Read Toraja-Sa'dan AYUB 21 Bible Online

AYUB 21 - Toraja-Sa'dan bible

AYUB 21

¹Apa mebali tu Ayub nakua:

²Perangii meloi te kadangku; melo tu iannato mendadi misa’ pa’pakatana mipa’bengan.

³Sa’barasampa’, angku ma’kada, sia iangku mangkamo ma’kada, ma’dinmokomi ma’telle.

⁴Iatu sarroku lu lakoraka tolino? Ma’dinraka kusa’barasan to?

⁵Sailena’ ammi paressa tonganni, manassa la magiangkomi sia ma’tampun pudukkomi.

⁶Iake kutangnga’i tirambanna’ sia narampoina’ kama’parondoan.

⁷Ma’apari natuopa tu to tang mekaaluk, anna matua induk, anna sakerangngan-rangnganna tu kamatotoranna?

⁸Iatu bati’na tontongpa torro sola, sia iatu tarukna sitiro lindo bang.

⁹Iatu banuanna marampa’, tang narandan kamatakuran, sia tang narampoi pebambaNa Puang Matua.

¹⁰Iatu sapi lakinna, ke mangrundu’i tang sala len, iatu sapi birangna kianak sia tang kalo’doran.

¹¹Napatassu’ tu mai anakna muane susito domba sangtuntunan, iatu mai anakna sipekkondongan tiku lao.

¹²Menani napasiala ganda’-ganda’ sia su’dekan, sia parannu-rannu napasiala oni suling.

¹³Sipeupu’ allo katuoanna tu kamauparanna, sia marampa’ mengkalao rokko lino tomate.

¹⁴Apa ma’kada lako Puang Matua nakua: ToyangKomi dio mai kaleki, belanna tang kiporai untandai tu lalanMi.

¹⁵Apara gai’na lako kaleki tu To umpoissan angge maritik, kumua angki pengkaolai sia apara gai’na lako kaleki, kumua angki pengkamoyai?

¹⁶(Mikua ma’kada, kumua): Manassa iatu rongko’na tae’ naissanna kalena, iatu pa’timbanganna to tang mekaaluk toyang ia dio mai kaleku.

¹⁷Pembuda maro’mo dipa’dei tu lampunna to tang mekaaluk, sia narampoi kasanggangan tu tau iato. Anna papatui Puang kamaparrisan tu tau iato tete dio kasengkeanNa.

¹⁸La susito dalame napettiaran angin, sia susi ta’pian nasarombonan angin bara’.

¹⁹Nananna Puang Matua tu pa’pandasa lako anakna. (Apa ma’kadana’ kukua): sipatu tu Puang umpapakkanni tu kalena tau iato, namane ussa’dingi;

²⁰matanna kalena sipatu la untiroi tu kasangganganna, sia ia kalena sipatu unniru’i tu kare’dekan ara’Na To umpoissan angge maritik.

²¹Denraka nala umpalan penaai tu to lan banuanna ke matemi, ke dika’tumi tu bilangan bulanna?

²²Denraka misa’ tau unnada’i kapaissanan Puang Matua, anNa Ia umpaolai salu tu to dao suruga?

²³Iatu misa’ tomate lan kamawatangan tang lelukna, iatu penaanna rapa’ tongan sia manaman;

²⁴iatu aakna malompo tongan, sia malunak tu utak bukunna.

²⁵Iatu senga’na mate mapalla tongan, tu tang ussa’ding len melona.

²⁶Pada sumpandan lan to’ barra’-barra’, sia ulli’-ulli’ ussamboi tu tau iato.

²⁷Manassa kutandai tu pa’timbangammi sia iatu pa’tangngarammi minii ussau’ parrangna’,

²⁸ammi ma’kada kumua: Umbamira tu banuanna to paa iato? Sia umbamira tu tenda natorroi to tang mekaaluk?

²⁹Tae’raka mipekutananni lako to lendu’ lalan — tae’ ammi ma’din umpeonganni tu pa’patudunna tau iato — ,

³⁰kumua iatu to kadake dikarimmanni ke allo kasanggangan, sia disolan marampa’ ke allo kare’dekan ara’Na Puang Matua?

³¹Mindara unta’tanni tu penggauranna tau iato dio tingayona? Sia iake umpogau’i misa’ apa, mindara la umpapakkanni?

³²Dipasonglo’ lako to’ panglamunan, sia dikampai melo tu buttu-buttu panglamunanna.

³³Dilemongan melo litak disamboanni diong lombok, pantan undi unturu’i, sia dolo dio tingayona tu to tang dikemba’ diia’.

³⁴A’a, matumbai mipakatanana’ kada tang kebattuan, sia iatu pebalimmi pa’pakena manna tu lisa’na!