Read Toraja-Sa'dan AYUB 23 Bible Online

AYUB 23 - Toraja-Sa'dan bible

AYUB 23

¹Apa mebali tu Ayub nakua:

²Totemo iatu sarroku kapabali-baliammo, moi na iatu kasumarroangku natampunpa limangku.

³A’a, kengku kabu’tui tu Puang, kengku lambi’ori tu inan layukNa!

⁴Manassa la Kurundunan tu kara-karaku lako Kalena sia buda tu tanda katonganangku la kusa’bu’.

⁵Angku rangii tu kada Nabalianna’ sia kutandai apa tu la Napokadanna’.

⁶La Naeara’ka Puang tete dio kakuasan kapuaNa? Tae’, apa Ia la umpalan penaanna’.

⁷Manassa iatu to malolo la untonganan kalena dio oloNa Puang, sia tongtongna’ tilendok dio mai To ma’paolai salungku.

⁸Manassa, iangku ma’palutama rampe matallo, tae’ tu Puang dio, sia iangku ma’palulako rampe matampu’, tae’ kukabu’tui dio;

⁹iake mengkarangi tu Puang dio rampe daanna lu, tae’ kupemarangaI, iake sulei ma’palusau’, tae’ kutiroI tu Puang.

¹⁰Belanna Naissan Puang, umba nakua tu lalan penggaurangku; iake Nasudina’ tassu’na’ susito bulaan.

¹¹Iatu tengkaku tontong unturu’ bate lalanNa Puang, kuturu’ tu lalanNa tang sumepang len.

¹²Iatu pepasan sun dipudukNa tae’ kupatoyangi, lan ba’tengku kuanna tu kada Nasa’bu’.

¹³Apa tang leluk tu pa’inaanNa Puang-mindara ma’din umpadapai? Apa tu naala penaanNa, Napalalo duka.

¹⁴Belanna Puang la umpalanda’i tu apa dilampakanna’, sia budapa tu susinnato lan penaanNa.

¹⁵Iamoto tirambanna’ dio oloNa; iake kutangnga’ tonganni tu iannato, ma’parondona’ ungkataku’I tu Puang.

¹⁶Belanna Puang Matua umpabonnongi tu penaangku, sia To umpoissan angge maritik umpatirambanna’;

¹⁷belanna tae’ angku sabu’ natumang kapittukan, sia belanna nasamboi kamalillinan tu lindoku.