggangmo sia iatu allo katuoangku ka’tumo, ia mannamo torro tu panglamunan kupotaa.

²Tonganna kaditellean mannamo tu taaku; iatu matangku unta’pai to ussigaganna’.

³Puang umpamanassa Kalena unnindo’ina’ dio oloMi; mindara tu to senga’ la ussisala’panna’?

⁴Belanna Puang untampunni tu paissan penaanna; iamoto natae’ Mieloranni patalo tu tau iato.

⁵Minda-minda umpasala sangmanena undaka’ saro bu’tu kadake, la malayu bang matanna tu anakna.

⁶Napoparumbasanna’ tau dio lu bangsa, sia akumo to natittudui tau tu lindoku.

⁷Maru’gunmo tu matangku napobua’ karossoan, sia mintu’ pa’kaleangku susi bang to bayo-bayo.

⁸Iamoto tu napotiramban to bulo lollong, sia iatu to bulituk naposaki inaa to tang kasalan.

⁹Moi nasusito iatu to malambu’ umpatontong lalanna, sia minda-minda tu masero limanna la kerangan tu kamatotoranna.

¹⁰Moi susito tontong bangkomi sae-sae! apa tae’ kukabu’tui tu to kinaammi.

¹¹Iatu alloku lendu’mo, sia pa’tangngarangku tang dipadadimo, sola patiro penaangku.

¹²Iatu tau iato mai morai umpopendadi masiangi tu bongi; iatu arrang nasanga mandu mandappi’ na kamalillinan.

¹³Iake kukampai tu lino tomate susito banuangku, sia kuballa’ tu inan mamma’ku lan kapittukan,

¹⁴angku ma’kada lako panglamunan, kukua: Kamu tu ambe’ku, sia lako ulli’ kukua: Kamu tu indo’ku sia anak darangku,

¹⁵iake susito umbara nanii tu pa’rannuanangku? Manassa, mindara ma’din untiroi tu pa’rannuanangku.

¹⁶Iatu iannato la male rokko to’ mandalanna lino tomate, ke pada malekan sola rokko to’ litak.