Read Toraja-Sa'dan AYUB 22 Bible Online

AYUB 22 - Toraja-Sa'dan bible

AYUB 22

¹Attu iato ma’kadami Elifas, to Téman, nakua:

²Ma’dinraka tu tolino Napomaupa’ Puang Matua? Tae’, sangadinna iatu to unnampui tangnga’ kinaa umpamaupa’ misa-misa kalena.

³Napomaupa’raka To umpoissan angge maritik ke malambu’ko, ba’tu Naporongko’raka, ke mukaritutui tu lalanmu, anna malolo?

⁴La Naukungrokoka Puang diona kapengkaolammu lako Puang Matua sia la Napaolairokoka salu?

⁵Tang kapuaraka tu kakadakeammu sia la ka’turaka tu kakelokammu?

⁶Belanna mutoe bang tu apanna siulu’mu natae’ patunna, sia mulendokan tu tamangkalena to mase-mase;

⁷sia tang mupairu’ uai tu to mata’ka’, sia tang muben roti tu to tangdia’;

⁸apa iatu to ma’takia’ mawatang unnampui padang, sia to mala’bi’ tu umpa’tondokki;

⁹iatu to balu musua sule lo’bang, sia mule’to tu takia’na pia biung.

¹⁰Iamoto natikuiko poya sia ta’pa napabuyu’ko katirambanan.

¹¹Tae’raka mutiroi tu kapittukan sia iatu uai saba’ ussamboiko?

¹²Tang unnisungiraka matandena langi’ tu Puang Matua? Tiroi, sangapa malangka’na langngan tu bintoen!

¹³Apa ma’tangnga’ko mukua: Apara natandai tu Puang Matua? Ma’dinraka ma’paolai salu tu Puang lan mai kapittukan?

¹⁴Iatu salebu’ ussamboi Puang, iamoto natae’ Natiroi; unnola arru’ tibangkona langi’.

¹⁵Naalaraka penaammu umpeolai bate lalan dolo, tu pura naola to bulituk,

¹⁶tu to disintak anna tang attunnapa, sia disapui tu parandanganna susito uai mandirri’?

¹⁷Tu ma’kada lako Puang Matua nakua: ToyangKomi dio mai kaleki! sia: Apara tu ma’din Napogaurangkanni To umpoissan angge maritik?

¹⁸Sia inang Puang tu umponnoi kaseboan tu banuanna. Apa iatu pa’timbanganna to tang mekaaluk toyang dio mai kaleku.

¹⁹Iatu to malambu’ untiroi tu iannato anna parannu, sia iatu to tang kasalan untelle-tellei tu tau iato,

²⁰nakua: Tonganna iatu ualingki mangkamo disanggang sia iatu ianan mana’na puramo nakande api.

²¹Mengkara’pako lako Puang, ammu marampa’; iamoto anna kapua tu upa’mu.

²²Tarimami tu pangadaran sun dipudukNa, sia palanmi penaammu tu kadanNa.

²³Iake mengkatoba’moko lako To umpoissan angge maritik, la dibangunmoko; iake mupatoyangi tu katangmaloloan dio mai tendamu,

²⁴sia iake mutibei tu bulaan tang dikombong tama to’ barra’-barra’, sia bulaan Ofir rokko to’ batu lan tangnga salu,

²⁵sia iake To umpoissan angge maritik umpoianan bulaan tang dikombong, sia umpoianan salaka,

²⁶iake susito, manassa mupoparannu tu To umpoissan angge maritik sia mentingara langnganko Puang Matua.

²⁷Iake massambayangko langngan Puang, la Naperangiiko, sia la mupalesso’ tu pangallonammu lako Puang.

²⁸Iake mupamanassai umpogau’ misa’ apa, la danun tu iannato, sia iatu arrang la parrang dio lalanmu.

²⁹Moi dilese lu rokkoko, ma’kada layuk siapoko! sia minda-minda umpamadiongan pentirona, Puang la untundui.

³⁰Ia duka tu to kasalan manassa Natundui Puang, sia tete dio kadiseroianna limammu ammu ma’din dikarimmanni.