Read Toraja-Sa'dan AYUB 2 Bible Online

AYUB 2 - Toraja-Sa'dan bible

AYUB 2

¹Den sangallo saemi tu mai anakNa muane Puang Matua la umpennoloi PUANG sia sae duka tu deata bulituk ussolanni umpennoloi PUANG.

²Ma’kadami tu PUANG lako deata bulituk Nakua: Umbara tu munii sae? Mebalimi tu deata bulituk lako PUANG nakua: Sulena’ salamba salao sia lu lako lu dio mai lan lino.

³Ma’kadami tu PUANG lako deata bulituk, Nakua: Mupemarangamoraka tu taungKu Ayub? Belanna misa’ tau dao kuli’na padang tae’ susinna, lendu’ tongan ia mengkaolana sia bulo lollongna sia mataku’na lako Puang Matua na umpatoyang kalena dio mai kadake. Sia tang leluk len lan kapengkaolanna, moi ammu naranNa’ ungkadakei sia ussanggang tang kebattuanni.

⁴Apa mebali tu deata bulituk lako PUANG, nakua: Kuli’ dipasondana kuli’ sia mintu’ apa naampui tau la nasorong belanna katuoanna.

⁵Apa iake Mie’te’i tu limamMi, amMi pata’pai tu bukunna sia duku’na, ma’apai nala tang mempayan sorong boko’ dio mai Kalemi?

⁶Ma’kadami tu PUANG lako deata bulituk, Nakua: Manassa iatu tau iato lan kuasammu, sangadinna la mukatirinnai tu sunga’na.

⁷Pakalan tassu’mi tu deata bulituk dio mai oloNa PUANG, anna pata’pai kele tang dampi-dampian tu Ayub randuk dio mai pala’ lentekna sae langngan botto ulunna.

⁸Naalami tu bibang sangti’pek nakarrukki tu kalena, anna unno’ko’ lan to’ au.

⁹Ma’kadami tu bainena ungkuanni, nakua: Tang tilelukparokoka lan kapengkaolammu? Sorong boko’moko dio mai Puang Matua, ammu mate.

¹⁰Apa mebali lako bainena nakua: Susiko misa’ to maro-maro ma’kada; ia mannaraka tu melona la tatarima dio mai Puang Matua, anna kadakena tae? Lan te mintu’nate tae’ tu kada sala sun dio pudukna Ayub.

¹¹Iatonna rangimi sangmuanena Ayub sola tallui tu mintu’ kamandasan urrampoi, pantan saemi dio mai tondokna, iamotu Elifas, to Téman, Bildad, to Suah na Zofar, to Naama, situru’mi sae la lao unto’longi sia umpakatanai.

¹²Iatonna mambelapa nabangunammi tu matanna, tae’mi natandai tu Ayub. Ma’urrukammi umpekapuai gamaranna, anna kake-kakei tu bayu lamba’na, anna ambo’i barra’-barra’ tu ulunna nasumarombon langngan langi’.

¹³Unno’ko’mi tu tau iato mai dio padang sola, pitung allo pitung bongi; moi misa’ tau tae’ umpokada sangbuku kada lako kalena, belanna natiro kumua lendu’ tongan kapuana tu kamapa’diran urrampoi.