Read Toraja-Sa'dan AYUB 18 Bible Online

AYUB 18 - Toraja-Sa'dan bible

AYUB 18

¹Ma’kadami tu Bildad, to Suah, nakua:

²Sangapaporoko ma’kada umpoyakan? Iake muissan melomi, kimane ma’kada-kada pole’.

³Ma’apai angki disanga susito patuoan sia susito tang paissan dio pentiromu?

⁴Iko kalena, napobua’ kasengkeammu ammu se’bu kalemu, ikoraka anna la dipasisayuran tolino tu kuli’na padang sia dipalele tu buntu batu dio mai inanna?

⁵Apa moi susito iatu arrang to tang mekaaluk la dipa’dei sia iatu dukku apinna tae’ nala tontong parrang.

⁶Iatu arrang lan to’ tendana la malillin sia iatu lampu daona lu la dipa’dei.

⁷Iatu pentengka matoto’na la diampangi sia pa’timbanganna kalena la ussongkanni.

⁸Belanna pentengkana kalena anna tipoya sia unnolai patuang disamboi panganan.

⁹Naala ba’tikan tu kambutu’na, sia naarra’i poya purrusan tu kalena.

¹⁰Iatu ulang dibunianni diong padang, sia pepoya ditananammi dio to’ lalan.

¹¹Tiku lao narampoi tu apa mepatiramban sia naula’ dio to’ pentengkana.

¹²Iatu kamandasan tangdia’mo la unnampello’i sia iatu kasanggangan ma’parandanmo la untobanganni.

¹³Iatu pa’bunga’na kamatean ungkande sisanginanni tu kuli’na sia unnimbakan pa’kaleanna.

¹⁴Disintakki dio mai to’ tendana, tu nanii manaman nasa’ding; anna popentengkai lako datu ma’patiramban.

¹⁵Lan to’ tendana naniimo apa tang sipatu ussisolanni, sia la diambo’i solo’ tu inan katorroanna.

¹⁶La marangkemo diong mai tu uaka’na sia malayumo dao mai tu takke’-takke’na.

¹⁷La pa’demo tu kadipengkilalaianna dao kuli’na padang, tang disa’bu’mo tu sanganna dio lu batatta.

¹⁸La di suale dio mai to’ maserona tama to’ malillinna sia diula’i dio mai to’ naninna tau.

¹⁹Tang la membati’ sia tang la mentaruk dio lu bangsana, sia tae’mo misa’ tau la torro lan inan nanii.

²⁰Iatu to mangura nakagiangan tu allona, sia ma’parondo la narampoi to matua.

²¹Manassa susimoto tu katorroanna to kadake, sia susimoto tu pa’tondokanna to tang umbilang Puang Matua.