Read Toraja-Sa'dan AYUB 19 Bible Online

AYUB 19 - Toraja-Sa'dan bible

AYUB 19

¹Apa mebali tu Ayub nakua:

²Sangapaporokomi la umpamasaki ara’na’ sia iatu kadammi umpabonnong penaangku?

³Pessangpulomokomi umpamatunana’; tae’ mimasiri’ umpamapa’dik penaangku.

⁴Manassa tonganra’ka pusa, dioraka kaleku tu kapusan?

⁵Iake tongannakomi ma’kada layuk lako kaleku, la mipamanassanna’ tu kadisayuangku.

⁶La mangakukomi, kumua Puang Matua umpogau’ tang malolo lako kaleku sia Naparampoina’ poyaNa.

⁷Manassa melallakna’, kukua: Dipandasana’! apa tae’ kudipebalii. Metambana’ umpalaku pa’tunduan apa tae’ naola salunna.

⁸Naampangi Puang tu batattaku, kuurungan tang tarru’mo, sia Nasamboi kamalillinan tu lalanku.

⁹Napasisayurammo’ tu kamala’birangku sia Naalaimo tu makotaku.

¹⁰Narondonnimo’ tiku lao, kuurungan sabu’, sia iatu pa’rannuanangku Nalampi’i susito sangbatang kayu.

¹¹Napadukkumi tu kare’dekan ara’Na lako kaleku sia Nasangana’ ualinNa.

¹²Pada sae sirampun tu tuntunanNa, undaka’ lalan ullaoina’ sia ma’tenda untikui tendaku.

¹³Iatu siulu’ku Napatoyang dio mai kaleku, sia iatu a’ganna sitandangku susi to mambela lako kaleku.

¹⁴Iatu sangdadiangku tae’mo natollongina’ sia iatu sitandangku tang nakilalaimo’.

¹⁵Iatu ruranangku sia iatu kaunanku baine nasangana’ to mambela, susi bangmo to tang natandai dio pentirona.

¹⁶Iangku tambai tu kaunanku muane tae’mo namebali, kupengkamasei tonganpi.

¹⁷Iatu penaa bubaungku nakagi’gi’mo baineku sia bubosingku nakalinamo rapungku.

¹⁸Moi iatu pia muane napamatuna dukana’, iake bendanna’, ma’kada tu tau iato umbali-balina’.

¹⁹Iatu mintu’ to kusikaduluran nakasorromo’; sia iatu to kuala mase nasuleimo’.

²⁰Iatu kuli’ku sia duku’ku le’ke’ dio bukungku sia ia mannamo tu kalleku torro.

²¹Kamaseina’, kamaseina’, e kamu sangmaneku, belanna nata’paimo’ limanNa Puang Matua.

²²Ma’apai miula’na’ susi Puang Matua, sia tae’ paraka mipa’pediaranni tu duku’ku?

²³A’a, dennoupa’ anna disura’ tu kadangku, kenna den siamo upa’ nadipatama misa’ sura’,

²⁴disura’ misa’ peoki’ bassi dio papan tumarra, dipa’ lan buntu batu, anna tontong sae lakona!

²⁵Apa kutandai, kumua iatu To mangla’bakku tuo, anNa ma’katampakanna la bendan dao to’ barra’-barra’.

²⁶Na iake lollo’mi tu kuli’ku, lan mai pa’kaleangku la kutiro tu Puang Matua;

²⁷tu aku kalena la untiroi tu kupomelona, sia matangku la untiro Puang, tangia to senga’ dio mai Puang; iatu apa-apa lan ba’tengku lendu’ tongan mamali’na.

²⁸Iake ma’kadakomi mikua: Umba la kikua unnula’i angki kabu’tui tu garonto’na kara-kara iato!

²⁹la ungkataku’ kalenakomi pa’dang, belanna iatu kare’dekan ara’mi ammi pobannangi dipakandei pa’dang, ammi mangaku, kumua den tu pa’paolai salu.