Read Toraja-Sa'dan AYUB 24 Bible Online

AYUB 24 - Toraja-Sa'dan bible

AYUB 24

¹Ma’apari natae’ Natempoanni To umpoissan angge maritik tu attu kadiukungan, sia tae’ natiroi to untandai Puang tu allo pa’paolai salunNa?

²Den tu to umpalele batu katonan, sia den tu to urrampa tuntunan sapi sia domba anna laai.

³Iatu keledainna pia biung naula’i male sia iatu sapinna to balu naala pentoe.

⁴Iatu to mase-mase nasuale dio mai lalanna, sia iatu to makario-rio lan tondok membuni nasang.

⁵Manassa susi bang to keledai lampung, lan padang pangallaran tassu’ male lako pengkaranganna, undaka’ kande; padang aak umpadenanni kande tu anakna.

⁶Lan pa’lak nanii unnala kande, sia urruruk bua anggoro’ nasala tau.

⁷Ma’kale-kale bang ma’bongi, belanna tae’ tu tamangkalena, tae’ pennammu’na natampangan dingin.

⁸Tu makuyu nauranni dao mai tanete, sia belanna tae’ tu pentiongannanna mella’ka’mi lako buntu batu.

⁹Den tu to ussintakki pia biung dio mai susunna indo’na sia matampo lako to makario-rio.

¹⁰Male bang ma’kale-kale, belanna tae’ tamangkalena, ullemba uyunan gandung anna mangelo bang sia.

¹¹Dio alla’na da’dua kalada’ nanii tu tau iato umparra minna’ sia nalullu’ tu bua anggoro’ lan pa’parran anna ia kalena ma’rang tongan.

¹²Lan mai kota nanii kendek tu sarro pekaindo’na to la mate sia penaanna to bangke metamba umpalaku pa’tunduan, apa tang Napalan penaa Puang Matua tu passambayangna.

¹³Iatu to senga’ sangbilangan ualinna masiang, tae’ natandai tu batattaNa sia tae’ natorro dio lalanNa.

¹⁴Iake la berre’i allo ke’de’mi tu to papatean sia napatei tu to makario-rio sia mase-mase, sia iake bongi susi bang misa’ to boko.

¹⁵Iatu matanna to pasandak salu lako rampanan kapa’ umpeagi bongi kasisalan tau, natangnga’ nakua: Da natirona’ tau, sia natampun tu lindona.

¹⁶Iake malillinmi nalo’po tu banua tama, iake masiangi untutu’i ba’ba kalena, tae’ namorai sitandan masiang;

¹⁷belanna iatu mintu’ tau iato, iatu lillinan parrak napasusi melambi’, belanna sialamo pa’patirambanna lillinan parrak.

¹⁸Matira’ tu tau iato unnaang dao to’ uai, narua tampak ropu tu taa mana’na lan tondok, tae’ namale lu langngan buntu nanii pa’lak anggoro’.

¹⁹Susito pealloan sia kamalassuan unnamma’ ambun makko, anna pa’de, susi dukato tu lino to mate unnampello’ to kasalan.

²⁰Iatu pa’tambukanna indo’na tae’mo nakilalai tu tau iato, sia napokande mammiran ulli’, tau iato tae’mo tau unningaranni, iatu kakelokan dilelleng susito misa’ kayu.

²¹Minda-minda tu umpakario-rio to tamanang tu to tang kianak anna alai tu apanna sia tang umpatiroan pa’kamasean baine balu,

²²sia moi to matoto’ nariu’ sembang tete dio kamawatanganna; bendan tu tau iato, apa tae’ nakanassai tu katuoanna.

²³Puang ungkarimmanni kamarampasan tu tau iato, anna posanderanni sia matanNa Puang ummanta-mantai tu lalanna.

²⁴Sangattu’ri umpamadao kalena anna pa’demo, mempi’di sia madodong susitu mintu’na apa dadi, la dika’ta’ susito sangbuli gandung.

²⁵Iatu iannate, ke tae’i nasusito, mindara barani umpamanassai kumua buttokna’ sia ma’kada kumua tang kebattuan tu kadangku?