Read Toraja-Sa'dan AYUB 20 Bible Online

AYUB 20 - Toraja-Sa'dan bible

AYUB 20

¹Ma’kadami tu Zofar to Naama, nakua:

²Manassa iatu tanga’ku totemo umparukuna’ umpebaliiko, belanna titu’dang tongan tu ara’ku.

³Kurangimo tu peta’tan ussayuna’, apa iatu to ma’penaa tang paissan unpebaliina’.

⁴Muissan tempon dioraka mai tu iannate, temponna tolino dipadao kuli’na padang?

⁵Manassa iatu arrakna to tang mekaaluk sangparaanri, sia iatu kaparannuanna to tang umbilang Puang Matua sangattu’ bangri.

⁶Moi na iatu kamatampoanna sae langngan langi’, sia kamadongngaranna untu’tun salebu’,

⁷la pa’de sae lakona susito tainna; minda tu untiroi la ma’kada nakua: Umbamira?

⁸Pa’de susito pangimpi sia tang diappa’mo, disapui susito patiro mendeata ke bongi.

⁹Iatu mata umpenunui tae’ natiroi, sia iatu inan katorroanna tae’mo natiroi sule.

¹⁰Iatu anakna la undaka’ pa’kamaseanna to bitti’ sia limanna kalena la umpasulei tu barang apanna.

¹¹Moi porepa kamatotoranna tu bukunna, la sumpandan tu iannate sola tau iato lan to’ barra’-barra’.

¹²Moi anna matappa’ tu kakadakean lan sadangna, moi anna bunii diong to’ lilana,

¹³moi nananna sia tae’ napamalei, moi anna patananni lan to’ langi’-langi’na

¹⁴manassa duka la membali tu kandena lan tambuk barinni’na, la mendadi susito ipo ula’ rame lan tambukna.

¹⁵Iatu ianan naampello’mo, apa la nalua sule, Puang Matua tu umpatassu’i lan mai tambukna.

¹⁶La namimmi’ tu ipo ula’ rame iato, la napatei lila ula’.

¹⁷Tae’ nala umpopaimanni salu’-salu’na sia salu mandirri’na tani’ enoan sia dadik.

¹⁸Iatu barang naala masussa, la nasorong sule, — tae’ nama’din unnampello’i, — susi duka tu barang apa naappa’ tete dio ma’ balili umpasituka’ apa senga’, tae’ napoparannui.

¹⁹Belanna napakario-rio tu to bitti’ sia nasa’biangan bang, sia napanglo’do’i tu misa’ banua, apa tae’ nakullei umbangunni.

²⁰Manassa tang untandai karapasan lan ba’tengna, sia tae’ nala tilendok sola iananna.

²¹Tae’ bang apa tilendok napobua’ kabarakanna, iamoto natang marendeng tu rongko’na.

²²Moi anna kala’bian narampoi duka taku’, sia kamatilakan kapua tongan urrampoi.

²³La Napa’pediaran tau iato iamoto Narampananni Puang Matua tu kasengkean dukkunNa ullaoi, tu Nabarrakan susito uran lako kalena napokande.

²⁴Moi napallaian tu kalena dio mai pa’buno bassi, la natarru’ duka pana gallang.

²⁵Moi nadu’dukki tu tinaran, naurungan tassu’ lan mai boko’na, sia sun tu tinaran lan mai pa’dunna: Katirambanan kapua duka urrampoi.

²⁶Mintu’ kamalillinan didampapa lako tu apa nananna; iatu api tang napamurru’ (tolino) unnimbakanni sia ungkande pu’pu’i tu apa torro lan tendana.

²⁷Napapayanmo langi’ tu kakelokanna, sia tunannangmo tu kuli’na padang umbalii.

²⁸Iatu apa dipopa’toppo’mo lan banuanna malemo dibaa, disapuimo ke allo kasengkeanNa Puang.

²⁹Iamoto tu taana to tang mekaaluk lu dio mai Puang Matua, sia iatu taa mana’na Napamanassanni Puang Matua.